MEllora 950×100

ବାଂଲାଠାରୁ ଦିନିକିଆ ଶୃଙ୍ଖଳା ହାରିଲା ଭାରତ

ଭାରତର କ୍ରମାଗତ ଦିନିକିଆ ଶୃଙ୍ଖଳା ପରାଜୟ

ମୀରପୁର : ନ୍ୟୁଜିଲାଣ୍ଡ ପରେ ବାଂଲାଦେଶ ବିପକ୍ଷ ଦିନିକିଆ ଶୃଙ୍ଖଳାରେ ମଧ୍ୟ ଭାରତ ପରାଜିତ ହୋଇଛି। ଭାରତ ବିପକ୍ଷ ୩ ମ୍ୟାଚ ବିଶିଷ୍ଟ ଦିନିକିଆ ଶୃଙ୍ଖଳାକୁ ଘରୋଇ ବାଂଲାଦେଶ ୨-୦ରେ ଆଗୁଆ ଜିତି ନେଇଛି। ବୁଧବାର ମୀରପୁରରେ ଖେଳାଯାଇଥିବା ଦ୍ବିତୀୟ ଦିନିକିଆରେ ବାଂଲାଦେଶ ୫ରନରେ ଭାରତକୁ ପରାସ୍ତ କରିଛି। ଏଥି ସହିତ ବାଂଲାଦେଶ ୨୦୧୬ରୁ ନିଜ ମାଟିରେ ଦିନିକିଆ ଶୃଙ୍ଖଳା ବିଜୟ ଧାରାକୁ ବଜାୟ ରଖିଛି। ପୂର୍ବରୁ ୨୦୧୫ରେ ବାଂଲାଦେଶ ବିପକ୍ଷ ଦିନିକିଆ ଶୃଙ୍ଖଳାରେ ଭାରତ ୧-୨ରେ ପରାଜିତ ହୋଇଥିଲା।
ବାଂଲାଦେଶ ମେହଦୀ ହାସନ ମିରାଜଙ୍କ ଅପରାଜିତ ଶତକ ବଳରେ ୨୭୧ରନ କରିଥିଲା। ଜବାବରେ ଭାରତ ଶ୍ରେୟାସ ଆୟର, ଅକ୍ଷର ପଟେଲ ଓ ରୋହିତ ଶର୍ମାଙ୍କ ଅର୍ଦ୍ଧଶତକ ସତ୍ତ୍ବେ ୨୬୬ରନ କରିବାକୁ ସକ୍ଷମ ହୋଇଥିଲା। ୨୭୨ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଭାରତ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ରୋହିତ ଶର୍ମା ଆହତ ପାଇଁ ବ୍ୟାଟିଂ କରିବାକୁ ଆସିନଥିବାବେଳେ ବିରାଟ କୋହଲି ଓ ଶିଖର ଧାୱନ ଓପନିଂ କରିଥିଲେ। ୧୩ରନ ମଧ୍ୟରେ ଭାରତ ଦୁଇ ଓପନରଙ୍କୁ ହରାଇଥିଲା। ଧାୱନ ୮ ଓ କୋହଲି ୫ରନ କରି ଆଉଟ୍‌ ହୋଇଥିଲେ। ୩ୟ ୱିକେଟରେ ୱାଶିଂଟନ ସୁନ୍ଦର ଓ ଶ୍ରେୟାସ ଆୟର ୨୬ରନ ସଂଗ୍ରହ କରିଥିଲେ। ୩୯ରନ ସ୍କୋର ଥିବାବେଳେ ୱାଶିଂଟନ ୧୧ରନ କରି ଆଉଟ୍‌ ହୋଇଥିଲେ। ଲୋକଶ ରାହୁଲ ଓ ଆୟର ୪ର୍ଥ ୱିକେଟ ପାଇଁ ବଡ ଭାଗିଦାରୀ କରିବାରେ ବିଫଳ ହୋଇଥିଲେ। ସ୍କୋର ୬୫ରନ ଥିବାବେଳେ ରାହୁଲ ୧୪ରନ କରି ଆଉଟ୍‌ ହୋଇଥିଲେ। ୫ମ ୱିକେଟ ପାଇଁ ଆୟରଙ୍କ ସହ ଅକ୍ଷର ପଟେଲ ୧୦୭ରନ ସଂଗ୍ରହ କରିବା ସହିତ ଭାରତ ପାଇଁ ଆଶା ସୃଷ୍ଟି କରିଥିଲେ। ସ୍କୋର ୧୭୨ରନ ଥିବାବେଳେ ଶ୍ରେୟାସ ୧୦୨ଟି ବଲରୁ ୬ଟି ଚୌକା ଓ ୩ଟି ଛକା ସହ ୮୨ରନ କରି ଆଉଟ୍‌ ହୋଇଥିଲେ। ଅନ୍ୟପଟେ ଦ୍ରୁତ ଅଦ୍ଧଶତକ ହାସଲ କରିବା ପରେ ଅକ୍ଷର ପଟେଲ ମଧ୍ୟ ଆଉଟ୍‌ ହୋଇଥିଲେ। ସ୍କୋର ୧୮୯ରନ ଥିବାବେଳେ ଅକ୍ଷର ୫୬ଟି ବଲରୁ ୨ଟି ଚୌକା ଓ ୩ଟି ଛକା ସହ ୫୬ରନ କରି ଆଉଟ୍‌ ହୋଇଥିଲେ। ସାର୍ଦୁଳ ଠାକୁର ଓ ଦୀପକ ଚହର ୭ମ ୱିକେଟ ପାଇଁ୧୮ରନ ସଂଗ୍ରହ କରିବା ସହିତ ସ୍କୋରକୁ ୨୦୦ ଅତିକ୍ରମ କରାଇଥିଲେ। ୨୦୭ରନ ସ୍କୋର ଥିବାବେଳେ ସାର୍ଦୁଳ ୭ରନ କରି ଆଉଟ୍‌ ହୋଇଥିଲେ। ଆଙ୍ଗୁଠିରେ ଆଘାତ ଲାଗି ଓପନିଂ କରିବାକୁ ଆସିନଥିବା ରୋହିତ ଶେଷରେ ବ୍ୟାଟିଂ କରିବାକୁ ଆସିଥିଲେ। ଭାରତକୁ ଉକ୍ତ ସମୟ​‌େ​‌ର ବିଜୟ ପାଇଁ ୩୯ଟି ବଲରୁ ୬୨ରନର ଆବଶ୍ୟକତା ଥିଲା। ଶେଷ ପର୍ଯ୍ୟନ୍ତ ରୋହିତ ଲଢିଥିଲେ ମଧ୍ୟ ଭାରତ ବିଜୟଠାରୁ ଆଉ ମାତ୍ର ୬ ରନ ଦୂରରେ ରହିଯାଇଥିଲା। ମହମ୍ମଦ ସିରାଜ ୧୨ଟି ବଲ ଖେଳି ମାତ୍ର ୨ରନ କରିବା ଭାରତକୁ ମହଙ୍ଗା ପଡିଥିଲା। ରୋହିତ ୨୮ଟି ବଲରୁ ୩ଟି ଚୌକା ଓ ୫ଟି ଛକା ସହ ୫୩ରନ କରି ଅପରାଜିତ ରହିଥିଲା। ବାଂଲାଦେଶ ପକ୍ଷରୁ ଇବାଦତ ହୋସେନ ୩ଟି, ମେହଦୀ ହାସନ ମିର୍‌ଜା, ସାକିବ୍‌ ଅଲ ହାସନ ୨ଟି ଲେଖାଏଁ ୱିକେଟ ନେଇଥିଲେ।
ବାଂଲାଦେଶ ଟସ୍‌ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଦଳ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହେବା ସହିତ ୬୯ରନରେ ୬ଟି ୱିକେଟ ହରାଇଥିଲା। ଆନୁମୁଲ ହକ୍‌ ୧୧, ଅଧିନାୟକ ଲିଟନ ଦାସ ୭, ନାଜମୁଲ ହୋସେନ ସାଣ୍ଟୋ ୨୧, ସାକିବ ଅଲ୍‌ ହାସନ ୭, ମୁସ୍ତାଫିଜୁର ରହିମ ୧୨ରନ କରି ଆଉଟ୍‌ ହୋଇଥିବାବେଳେ ଆଫିଫ ହୋସେନ ଖାତା ଖୋଲି ପାରିନଥିଲେ। ସପ୍ତମ ୱିକେଟରେ ମହମ୍ମଦୁଲ୍ଲା ଓ ପ୍ରଥମ ମ୍ୟାଚର ହିରୋ ମେହଦୀ ହାସନ ମିର୍‌ଜା ୧୪୮ରନ ସଂଗ୍ରହ କରିଥିଲେ। ସ୍କୋର ୨୧୭ରନ ଥିବାବେଳେ ମହମ୍ମଦୁଲ୍ଲା ୯୬ଟି ବଲରୁ ୭ଟି ଚୌକା ସହ ୭୭ରନ କରି ଆଉଟ୍‌ ହୋଇଥିଲେ। ଶେଷ ଆଡକୁ ମିର୍‌ଜାଙ୍କ ଅପରାଜିତ ୧୦୦ ଓ ନାସୁମ ଅହମ୍ମଦଙ୍କ ଦ୍ରୁତ ୧୮ରନ ବଳରେ ଦଳ ୭ ୱିକେଟ ହରାଇ ୨୭୧ରନ କରିବାକୁ ସକ୍ଷମ ହୋଇଥିଲା। ମିର୍‌ଜା ୮୩ଟି ବଲରୁ ୮ଟି ଚୌକା ଓ ୪ଟି ଛକା ସହ ୧୦୦ରନ କରି ଅପରାଜିତ ରହିଥିଲେ। ଭାରତ ପକ୍ଷରୁ ୱାଶିଂଟନ ସୁନ୍ଦର ୩ଟି, ମହମ୍ମଦ ସିରାଜ ଓ ଉମ୍ରାନ ମଲ୍ଲିକ ପ୍ରତ୍ୟେକ ଦୁଇଟି ଲେଖାଏଁ ୱିକେଟ ନେଇଥିଲେ। ମେହଦୀ ହାସନ ମୀରାଜ ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଥିଲେ।

Comments are closed.