ଜମିବାଡି ବିବାଦକୁ ନେଇ ଘରେ ପଶି ମରଣାନ୍ତକ ଆକ୍ରମଣ ଅଭିଯୋଗ

ଆଠଗଡ : ଆଠଗଡ ଥାନା ଅନ୍ତର୍ଗତ ରାଜନଗର ଗ୍ରାମରେ ମଙ୍ଗଳବାର ରାତିରେ ଜମିବାଡି ବିବାଦକୁ ନେଇ ଗୋଟିଏ ପରିବାରର ଲୋକ ଅନ୍ୟଏକ ପରିବାରର ସଦସ୍ୟଙ୍କୁ ଘର ମଧ୍ୟରେ ପଶି ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି। ଘଟଣାର ବିବରଣୀରୁ ପ୍ରକାଶ ଯେ ରାଜନଗର ଗ୍ରାମର ପବିତ୍ର ବର୍ମା ଓ ତାଙ୍କ ପଡୋଶୀ ସଂଜୟ ବର୍ମାଙ୍କ ମଧ୍ୟରେ ଜମିବାଡିକୁ ନେଇ ଗତ କିଛିଦିନ ହେବ ବିବାଦ ଲାଗି ରହିଥିଲା। ମଙ୍ଗଳବାର ରାତିରେ ସଂଜୟ ବର୍ମା ନିଜ ପରିବାର ବର୍ଗଙ୍କ ସହ ଖାଇପିଇ ଶୋଇ ପଡିଥିବାବେଳେ ବିଳମ୍ବିତ ରାତିରେ ପବିତ୍ର ବର୍ମା ଓ ତାଙ୍କ ୫ ପୁଅ ଘରର କବାଟ ଝରକା ଭାଙ୍ଗି ପଶିବା ସହିତ ସଂଜୟଙ୍କ ପରିବାରର ସଦସ୍ୟଙ୍କୁ ମରଣାନ୍ତକ ଆକ୍ରମଣ କରିଥିଲେ। ଘରର ଆସବାବପତ୍ର ଭଙ୍ଗାରୁଜା କରିବା ସହ ସୁନା ଅଳଙ୍କାର ଲୁଟି କରିବା ସହ ସଂଜୟଙ୍କ ଝିଅକୁ ଦୁଷ୍କର୍ମ କରିବାକୁ ଉଦ୍ୟମ କରିଥିବା ନେଇ ଆଠଗଡ ଥାନାରେ ଲିଖିତ ଅଭିଯୋଗ ହୋଇଛି। ଆକ୍ରମଣରେ ସଂଜୟ ଓ ତାଙ୍କ ପତ୍ନୀ ବିଳାସିନୀ ଗୁରୁତର ଆହତ ହୋଇଛନ୍ତି। ପାଟିତୁଣ୍ଡ ହୋ ହାଲ୍ଲା ଶୁଣି ଗ୍ରାମବାସୀ ପଳାଇ ଆସିବାରୁ ପବିତ୍ର ଓ ତାଙ୍କ ପୁଅମାନଙ୍କ ସହ ଆସିଥିବା ଆଉକିଛି ଗୁଣ୍ଡା ଶ୍ରେଣୀର ଯୁବ ସେଠାରୁ ଫେରାର ହୋଇଯାଇଥିଲେ। ଗ୍ରାମବାସୀଙ୍କ ଠାରୁ ସୂଚନା ପାଇଁ ଆଠଗଡ ପୁଲିସ ଘଟଣାସ୍ଥଳରେ ପହଞ୍ଚି ଗୁରୁତର ଆହତ ସଂଜୟ ଓ ବିଳାସିନୀଙ୍କୁ ଡାକ୍ତରଖାନା ଆଣିଥିଲେ। ଘଟଣାସ୍ଥଳରୁ ପୁଲିସ ୨ଟି ରକ୍ତ ଲଗା କଟୁରୀ ଓ ଟାଙ୍ଗିଆ ଜବତ କରି ତଦନ୍ତ ଜାରି ରଖିଛନ୍ତି।

Comments
Loading...