MEllora 950×100

ପୁରୁଷ ବନ୍ଧ୍ୟାକରଣ ସଚେତନତା କାର୍ଯ୍ୟକ୍ରମ ଉଦ୍‌ଯାପିତ

ଆଠଗଡ :  ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିନ ମେଘା ସେକ୍ଟରର ଗାଁ କଲ୍ୟାଣ ସମିତି ସମୂହ ଆନୁକୁଲ୍ୟରେ ୧୫ଦିନ ବ୍ୟାପି ଚାଲିଥିବା ପୁରୁଷ ବନ୍ଧ୍ୟାକରଣ (ଏନଏସଭି) ସଚେତନତା କାର୍ଯ୍ୟକ୍ରମ ରବିବାର ଧାଇପୁର ଓ ବେଣ୍ଟପଦା ଶବରସାହିରେ ଉଦ୍‌ଯାପିତ ହୋଇଯାଇଛି। ମେଘା ସେକ୍ଟର ଅନ୍ତର୍ଗତ ୩୩ଟି ଗାଁ କଲ୍ୟାଣ ସମିତି ମାଧ୍ୟମରେ ୪୪ଟି ଗ୍ରାମରେ ଏନଏସଭି ପକ୍ଷ ୨ଟି ପର୍ଯ୍ୟାୟରେ ଆୟୋଜିତ ହୋଇଥିବାବେଳେ ପ୍ରଥମ ପର୍ଯ୍ୟାୟ ନଭେମ୍ବର ୨୧ରୁ ୨୭ ତାରିଖ ସଚେତନତା ସପ୍ତାହ ଏବଂ ନଭେମ୍ବର ୨୮ରୁ ଡିସେମ୍ବର ୪ତାରିଖ ପର୍ଯ୍ୟନ୍ତ ସେବା ପ୍ରଦାନ ସପ୍ତାହ ରୂପେ ପାଳନ କରାଯାଇଥିଲା। ବ୍ରହ୍ମପୁର ସିଏଚସି ଅଧିକ୍ଷକ ଡାକ୍ତର ଦିଲ୍ଲୀପ ଦାସଙ୍କ ନିର୍ଦେଶକ୍ରମେ ରବିବାର ଆୟୋଜିତ ଉଦ୍‌ଯାପନୀ କାର୍ଯ୍ୟକ୍ରମ ସଂଯୋଜନା କରି ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ୍‌ ଅସ୍‌ଲମ୍‌ ପୁରୁଷମାନଙ୍କ ବନ୍ଧ୍ୟାକରଣ ଏକ ସହଜ, ଫଳପ୍ରଦ ଓ ସୁରକ୍ଷିତ ଜନ୍ମନିରୋଧ ଉପାୟ ବୋଲି ମତବ୍ୟକ୍ତ କରିଥିଲେ। ଏହି ବନ୍ଧ୍ୟାକରଣ ପ୍ରକ୍ରିୟାରେ ବେଶି କିଛି କଟାକଟି ବା ସିଲେଇର ଆବଶ୍ୟକତା ନାହିଁ କିମ୍ବା ଏହାର କୌଣସି ପାର୍ଶ୍ବ ପ୍ରତିକ୍ରିୟା ମଧ୍ୟ ନାହିଁ ବୋଲି ଶ୍ରୀ ଅସଲମ ସୂଚାଇଥିଲେ। ସେବା ଗ୍ରହଣକାରୀଙ୍କ ପାଇଁ ସରକାରଙ୍କ ପକ୍ଷରୁ ୨ହଜାର ଟଙ୍କାର ପ୍ରୋତ୍ସାହନ ରାଶି ଦିଆଯାଇଥାଏ। ଏହି ପଦ୍ଧତି ଗ୍ରହଣ କରିବା ପାଇଁ ନିକଟସ୍ଥ ସ୍ୱାସ୍ଥ୍ୟକେନ୍ଦ୍ର ଅଥବା ସ୍ୱାସ୍ଥ୍ୟକର୍ମୀ ଓ ଆଶାକର୍ମୀଙ୍କ ସହ ଯୋଗାଯୋଗ କରିବା ପାଇଁ ସେ ପରାମର୍ଶ ଦେଇଥିଲେ। ଏହି କାର୍ଯ୍ୟକ୍ରମରେ ମେଘା ସେକ୍ଟରର ସମସ୍ତ ସ୍ୱାସ୍ଥ୍ୟକର୍ମୀ, ସିଏଚଓ, ଆଶାକର୍ମୀ, ବହୁ ଦମ୍ପତ୍ତି ଏବଂ ଗାଁ କଲ୍ୟାଣ ସମିତିର ସଦସ୍ୟମାନେ ଯୋଗଦେଇଥିଲେ। ଏହି ଅବସରରେ ୬ଜଣ ପୁରୁଷଙ୍କୁ ଏନଏସଭି ପାଇଁ ସଚେତନ କରାଯିବା ସହ ସେମାନଙ୍କ ମଧ୍ୟରୁ ୨ଜଣଙ୍କୁ ଅସ୍ତ୍ରୋପଚାର ପାଇଁ ପଠାଯାଇଥିବା ଜଣାପଡିଛି। ଶେଷରେ ଏକ ସଚେତନତା ଶୋଭାଯାତ୍ରା ଗ୍ରାମ ପରିକ୍ରମା କରିଥିଲେ ।

Comments are closed.