ନୀଳଗିରି: ବାଲେଶ୍ୱର ଜିଲା ଅଧୀନ ନୀଳଗିରି ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ରାତଅଧିଆ ରାସ୍ତାରୁ ସ୍ତ୍ରୀକୁ ଟେକି ନେବା ପରେ ବନ୍ଧୁ ସହ ମିଶି ଅସଦାଚରଣ କରିବା ସହ ସମ୍ପୃକ୍ତା ମହିଳାଙ୍କ ଚୁଟି କାଟିବା ଭଳି ବର୍ବରତା ଘଟାଯାଇଛି। ନୀଳଗିରି ଥାନା ତଥା ଔପଦା ବ୍ଲକ ଦକ୍ଷିଣନରସିଂହପୁର ପଞ୍ଚାୟତ ଅଧୀନ ବାଇଗଡ଼ିଆ ଗାଁର ଦିଲୀପ ସିଂ (୩୦) ଚଷାଖଣ୍ଡ ଗାଁର ଶାନ୍ତି ସିଂ (୨୭)ଙ୍କୁ ବିବାହ କରିଥିଲେ। ସେମାନଙ୍କଠାରୁ ୨ଟି ପୁତ୍ର ସନ୍ତାନ ଜାତ ହୋଇଛନ୍ତି। ତେବେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ କୌଣସି କଥାକୁ କେନ୍ଦ୍ରକରି ମତାନ୍ତର ହୋଇଥିଲା। ଏନେଇ କିଛିଦିନ ପୂର୍ବରୁ ନୋଟାରୀରେ ବିବାହ ବିଛେଦ ନିମନ୍ତେ ମଧ୍ୟ ଆବେଦନ କରାଯାଇଛି। ସମ୍ପ୍ରତି ମହିଳା ଜଣକ ତାଙ୍କ ବାପଘରେ ରହୁଥିବା ଜଣାଯାଇଛି। କିନ୍ତୁ ଶନିବାର ରାତିରେ ସେ ଗାଁ ରାସ୍ତାରେ ଏକାକୀ ଚାଲୁଥିବା ସୁଯୋଗରେ ତାଙ୍କ ସ୍ୱାମୀ ଦିଲୀପ ଓ ବନ୍ଧୁ ମୁନ୍ନା ସିଂ ଦୁହେଁ ମିଶି ମହିଳାଙ୍କୁ ଟେକି ନେଇ ରାତିରେ ଅସଦାଚରଣ କରିଥିବା ଅଭିଯୋଗ ହୋଇଛି।
ଏପରିକି ତାଙ୍କ ସ୍ୱାମୀ ଜଣକ ତାଲିବାନୀ ଭଳି ସ୍ତ୍ରୀର ଚୁଟି କାଟି ଦେଇଥିବା ଜଣାଯାଇଛି। ଏହି ଚୁଟି କାଟିବା ଘଟଣାରେ ତାଙ୍କ ବନ୍ଧୁ ବ୍ଲେଡ ଓ କଇଁଚି ଯୋଗାଇଥିବା ନେଇ ମହିଳା ଜଣକ ନୀଳଗିରି ଥାନାରେ ଅଭିଯୋଗ କରିଛନ୍ତି। ସ୍ୱାମୀର ନିର୍ଯାତନା ସହି ନପାରି ବିବାହ ବିଛେଦ ହୋଇ ବାପଘରେ ରହୁଥିବା ଏହି ମହିଳାଙ୍କଠାରେ ଏଭଳି ବର୍ବରତା ଘଟାଇବା ସମ୍ପ୍ରତି ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ଖବର ଲେଖା ହେବା ବେଳକୁ ନୀଳଗିରି ଥାନାରେ ଉଭୟ ପକ୍ଷଙ୍କୁ ପୁଲିସ ପକ୍ଷରୁ ପଚରା ଉଚରା ଜାରି ରହିଥିବା ସୂଚନା ମିଳିଛି।
Comments are closed.