୭୪% ବଢ଼ିଛି ବ୍ୟାଙ୍କ ଠକେଇ, ବର୍ଷକରେ ବୁଡ଼ିଯାଇଛି ୭୧ ହଜାର କୋଟି: ଆରବିଆଇ

ମୁମ୍ବଇ: ୨୦୧୮-୧୯ ଆର୍ଥିକ ବର୍ଷରେ ବ୍ୟାଙ୍କ ଠକେଇ ବୃଦ୍ଧି ପାଇଛି। ୨୦୧୭-୧୮ ତୁଳନାରେ ଏହି ପରିମାଣ ୭୪% ଅଧିକ। ୨୦୧୭-୧୮ରେ ୪୦ ହଜାର ୧୬୭ କୋଟି ଟଙ୍କାର ଠକେଇ ହୋଇଥିଲାବେଳେ ୨୦୧୮-୧୯ରେ ଏହା ବୃଦ୍ଧି ପାଇ ୭୧ ହଜାର ୫୪୩ କୋଟିରେ ପହଞ୍ଚିଛି ବୋଲି ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ପକ୍ଷରୁ ମଙ୍ଗଳବାର ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି।

ଆରବିଆଇ ରିପୋର୍ଟ ଅନୁସାରେ ୨୦୧୮-୧୯ ଆର୍ଥିକ ବର୍ଷରେ ବ୍ୟାଙ୍କଗୁଡ଼ିକର ୭୧ ହଜାର ୫୪୩ କୋଟି ଟଙ୍କା ଠକେଇରେ ବୁଡ଼ିଯାଇଛି। ଏହି ଅର୍ଥର ପରିମାଣ ଭୋଡ଼ାଫୋନ, ଆଇଡିଆର ୨ୟ ତ୍ରୈମାସରେ ହୋଇଥିବା ୫୦ ହଜାର କୋଟି ଟଙ୍କାର କ୍ଷତିଠାରୁ ବି ବହୁତ। ରିପୋର୍ଟ ଅନୁସାରେ ବ୍ୟାଙ୍କଗୁଡ଼ିକ ପକ୍ଷରୁ ଠକେଇ ନେଇ ଯେଉଁ ମାମଲା ଦାୟର ହୋଇଛି ସେଥିରେ ବି ବୃଦ୍ଧି ଘଟିଛି। ୨୦୧୭-୧୮ରେ ୫୯୧୬ ମାମଲା ରୁଜୁ ହୋଇଥିବାବେଳେ ୨୦୧୮-୧୯ରେ ୬୮୦୧ ମାମଲା ରୁଜୁ ହୋଇଛି।

ଅନ୍ୟପଟେ ବିଗତ ୭ବର୍ଷ ମଧ୍ୟରେ ପ୍ରଥମ ଥର ଲାଗି ୨୦୧୮-୧୯ରେ ବ୍ୟାଙ୍କଗୁଡ଼ିକର ମୋଟ ଏନପିଏ ପରିମାଣ ତଳକୁ ଖସିଥିବା ଆରବିଆଇ କହିଛି। ୨୦୧୯ ସେପ୍ଟେମ୍ବର ସୁଦ୍ଧା ବ୍ୟାଙ୍କଗୁଡ଼ିକର ମୋଟ ଏନପିଏ ହ୍ରାସ ପାଇ ୯.୧%ରେ ପହଞ୍ଚିଛି, ଯେତେବେଳେ କି ୨୦୧୮ ସେପ୍ଟେମ୍ବରରେ ଏହି ପରିମାଣ ୧୧.୨% ରହିଥିଲା। ସେହିପରି ବାସ୍ତବ ଏନପିଏ ମଧ୍ୟ କମିଛି। ୨୦୧୮ ସେପ୍ଟେମ୍ବରରେ ବାସ୍ତବ ଏନପିଏ ୬% ଥିବାବେଳେ ୨୦୧୯ ସେପ୍ଟେମ୍ବର ସୁଦ୍ଧା ଏହା ଖସିଆସି ୩.୭%ରେ ରହିଛି।

ଋଣ ଛାଡ଼ ଯୋଗୁ କୃଷି କ୍ଷେତ୍ରର ଏନପିଏ ବଢ଼ିଛି

ଆରବିଆଇ ପକ୍ଷରୁ କୁହାଯାଇଛି ଯେ, ୨୦୧୯ ଆର୍ଥିକ ବର୍ଷରେ କୃଷି କ୍ଷେତ୍ରରେ ଋଣ ଛାଡ଼ ଯୋଗୁ ଏନପିଏ ବୃଦ୍ଧି ପାଇଛି। ୨୦୨୦ର ପ୍ରଥମ ୬ମାସ ପର୍ଯ୍ୟନ୍ତ ବି ଏହି ସ୍ଥିତି ଜାରି ରହିବ। ଯେଉଁ ରାଜ୍ୟରେ ୨୦୧୮ ଏବଂ ୨୦୧୯ରେ କୃଷି ଋଣ ଛାଡ଼ କରାଯାଇଛି ସେହି ରାଜ୍ୟଗୁଡ଼ିକରେ ଏହାର ପ୍ରଭାବ ଅଧିକ ରହିବ। ଅନ୍ୟପଟେ ଉଦ୍ୟୋଗ ଜଗତରେ ମୋଟ ଏନପିଏ ପରିମାଣ ସବୁଠାରୁ ଅଧିକ ରହିଛି। ଏହି କ୍ଷେତ୍ରରେ ଏନପିଏ ପରିମାଣ ୧୭.୪% ରହିଛି।

Comments
Loading...