ଜୁଆ ଆଡ୍ଡା ଚଢ଼ାଉ, ୬ ଗିରଫ

ବଡ଼ସାହି: ମୟୂରଭଞ୍ଜ ଜିଲା ଏସପିଙ୍କ ନିର୍ଦ୍ଦେଶ କ୍ରମେ ବଡ଼ସାହି ପୁଲିସ ଶନିବାର ବିଳମ୍ବିତ ରାତିରେ ଏକ ଜୁଆ ଆଡ୍ଡାରେ ଚଢାଉ କରି ସଫଳତା ପାଇଛି। ଘଟଣାସ୍ଥଳରୁ ୬ ଜଣଙ୍କୁ ଗିରଫ କରିବା ସହିତ ସେମାନଙ୍କଠାରୁ ୯ଟି ବାଇକ, ନଗଦ ୨୯ହଜାର ୫୩୦ଟଙ୍କା ଓ ତାସପାଲି ଜବତ କରିଛି। ତେବେ ଘଟଣାସ୍ଥଳରୁ କେତେକ ବ୍ୟକ୍ତି ଫେରାର ହୋଇଯିବାରେ ସଫଳ ହୋଇଛନ୍ତି। ଜବତ ୯ଟି ବାଇକ ଥାନାକୁ ଅଣାଯିବା ସହିତ ଫେରାର ଅଭିଯୁକ୍ତଙ୍କ ସବିଶେଷ ବିବରଣୀ ସଂଗୃହୀତ ହୋଇଛି। ଫେରାରଙ୍କ ମଧ୍ୟରେ ବାରିପଦାର କିଛି ପେଷାଦାର ଜୁଆଡ଼ିଙ୍କ ନାମ ଥିବା ଚର୍ଚ୍ଚା ହେଉଛି। ଏ ସଂକ୍ରାନ୍ତରେ ଅବାଧ ଜୁଆଖେଳ ନେଇ ମାମଲା ରୁଜୁ ହୋଇଛି। ଏହି ମାମଲାରେ ଉଠାଣୀନୂଆଗାଁ ଗ୍ରାମର ସୁମନ୍ତ କୁମାର ପୃଷ୍ଟି, ଆନନ୍ଦ ବେହେରା, ବିଦେଶୀ ନାୟକ ଓ ନବ ବେହେରା, ଯଦୁନାଥପୁର ଗ୍ରାମର ଗୋପିନାଥ ବେହେରା ଓ ଖୁଣ୍ଟା ଥାନା ଅଧୀନ ଚୂନଡିହା ଗ୍ରାମର ରମେଶ ବେହେରାଙ୍କୁ ଗିରଫ କରାଯାଇଛି ବୋଲି ଭାରପ୍ରାପ୍ତ ଥାନାଧିକାରୀ ଅଶୋକ କୁମାର ନାୟକଙ୍କ ଠାରୁ ଜଣାପଡ଼ିଛି। ଏହି ଚଢାଉରେ ସବଇନି୍‍ସପେକ୍ଟର ଅଶୋକ କୁମାର ବାରିକ, ଏଏସ୍ଆଇ ମଞ୍ଜୁଲତା ବେହେରା ଓ ଡିପି ନାଏକଙ୍କ ସମେତ ଥାନାର ଅନ୍ୟ କର୍ମଚାରୀମାନେ ସାମିଲ ଥିଲେ।

Comments
Loading...