MEllora 950×100

ରାଜଧାନୀର ରାଜରାସ୍ତାରେ ଗର୍ଜିଲେ ପ୍ରାଥମିକ ଶିକ୍ଷକ

ଭୁବନେଶ୍ୱର: ରାଜଧାନୀର ରାଜରାସ୍ତାରେ ଗର୍ଜିଲେ ପ୍ରାଥମିକ ଶିକ୍ଷକ । ଭୁବନେଶ୍ୱରର ଲୋୟର ପିଏମଜି ଛକରେ ହଜାର ହଜାର ପ୍ରାଥମିକ ଶିକ୍ଷକ ଏକତ୍ରିତ ହୋଇଛନ୍ତି । ୫ଦଫା ଦାବି ସହ ୬ବର୍ଷ ଠିକା ଚାକିରି ସମୟକୁ ମୂଳ ଚାକିରିରେ ଗଣନା କରିବାକୁ ଦାବି କରିଛି ପ୍ରାଥମିକ ଶିକ୍ଷକ ସଂଘ । ତାହା ସହ ବେତନ ବୃଦ୍ଧି, ପଦୋନ୍ନତି ସୁଯୋଗ, ପ୍ରାଥମିକ ଶିକ୍ଷକଙ୍କୁ ୨୮ଶହ ଟଙ୍କା ଗ୍ରେଡ ପ୍ରେ ପ୍ରଦାନ, ନୂତନ ପେନସନ ଯୋଜନା ଉଚ୍ଛେଦ କରି ପୂରାତନ ପେନସନ ଯୋଜନା ଅନ୍ତର୍ଭୁକ୍ତ କରିବା ଓ ଏକ୍ସ କ୍ୟାଡର ପ୍ରଥା ଉଚ୍ଛେଦ ସହ କ୍ୟାଡରରେ ଅନ୍ତର୍ଭୁକ୍ତ କରିବା ଓ ଚୁକ୍ତି ଭିତ୍ତିକ ନିଯୁକ୍ତି ଉଚ୍ଛେଦ କରି ସମସ୍ତ କନିଷ୍ଠ ଶିକ୍ଷକଙ୍କୁ ନିୟମିତ ଶିକ୍ଷକ ମାନ୍ୟତା ପ୍ରଦାନ କରିବା ଆଦି ଦାବି ରଖିଛି ପ୍ରାଥମିକ ଶିକ୍ଷକ ସଂଘ । ଏହି ଆନ୍ଦୋଳନରେ ଶିକ୍ଷକ ମାନେ ତାଙ୍କର ୬ ବର୍ଷର ହକକୁ ସରକାରଙ୍କୁ ମାଗିଛନ୍ତି ।

ନିକଟରେ ରାଜ୍ୟ ସରକାର ଚୁକ୍ତିଭିତ୍ତିକ ନିଯୁକ୍ତି ଉଚ୍ଛେଦ କରିଛନ୍ତି । କିନ୍ତୁ ଏହା ପ୍ରାଥମିକ ଶିକ୍ଷକଙ୍କ କ୍ଷେତ୍ରରେ ଲାଗୁ କରିନାହାଁନ୍ତି । ୨୦୦୧ ମସିହାରେ ଯେତେବେଳେ ସରକାରଙ୍କ ଆର୍ଥିକ ଅବସ୍ଥା ଅସ୍ୱଚ୍ଛଳ ଥିଲା ସେତେବେଳେ ପ୍ରାଥମିକ ଶିକ୍ଷକଙ୍କୁ ଶିକ୍ଷା ସହାୟକ ଭାବେ ୧୫୦୦ ଟଙ୍କାରେ ଚୁକ୍ତିଭିତିକ ନିଯୁକ୍ତି ପ୍ରଦାନ କରାଯାଇଥିଲା । ୨୦୦୧ ମସିହା ଠାରୁ ପ୍ରାଥମିକ ଶିକ୍ଷକମାନେ ସ୍ୱଳ୍ପ ବେତନରେ ନିଯୁକ୍ତି ପାଇ ସରକାରଙ୍କ ସମସ୍ତ କାର୍ଯ୍ୟ ସୂଚାରୁ ରୂପେ ତୁଲାଇ ଆସୁଛନ୍ତି ।

ଏତଦ୍‌ ବ୍ୟତୀତ ସରକାରଙ୍କ ନୂତନ ପେନସନ ବ୍ୟବସ୍ଥା ଫଳରେ ଜଣେ ପ୍ରାଥମିକ ଶିକ୍ଷକ ୧୫ରୁ ୨୦ବର୍ଷ ଚାକିରି କରି ଅବସର ନେଲେ ତାକୁ ମାତ୍ର ୭୦୦ ରୁ ୧୫୦୦ ଟଙ୍କା ମଧ୍ୟରେ ପେନସନ ମିଳୁଛି । ଏହି ସ୍ୱଳ୍ପ ପେନସନରେ ଅବସରପ୍ରାପ୍ତ ଶିକ୍ଷକଟି ନିଜ ପରିବାର ଚଳାଇବା ପାଇଁ କଷ୍ଟ ସ୍ୱୀକାର କରୁଛି । ତେଣୁ ସରକାର ୨୦୦୧ ମସିହା ଠାରୁ ନିଯୁକ୍ତ ଶିକ୍ଷକ କ୍ଷେତ୍ରରେ ଚୁକ୍ତିଭିତିକ ନିଯୁକ୍ତି ବ୍ୟବସ୍ଥା ଉଚ୍ଛେଦ କରିବା, ମୂଳ ନିଯୁକ୍ତି ସମୟ ଠାରୁ ଚାକିରି ସମୟ ଗଣନା କରିବା ଓ ପ୍ରତିବର୍ଷ ଇନକ୍ରିମେଂଟ ପ୍ରଦାନ କରିବା, ନୂତନ ପେନସନ ବ୍ୟବସ୍ଥା ଉଚ୍ଛେଦ କରି ପୁରୁଣା ପେନସନ ବ୍ୟବସ୍ଥା ଲାଗୁ କରିବା ଓ ଏକ୍ସ-କ୍ୟାଡର ଶିକ୍ଷକ ବ୍ୟବସ୍ଥା ଉଚ୍ଛେଦ କରି ନିୟମିତ ଶିକ୍ଷକର ମାନ୍ୟତା ପ୍ରଦାନ କରିବା ଆଦି ଦାବି ନେଇ ଭୁବନେଶ୍ୱରର ଲୋୟର ପିଏମଜି ଛକରେ ଏକ ବିଶାଳ ଶୋଭାଯାତ୍ରା କରିଛି ସଂଘ ।

ଏହି ପ୍ରସଙ୍ଗକୁ ନେଇ ଶିକ୍ଷାବିତ୍ ମାନେ ପ୍ରତିକ୍ରିୟା ରଖିଛନ୍ତି । ଶିକ୍ଷାବିତ୍ ମାନଙ୍କ ମତ ଅନୁଯାୟୀ ଏନପିଏସ ଶିକ୍ଷକ ସଂଘର ଦାବିଗୁଡ଼ିକ ଯଥାର୍ଥ । ସରକାର ସେମାନଙ୍କ ସମସ୍ୟା ତୁରନ୍ତ ସମାଧାନ କରିବା ଦରକାର । ଏହି ଆନ୍ଦୋଳନକୁ ଓଷ୍ଟା ସମର୍ଥନ ଜଣାଇଛି । ଓଷ୍ଟାର ଏହି ସସମର୍ଥନ ପରେ ଆନ୍ଦୋଳନ ଆହୁରି ତ୍ରୀବତର ହେବ ବୋଲି କହିଛନ୍ତି ଶିକ୍ଷାବିତ ।

Comments are closed.