MEllora 950×100

ବିଦ୍ୟାଳୟ ପାଚେରୀ ଭାଙ୍ଗିବା ତିନିମାସ ବିତିଲା

ଅସୁରକ୍ଷିତ ଅବସ୍ଥାରେ କୋମଳମତି ଛାତ୍ରଛାତ୍ରୀ

ଆଠଗଡ: ଆଠଗଡ ସହରର ବୀରକିଶୋରପୁର ସରକାରୀ ପ୍ରାଥମିକ ବିଦ୍ୟାଳୟ ଟି ୬୫ନଂ ରାଜ୍ୟ ରାଜପଥ କଡରେ ରହିଥିବା ବେଳେ ଏହି ବିଦ୍ୟାଳୟର ସମ୍ମୁଖ ପ୍ରାଚୀରଟି ଗତ ପ୍ରାୟ ୩ମାସ ହେଲାଣି ସଂପୂର୍ଣ୍ଣ ଭାଙ୍ଗିପଡିଛି । ବିଦ୍ୟାଳୟରେ ଅଧ୍ୟୟନ କରୁଥିବା ୬୮ଜଣ କୋମଳମତି ବିଦ୍ୟାର୍ଥୀ ଅସୁରକ୍ଷିତ ଅବସ୍ଥାରେ ରହିଥିବାବେଳେ ପାଚେରୀ ପୁନଃନିର୍ମାଣ ପାଇଁ କୌଣସି ପଦକ୍ଷେପ ନିଆଯାଇନାହିଁ । ୧ମରୁ ୫ମ ପର୍ଯ୍ୟନ୍ତ ଶିକ୍ଷାଦାନ କରାଯାଉଥିବା ଏହି ବିଦ୍ୟାଳୟରେ ବୀରକିଶୋରପୁର ସମେତ କଙ୍ଗଡାସାହି, ମୈତୀନଗର ଓ ରାଧାପତିପୁର ଗ୍ରାମର ମୋଟ ୬୮ଜଣ ଛାତ୍ରଛାତ୍ରୀ ପାଠ ପଢୁଛନ୍ତି ।

ରାଜ୍ୟ ରାଜପଥର ଠିକ୍‍ କଡରେ ଲାଗି ରହିଥିବା ବିଦ୍ୟାଳୟର ପାଚେରୀ ଭାଙ୍ଗିବା ପରେ ବିଦ୍ୟାଳୟ ପରିସରଟି ସଂପୂର୍ଣ୍ଣ ମେଲା ପଡିଥିବାବେଳେ ପ୍ରତି ମୁହୂର୍ତ୍ତରେ କୋମଳମତି ପିଲାଙ୍କ ପାଇଁ ଦୁର୍ଘଟଣାର ଭୟ ରହୁଛି । ବିଦ୍ୟାଳୟର ଅନ୍ୟ ବହୁ ସମସ୍ୟା ରହିଥିବାବେଳେ ମୁଖ୍ୟ ସମସ୍ୟା ଏହି ପାଚେରୀ ଭାଙ୍ଗିବା ଯୋଗୁଁ ହୋଇଛି । ବିଦ୍ୟାଳୟରେ ପ୍ରଧାନଶିକ୍ଷୟିତ୍ରୀ ଅଗସ୍ତି ସେଠୀଙ୍କୁ ମିଶାଇ ମାତ୍ର ୨ଜଣ ଶିକ୍ଷୟିତ୍ରୀ ରହିଥିବାରୁ ୧ମରୁ ୩ୟ ପର୍ଯ୍ୟନ୍ତ ଗୋଟିଏ ଏବଂ ୪ର୍ଥ ଓ ୫ମ ଶ୍ରେଣୀର ଛାତ୍ରଛାତ୍ରୀ ଅନ୍ୟ ଏକ ଶ୍ରେଣୀକକ୍ଷରେ ପଢ଼ିବା ପାଇଁ ବାଧ୍ୟ ହେଉଛନ୍ତି । ଦୁଇଜଣ ଶିକ୍ଷୟିତ୍ରୀଙ୍କ ମଧ୍ୟରୁ ଜଣେ ଶିକ୍ଷୟିତ୍ରୀ ଶିକ୍ଷକ ଆନ୍ଦୋଳନରେ ଯୋଗଦେବା ପାଇଁ ଦୁଇ ଦିନ ହେବ ଛୁଟିରେ ରହିଥିବାରୁ ମାତ୍ର ଜଣେ ଶିକ୍ଷୟିତ୍ରୀ ଅର୍ଥାତ୍‍ ପ୍ରଧାନ ଶିକ୍ଷୟିତ୍ରୀ ୫ଟି ଯାକ ଶ୍ରେଣୀର ବିଦ୍ୟାର୍ଥୀଙ୍କ ପାଠପଢାଠାରୁ ଆରମ୍ଭ କରି ମଧ୍ୟାନ୍ନ ଭୋଜନ କାର୍ଯ୍ୟକ୍ରମ ପରିଚାଳନା କରୁଛନ୍ତି ।

ପିଲାମାନେ ସ୍କୁଲ ଆସିବା ଏବଂ ଛୁଟି ପରେ ଏକ ସଙ୍ଗରେ ସ୍କୁଲରୁ ବାହାରିବା ସମୟରେ ପାଚେରୀ ଭାଙ୍ଗିଥିବାରୁ ଶିକ୍ଷୟିତ୍ରୀ ଦୁଇଜଣ ଯେପରି କୌଣସି ଦୁର୍ଘଟଣା ନହେବ ସେଥିପାଇଁ ସତର୍କତା ଅବଲମ୍ବନ କରୁଛନ୍ତି । ପାଚେରୀ ଭାଙ୍ଗିବା ଘଟଣା ଏବଂ ନୂତନ ଭାବେ ପାଚେରୀ ନିର୍ମାଣ ପାଇଁ ପ୍ରଧାନ ଶିକ୍ଷୟିତ୍ରୀ ବ୍ଲକଶିକ୍ଷାଧିକାରୀ , ଏନଏସି ଅଧ୍ୟକ୍ଷା ଓ ସ୍ଥାନୀୟ ବିଧାୟକଙ୍କୁ ଲିଖିତ ଭାବେ ଅନୁରୋଧ କରିଛନ୍ତି । ବ୍ଲକଶିକ୍ଷାଧିକାରୀ ବିଜୟଲକ୍ଷ୍ମୀ ସାମଲ ଏ ସଂପର୍କରେ ଏନଏସି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିବା ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି ।

ସେହିପରି ଏନଏସି ଅଧ୍ୟକ୍ଷା ସସ୍ମିତା ରାଉତ ବିଦ୍ୟାଳୟର ପାଚେରୀ ଭାଙ୍ଗିବା ବିଷୟରେ ଜାଣିଛନ୍ତି ଏବଂ ଏଥିପାଇଁ ଆବଶ୍ୟକୀୟ ଅର୍ଥ ବରାଦ କରି ଆସନ୍ତା ସପ୍ତାହକ ମଧ୍ୟରେ ଉକ୍ତ ବିଦ୍ୟାଳୟର ପାଚେରୀ ନିର୍ମାଣ ଆରମ୍ଭ କରାଯିବ ବୋଲି ତାଙ୍କ ପ୍ରତିକ୍ରିୟାରେ କହିଛନ୍ତି । ପିଲାଙ୍କ ସୁରକ୍ଷାକୁ ଦୃଷ୍ଟିରେ ରଖି ଯଥାଶୀଘ୍ର ବିଦ୍ୟାଳୟର ପାଚେରୀ ନିର୍ମାଣ ସହିତ ଅତିକମ୍‍ରେ ଆଉଜଣେ ଶିକ୍ଷକ ବା ଶିକ୍ଷୟିତ୍ରୀ ଉକ୍ତ ସ୍କୁଲରେ ନିଯୁକ୍ତ କରିବା ପାଇଁ ନିବେଦନ କରିଛନ୍ତି ।

Comments are closed.