MEllora 950×100

ସହିଦ ରେଣ୍ଡୋ ମାଝୀଙ୍କ ୧୬୭ ତମ ସହିଦ ଦିବସ ପାଳିତ

ଆଦିବାସୀଙ୍କ ପ୍ରତି ହେଉଥିବା ଅତ୍ୟାଚାର ଓ ଶୋଷଣକୁ ବରଦାସ୍ତ କରାଯିବ ନାହିଁ

ଭବାନୀପାଟଣା: ଆଦିବାସୀମାନଙ୍କ ଭିତରେ ଭେଦଭାବ ସୃଷ୍ଟି କରୁଥିବା ଓ ଆଦିବାସୀଙ୍କ ପ୍ରତି ହେଉଥିବା ନିର୍ଯାତନା, ଅତ୍ୟାଚାର ଓ ଶୋଷଣ ବିରୁଦ୍ଧରେ ଦଳବଦ୍ଧ ହୋଇ ଆଦିବାସୀମାନେ ଲଢେଇ କରିବାର ସମୟ ଆସିଛି । ଆଦିବାସୀଙ୍କ ଜାତି, ଧର୍ମ ଓ ସଂସ୍କୃତି ପ୍ରତି ଅସମ୍ମାନ କରୁଥିବା ଏବଂ ମାଓବାଦୀ ନାମରେ ନୀରିହ ଆଦିବାସୀଙ୍କୁ ନିର୍ଯାତନା ଦେବା, ହତ୍ୟା କରିବା ଏବଂ ଜିଲ୍ଲାର ଶାନ୍ତିପ୍ରିୟ ଆଦିବାସୀ ମାନଙ୍କ ମଧ୍ୟରେ ଆଜି ଭେଦଭାବରେ ଯେଉଁ ବିଷମଞ୍ଜି ବୁଣି ଦେଇଥିବା ବ୍ୟକ୍ତିବିଶେଷ, ଲୋକପ୍ରତିନିଧି ଏବଂ ସଙ୍ଗଠନମାନଙ୍କୁ ଆଦିବାସୀ ସମୂହ କୌଣସି ଉପାୟରେ କ୍ଷମାଦେବ ନାହିଁ ବୋଲି ୧୦ ତାରିଖ ଶନିବାର ଦିନ ଭବାନୀପାଟଣା ଠାରେ କଳାହାଣ୍ଡି ଡିଷ୍ଟ୍ରିକ୍ଟ ଆଦିବାସୀ ସଂଘ ତରଫରୁ ପୃଥକ ପୃଥକ ଭାବେ ସହିଦ୍‌ ରେଣ୍ଡୋମାଝୀଙ୍କ ୧୬୭ ତମ ସହିଦ୍‌ ଦିବସ ଅବସରରେ ଉପସ୍ଥିତ ଆଦିବାସୀ ନେତାମାନେ କ୍ଷୋଭ ପ୍ରକାଶ କରିଥିଲେ । ସେହିପରି ମଦନପୁର ରାମପୁର ବ୍ଲକ୍‌ର ରେଣ୍ଡୋମାଝୀ ଗ୍ରାମ ଲୁବେନ୍‌ଗଡ, ଉର୍ଲାଦାନୀ, ଥୁ.ରାମପୁର, ଜୁନାଗଡ ଆଦି ସ୍ଥାନରେ ମଧ୍ୟ ରେଣ୍ଡୋମାଝୀଙ୍କ ସହିଦ୍‌ ଦିବସ ପାଳିତ ହୋଇଯାଇଛି ।

ଘୁମ୍‌ସର କନ୍ଧମେଳି ସମୟରେ ମ.ରାମପୁର-ଉର୍ଲାଦାନୀ ଅଞ୍ଚଳରେ କନ୍ଧ ସମାଜର ପ୍ରତିନିଧିତ୍ୱ କରି ପରାକ୍ରମ ଇଂରେଜ ସେନା ସହିତ ସାହାସର ସହ ଲଢେଇକରି ସହିଦ୍‌ ହୋଇଥିବା ଆଦିବାସୀ ନେତା ସହିଦ୍‌ ରେଣ୍ଡୋ ମାଝୀଙ୍କର ୧୬୭ ତମ ସହିଦ୍‌ ଦିବସ ଅବସରରେ ଭବାନୀପାଟଣା ଠାରେ କଳାହାଣ୍ଡି ଡିଷ୍ଟ୍ରିକ୍ଟ ଆଦିବାସୀ ସଂଘ ନାମରେ ପୃଥକ ପୃଥକ ଭାବେ ସ୍ଥାନୀୟ ନୂତନ ବସ୍‌ଷ୍ଟାଣ୍ଡ ନିକଟରେ ଥିବା ରେଣ୍ଡୋମାଝୀ ସହିଦ ସ୍ମୃତି ପୀଠରେ ପୁଷ୍ପମାଲ୍ୟ ଅର୍ପଣ ଓ ସାଧାରଣ ସଭା ଅନୁଷ୍ଠିତ ହୋଇଯାଇଛି । କଳାହାଣ୍ଡି ଡିଷ୍ଟ୍ରିକ୍ଟ ଆଦିବାସୀ ସଂଘ ନାମରେ ସଂଘର ସଭାପତି ପରମାନନ୍ଦ ମାଝୀ, ମହାସଚିବ ସୁକଦେବ ମାଝୀ ପ୍ରମୁଖଙ୍କ ନେତୃତ୍ୱରେ ଜିଲ୍ଲା ଓ ଜିଲ୍ଲା ବାହାରୁ ବହୁ ଆଦିବାସୀ ନେତା ଏବଂ ବିଭିନ୍ନ ସଙ୍ଗଠନର କର୍ମକର୍ତ୍ତାମାନେ ନିଜର ପାରମ୍ପରିକ ଅସ୍ତ୍ର ଶସ୍ତ୍ର ସହିତ ବାଜା ବଜାଇ ମାଣିକେଶ୍ୱରୀ ମନ୍ଦିର ନିକଟରୁ ଏକ ଶୋଭାଯାତ୍ରାରେ ବାହାରି ଘୋଡାଘାଟ ଛକ-ପୁରୁଣାବସ୍‌ଷ୍ଟାଣ୍ଡ, ଉପଜିଲ୍ଲାପାଳ କାର୍ଯ୍ୟାଳୟ- ଏସ୍‌ପି ଅଫିସ- ଜେଲ ଛକ ନିକଟରେ ଥିବା ରେଣ୍ଡୋମାଝୀ ପ୍ରତିମୂର୍ତ୍ତୀରେ ପୁଷ୍ପମାଲ୍ୟ ଅର୍ପଣ କରିଥିଲେ ।

ସେଠାରେ ଶୋଭାଯାତ୍ରାରେ ନୂତନ ବସ୍‌ଷ୍ଟାଣ୍ଡକୁ ଆସି ରେଣ୍ଡୋମାଝୀ ସହିଦ ସ୍ମୃତି ପୀଠ ପୁଷ୍ପାମାଲ୍ୟ ଦେବା ପରେ ସେଠାରୁ ପୁଣି ଏକ ଶୋଭାଯାତ୍ରାରେ ଘୋଡାଘାଟ ଛକ-ସତ୍ୟମ୍‌ ସିନେମାହଲ୍‌- ମହାବୀର ସାଂସ୍କୃତିକ ଅନୁଷ୍ଠାନ ଛକ ଦେଇ ବିଜୁ କଲ୍ୟାଣ ମଣ୍ଡପରେ ପହଞ୍ଚିବା ପରେ ସେଠାରେ ସଂଘର ସଭାପତି ପରମାନନ୍ଦ ମାଝୀଙ୍କ ଅଧ୍ୟକ୍ଷତାରେ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ପୂର୍ବତନ ବିଧାୟକ ଡାବୁଗାଁ, ଭୁଜବଳ ମାଝୀ, ପୂର୍ବତନ ମନ୍ତ୍ରୀ ବଳଭଦ୍ର ମାଝୀ, ପୂର୍ବତନ ବିଧାୟକ କୁମରମଣି ଶବର, ପଶ୍ଚିମ ଓଡିଶା ଆଦିବାସୀ କଲ୍ୟାଣ ମହାସଂଘ ସାଧାରଣ ସଂପାଦକ ବାଳକୃଷ୍ଣ ଶବର, ସରକାରୀ କର୍ମଚାରୀ ନେତା ରୂପକେଶରୀ ଦଳେଇ, ମହମ୍ମଦ ସାହେବ, ତ୍ରିଲୋଚନ ପାଣିଗ୍ରାହୀ, ସରୋଜ ବାଗ ସମେତ ଓଡିଶାର ବିଭିନ୍ନ ଜିଲ୍ଲାରୁ ଆଦିବାସୀ ନେତା ମାନେ ଯୋଗଦେଇଥିଲେ ।

ଠିକ୍‌ ସେହିପରି କଳାହାଣ୍ଡି ଜିଲ୍ଲା ଆଦିବାସୀ ସଂଘ ନାମରେ ଆଉ ଏକ ଗୋଷ୍ଠୀ ସଭାପତି ପ୍ରକାଶ ମାଝୀ, ସାଧାରଣ ସଂପାଦକ ରୁତୁରାଜ ମାଝୀ ଓ ସଂଗଠନ ସଂପାଦକ ଲକ୍ଷ୍ମଣ ଭୋଇଙ୍କ ନେତୃତ୍ୱରେ ଜିଲ୍ଲାର ବିଭିନ୍ନ ଅଞ୍ଚଳରୁ ଆଦିବାସୀ ନେତା ମାନେ କଲେଜ ଛକରୁ ପାରମ୍ପରିକ ଅସ୍ତ୍ରଶସ୍ତ୍ର ସହିତ ବଜା ବଜାଇ ଏକ ଶୋଭାଯାତ୍ରାରେ ସହର ପରିକ୍ରମା କରି ନୂତନ ବସ୍‌ଷ୍ଟାଣ୍ଡ ନିକଟରେ ଥିବା ରେଣ୍ଡୋମାଝୀ ସହିଦ ସ୍ମୃତି ପୀଠ ଏବଂ ଜେଲ ଛକରେ ଥିବା ରେଣ୍ଡୋ ମାଝି ପ୍ରତିମୂର୍ତ୍ତିରେ ପୁଷ୍ପାମାଲ୍ୟ ଦେଇଥିଲେ । ପରେ ଟାଉନ ହଲ ଠାରେ ସଂଘର ସଭାପତି ପ୍ରକାଶ ମାଝୀଙ୍କ ଅଧ୍ୟକ୍ଷତାରେ ସହିଦ୍‌ ଦିବସ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଆଦିବାସୀ ମନ୍ତ୍ରୀ ଜଗନ୍ନାଥ ସାରକା, ବିଧାୟକ ପ୍ରଦୀପ ଦିଶାରୀ, କଳାହାଣ୍ଡି ବିଶ୍ୱବିଦ୍ୟାଳୟ କୁଳସଚିବ ପିତାମ୍ବର ଭୋଇ, ଛତିଶଗଡ ପ୍ରିନ୍ସିପାଲ ଆକାଉଣ୍ଟ ଜେନେରାଲ ପୂର୍ଣ୍ଣଚନ୍ଦ୍ର ମାଝୀ, ଜିଲ୍ଲାପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂଦେଓ, ବିଧାୟକ ଦିବ୍ୟଶଙ୍କର ମିଶ୍ର, ବିଧାୟକ ମୌଷଧି ବାଗ, ଭବାନୀପାଟଣା ନଗରପାଳିକା ସଂଯୁକ୍ତା ବେହେରା, ଲାଞ୍ଜିଗଡ ବ୍ଲକ ଅଧ୍ୟକ୍ଷ କମଳା ପାତ୍ର, ଭବାନୀପାଟଣା ବ୍ଲକ ଅଧ୍ୟକ୍ଷ ପ୍ରଫୁଲ୍ଲ ସାହୁ ପ୍ରମୁଖ ଯୋଗଦେଇଥିଲେ ।

ଏହି ଦୁଇ ପୃଥକ ପୃଥକ ସଭାରେ ଉପସ୍ଥିତ ଆଦିବାସୀ ନେତାମାନେ ପ୍ରକାଶ କରିଥିଲେ ଯେ, କେତେକ ନ୍ୟସ୍ତ ସ୍ୱାର୍ଥ ବ୍ୟକ୍ତି ନିଜର ରାଜନୈତିକ ସ୍ୱାର୍ଥ ପାଇଁ ନିରୀହ ଆଦିବାସୀମାନଙ୍କୁ ବ୍ୟବହାର କରୁଛନ୍ତି । କିଛି ଆଦିବାସୀ ନେତା ନିଜର ସ୍ୱାର୍ଥ ପାଇଁ ପଥଭ୍ରଷ୍ଟ ହୋଇ ଆଦିବାସୀ ବିରୋଧୀ କାର୍ଯ୍ୟ କରିବା ଘଟଣାକୁ ତୀବ୍ର ଭର୍ତ୍ସନା କରିଥିଲେ । କଳାହାଣ୍ଡି ସମେତ ରାଜ୍ୟରେ ମାଓ ଦମନ ନାମରେ ପୋଲିସ୍‌ ଯେଉଁପରି ଭାବରେ ନିରୀହ ଆଦିବାସୀଙ୍କୁ ଗୁଳିକରି ହତ୍ୟା କରୁଛି ତ’ କେଉଁଠି ମାଓବାଦୀ ନାମରେ ନିରୀହ ଆଦିବାସୀଙ୍କୁ ଗିରଫ କରି ଜେଲ୍‌ ପଠାଇଦେବା ଘଟଣା ଦିନକୁଦିନ ବୃଦ୍ଧି ପାଉଛି । ବର୍ତ୍ତମାନ ସରକାର ମାଓ ଦମନ ନାମରେ ଆଦିବାସୀମାନଙ୍କୁ ମୂଳପୋଛ କରିଦେବାର ଏହା ଏକ କୁ-ଚକ୍ରାନ୍ତ ବୋଲି ଏହି ଆଦିବାସୀ ନେତାମାନେ ଅଭିଯୋଗ କରିଥିଲେ । ଆଜି ସାରା ଓଡିଶାରେ ଆଦିବାସୀଙ୍କ ଜୀବନ ବିପଦପୂର୍ଣ୍ଣ ଅବସ୍ଥାରେ ଗତି କରୁଛି । ଗୋଟିଏ ପଟେ ମାଓବାଦୀ ଭୟ ଅନ୍ୟପଟେ ସସସ୍ତ୍ର ପୁଲିସର ନାଲିଆଖି ଭିତରେ ଆଦିବାସୀ ପେଶି ହୋଇଚାଲିଛନ୍ତି ।

ଯେଉଁମାନେ ଆଦିବାସୀ ସମାଜ, ଜାତି, ଧର୍ମ ଓ ସଂସ୍କୃତି ଏବଂ ପରମ୍ପରାକୁ ଅସମ୍ମାନ କରୁଛନ୍ତି ସେପରି ବ୍ୟକ୍ତିବିଶେଷ, ସଙ୍ଗଠନ, ଏବଂ ରାଜନୈତିକ ଦଳକୁ କୌଣସି ଉପାୟରେ ଆଦିବାସୀ ସଂଘ କ୍ଷମାଦେବନାହିଁ । ଆଦିବାସୀମାନଙ୍କର ପୁଅ ଝିଅ ମାନେ ଚାକିରି ଓ ସରକାରୀ ସୁବିଧା ପାଉନଥିବାବେଳେ ପ୍ରଶାସନ ଅଢୁଆଳରେ ରହି ଶହ ଶହ ନକଲି ଆଦିବାସୀ ମାନେ ଅସଲି ଆଦିବାସୀ ନାମରେ ସମସ୍ତ ସରକାରୀ ସୁବିଧା ପାଇବା ସହିତ ସରକାରୀ କାର୍ଯ୍ୟାଳୟରେ ଚାକିରି କରିବା ଫଳରେ ମୂଳ ଆଦିବାସୀମାନେ ଆଜି ସବୁ ସୁବିଧା ଓ ଅଧିକାରରୁ ବଞ୍ଚିତ ହେଉଛନ୍ତି । ତୁରନ୍ତ ସରକାର ଓ ଜିଲ୍ଲାପ୍ରଶାସନ ସଂଘ ଦେଇଥିବା ନକଲି ଆଦିବାସୀ ତାଲିକାକୁ ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ଆଦିବାସୀମାନଙ୍କ ଭିତରେ କୋହଳୁଥିବା ଅସନ୍ତୋଷ ଆଗାମୀ ଦିନରେ କେଉଁ ମୁହୂର୍ତ୍ତରେ ଉଗ୍ର ରୂପ ନେବ ଏଥିରେ ତିଳେମାତ୍ର ସନ୍ଦେହ ନାହିଁ ବୋଲି ଚେତାବନୀ ଦେଇଥିଲେ । ଏଠାରେ ପ୍ରକାଶ ଥାଉ ଯେ, ଏହି ଦୁଇ ଗୋଷ୍ଠୀର ଶୋଭାଯାତ୍ରା ଘୋଡାଘାଟ ଛକ ନିକଟରେ ମୁହାଁ ମୁହିଁ ହୋଇଥିଲେ । ପୁଲିସ ଚତୁରତା ସହିତ ଏହି ଦୁଇ ଶୋଭାଯାତ୍ରାକୁ ନିୟନ୍ତ୍ରଣ କରି ପୃଥକ ପୃଥକ ଭାବରେ ଆଗେଇ ନେଇଥିଲା ।

ଗୋଟିଏ ଆଦିବାସୀ ସଂଘ ନାମରେ ପୃଥକ ପୃଥକ ଭାବେ ରେଣ୍ଡୋ ମାଝୀ ସହିଦ ଦିବସ ପାଳନ କରାଯିବା ଓ ନୂତନ ବସ୍‌ଷ୍ଟାଣ୍ଡ ନିକଟରେ ଥିବା ରେଣ୍ଡୋ ମାଝି ସହିଦ ସ୍ମୃତିପୀଠକୁ ନିଜର ସଂଗଠନର ବୋଲି ଦାବି କରିଥିବା ଯୋଗୁଁ କାଳେ କୌଣସି ପ୍ରକାର ଅପ୍ରିତିକ ସୃଷ୍ଟି ହୋଇପାରେ ସେଥିପାଇଁ ପୁଲିସ ତରଫରୁ କଡା ସୁରକ୍ଷା ବ୍ୟବସ୍ଥା କରାଯିବା ସହିତ କୌଣସି ପ୍ରକାର ଗଣ୍ଡଗୋଳ ନକରି ଶାନ୍ତିପ୍ରିୟ ଭାବେ ସହିଦ୍‌ ଦିବସ ପାଳନ କରିବାକୁ ଦୁଇପକ୍ଷକ ଭବାନୀପାଟଣା ଟାଉନ ଥାନା ଆଇଆଇସି ପ୍ରଦୀପ ଧରୁଆ ଅନୁରୋଧ କରିଥିଲେ ।

Comments are closed.