ବାଲିଚନ୍ଦ୍ରପୁର: ମରଣାନ୍ତକ ଆକ୍ରମଣ କରିଥିବା ଅଭିଯୁକ୍ତ ମାନଙ୍କ ଗିରଫ ଦାବି କରି ବାଲିଚନ୍ଦ୍ରପୁର ଥାନା ସମ୍ମୁଖରେ ରବିବାର ଗ୍ରାମବାସୀ ମାନେ ଧାରଣା ଦେଇଥିଲେ। ଏହି ଥାନା ଅନ୍ତର୍ଗତ ମହାଦେଇପୁର ଗ୍ରାମର ଦୁଇ ବାପ ପୁଅଙ୍କୁ ମରଣାନ୍ତକ ଆକ୍ରମଣ ଘଟଣାରେ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଉନଥିବାରୁ ରବିବାର ଶତାଧିକ ଗ୍ରାମବାସୀ ବାଲିଚନ୍ଦ୍ରପୁର ଥାନା ସମ୍ମୁଖରେ ଧାରଣାରେ ବସିରହିଥିବା ଦେଖିବାକୁ ମିଳିଥିଲା। ଏହା ଦେଖି ବାଲିଚନ୍ଦ୍ରପୁର ଥାନାଧିକାରିଣୀ ଧାରଣାକାରୀଙ୍କୁ ବୁଝା ସୁଝା କରିଥିଲେ ମଧ୍ୟ ଆକ୍ରମଣ ଘଟଣାର ଚାରିଦିନ ବିତିଯାଇଥିଲେ ମଧ୍ୟ କାହିଁକି ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯାଇ ନାହିଁ ପ୍ରଶ୍ନ କରିବା ସହ ନିଜ ଜିଦ୍ରେ ଅଟଳ ରହିଥିଲେ। ଏହି ଖବର ପାଇ ଯାଜପୁରରୋଡ୍ ଏସ.ଡି.ପି.ଓ ଚିନ୍ମୟ ନାୟକ ଘଟଣାସ୍ଥଳରେ ପହଞ୍ଚି ଧାରଣାରତ ଗ୍ରାମବାସୀଙ୍କୁ ବୁଝା ସୁଝା କରିବା ସହ ନିଜେ ତଦନ୍ତ କରି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ପ୍ରତିଶୃତି ଦେବା ପରେ ଧାରଣା ପ୍ରତ୍ୟାହୁତ ହୋଇଥିଲା। ଅଭିଯୋଗ ଅନୁଯାୟୀ ମହାଦେଇପୁର ଗ୍ରାମର ଛକ ମୁଣ୍ଡରେ ପାନ ଓ କୁକୁଡା ଦୋକାନ କରିଥିବା ମନୋରଞ୍ଜନ ସ୍ୱାଇଁ ସହ ପାଣି ଢାଳିବାକୁ ନେଇ ଗତ ୬ ତାରିଖ ଦିନ ଦଳେଇ ସାହିର ଜଣେ ଯୁବକଙ୍କ ସହ ତାଙ୍କର ବଚସା ହୋଇଥିଲା।
ଦଳେଇ ସାହିର ଯୁବକ ମାନେ ସଙ୍ଗବଦ୍ଧ ଭାବେ ଆସି ଦୋକାନରେ ଥିବା ମନୋରଞ୍ଜନ ଓ ତାଙ୍କର ବାପା ଗଦାଧରଙ୍କୁ ମରଣାନ୍ତକ ଆକ୍ରମଣ କରି ଗୁରୁତର କରିପକାଇଥିଲେ। ପ୍ରଥମେ ଉଭୟଙ୍କୁ ବଡଚଣା ଓ ପରେ କଟକ ସ୍ଥାନାନ୍ତର କରାଯାଇଥିଲା। ମନୋରଞ୍ଜନଙ୍କ ମା ଆଦରବାଳାଙ୍କ ଏତଲା କ୍ରମେ ପୁଲିସ ଏକ ମାମଲା ରୁଜୁ କରିଥିବା ବେଳେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା। ତେବେ ମନୋରଞ୍ଜ ସାମାନ୍ୟ ସୁସ୍ଥ ହୋଇଥିବା ବେଳେ ଗୁରୁତର ଅବସ୍ଥାରେ ଗଦାଧର ଏବେବି ଆଇ.ସି.ୟ.ୁରେ ଚିକିତ୍ସାଧିନ ଥିବା ଜଣାଯାଇଛି। ଏହି ଘଟଣାରେ ପୁଲିସ କାର୍ଯ୍ୟଧାରାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ତୁରନ୍ତ କାର୍ଯ୍ୟାନୁଷ୍ଠାନ ଦାବି କରି ରବିବାର ଶତାଧିକ ଗ୍ରାମବାସୀ ଥାନା ସମ୍ମୁଖରେ ଧାରଣାରେ ବସିରହିଥିଲେ। ସେହିପରି ଜାତିଗତ ଆକ୍ଷେପ କରିଥିବା ନେଇ ଅପର ପକ୍ଷରୁ ଝୁନି ଦଳେଇ ମଧ୍ୟ ଆଉ ଏକ ପଲଟା ଅଭିଯୋଗ କରିଥିବା ଥାନା ସୁତ୍ରରୁ ସୂଚନା ମିଳିଛି।
Comments are closed.