କରୋନା ଯୋଦ୍ଧାଙ୍କ ପାଇଁ “ବନ୍ଦେ ଉତ୍କଳ ଜନନୀ’

ପିପିଲି : କୋଭିଡ଼ ଯୁଦ୍ଧରେ ନିଜ ଜୀବନକୁ ବିପଦରେ ପକାଇ ସଂକ୍ରମଣ ରୋକିବା ପାଇଁ ଦିନରାତି ଏକ କରି ଦେଇଥିବା କରୋନା ଯୋଦ୍ଧାମାନଙ୍କ ତ୍ୟାଗକୁ ସମ୍ମାନ ଜଣାଇବା ଓ ସେମାନଙ୍କ ମହତ କାର୍ଯ୍ୟକୁ ଉତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନୁରୋଧ କ୍ରମେ ପିପିଲିବାସୀ ଶନିବାର ଅପରାହ୍ନ ୫ଟା ୩୦ ମିନିଟରେ “ବନ୍ଦେ ଉତ୍କଳ ଜନନୀ’  ଗାନ କରି କୋଭିଡ଼ ଯୋଦ୍ଧାମାନଙ୍କୁ ଉତ୍ସାହିତ ଓ ସମ୍ମାନିତ କରିଥିଲେ ।

ପିପିଲି ପୁଲିସ ପକ୍ଷରୁ ନିଆରା ଢଙ୍ଗରେ “ବନ୍ଦେ ଉତ୍କଳ ଜନନୀ’ ଗାନ କରାଯାଇଥିବା ବେଳେ ଏହାକୁ ବିଭିନ୍ନ ମହଲରେ ଭୁରି ଭୁରି ପ୍ରଶଂସା କରାଯାଇଛି । ପିପିଲି ଥାନା ସମ୍ମୁଖ ରାଜରାସ୍ତା ଉପରେ ଏସ୍‍ଡିପିଓ ଦେବଦତ୍ତ ବରାଳ, ଆଇଆଇସି ଶରତ କୁମାର ସାହୁଙ୍କ ସମେତ ଥାନାର ସମସ୍ତ ଅଧିକାରୀ ଓ କର୍ମଚାରୀମାନେ ସାମାଜିକ ଦୂରତ୍ୱ ପାଳନ ପୂର୍ବକ ଧାଡିରେ ଠିଆ ହୋଇ ସମବେତ ଭାବେ “ବନ୍ଦେ ଉତ୍କଳ ଜନନୀ’ ଗାନ କରିଥିଲେ । ଏହି ସମୟରେ ସେହି ରାସ୍ତାର ଉଭୟ ପାଶ୍ୱର୍ରେ ଶତାଧିକ ସଂଖ୍ୟାରେ ଲୋକେ ଠିଆ ହୋଇ ପୁଲିସ ସହ ଏହି ସଙ୍ଗୀତ ଗାନ କରିବା ସହ କୋଭିଡ଼ ଯୋଦ୍ଧାମାନଙ୍କୁ ଉତ୍ସାହିତ ଓ ସମ୍ମାନିତ କରିଥିଲେ । ଅଞ୍ଚଳର ବହୁ ବୁଦ୍ଧିଜୀବୀ, ବରିଷ୍ଠ ନାଗରିକ, ବ୍ୟବସାୟୀ, ବ୍ୟାଙ୍କ କର୍ମଚାରୀ, ଯୁବକ ଯୁବତୀମାନେ ଏଥିରେ ଅଂଶ ଗ୍ରହଣ କରିଥିଲେ । ରାସ୍ତାରେ ଗାଡିମଟରରେ ଯାଉଥିବା ଲୋକେ ମଧ୍ୟ ସେଠାରେ ଠିଆ ହୋଇ ଏହି ସଙ୍ଗୀତ ଗାନ କରିଥିଲେ । ସେହିପରି ସମଗ୍ର ପିପିଲିର ବଜାରଘାଟ ଠାରୁ ଆରମ୍ଭ କରି ଗ୍ରାମାଞ୍ଚଳ ପର୍ଯ୍ୟନ୍ତ ପ୍ରତ୍ୟେକ ସ୍ଥାନରେ ଛୋଟ ପିଲାଙ୍କ ଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମସ୍ତେ ଏହି ସଙ୍ଗୀତ ଗାନ କରି କୋଭିଡ଼ ଯୋଦ୍ଧାମାନଙ୍କୁ ଉତ୍ସାହିତ ଓ ସମ୍ମାନିତ କରିଥିବା ପରିଲକ୍ଷିତ ହୋଇଥିଲା ।

 

Comments
Loading...