MEllora 950×100

ଗୃହରେ ଅର୍ଚ୍ଚନା ଝଡ଼

ମୁଖ୍ୟମନ୍ତ୍ରୀ ଅପରାଧୀଙ୍କୁ ସୁରକ୍ଷା ଦେଉଛନ୍ତି ଅଭିଯୋଗ ଭିତ୍ତିହୀନ: ଗୃହରା‌ଷ୍ଟ୍ର ମନ୍ତ୍ରୀ

ଭୁବନେଶ୍ୱର : ସାରା ରାଜ୍ୟରେ ଏବେ ଗୋଟିଏ ଚର୍ଚ୍ଚା। ଅର୍ଚ୍ଚନା ନାଗ ଦମ୍ପତିଙ୍କ ପେଡ଼ିରେ ୬୪ ନେତା, ମନ୍ତ୍ରୀ, ଅଧିକାରୀ, ବ୍ୟବସାୟୀ ରହିଛନ୍ତି। ତାଙ୍କ ଇ-ମେଲରେ ସମସ୍ତଙ୍କ ଫଟୋ ବୁଲୁଛି, ହେଲେ କମିସନରେଟ ପୁଲିସ ଏପର୍ଯ୍ୟନ୍ତ ତାଙ୍କ ନିକଟରେ ପହଞ୍ଚି ପାରୁନାହିଁ। ରାଜ୍ୟ ସରକାର ଅପରାଧୀଙ୍କ ସୁରକ୍ଷାଦାତା ପାଲଟିଛନ୍ତି। ଇଡିକୁ ରାଜ୍ୟ ପୁଲିସ ସହଯୋଗ କରୁନି। ନାଗ ଦମ୍ପତିଙ୍କ ଘଟଣାରେ ଆରମ୍ଭରୁ ନିଜ ଅଧିକାରୀ ଓ ନେତାକୁ ରାଜ୍ୟ ସରକାର ଲୁଚାଇ ରଖିଛନ୍ତି। ଅର୍ଚ୍ଚନାର ଘରେ ସରକାରୀ କାର୍ଯ୍ୟର ଟେଣ୍ଡର ଫିକ୍ସିଂ ଓ ଠିକାଦାରୀର ନିଷ୍ପତ୍ତି ହେଉଥିଲା। ଏଥିରୁ ଅର୍ଚ୍ଚନା କଳାସାମ୍ରାଜ୍ୟ ପଛରେ ରାଜ୍ୟ ସରକାରଙ୍କ ସଂପୃକ୍ତି ଥିବା ପ୍ରମାଣ ମିଳୁଛି କହି ବିରୋଧୀ ବିଜେପି ଓ କଂଗ୍ରେସ ମୁଲତବୀ ଆଲୋଚନାକାଳରେ ଏଭଳି ପ୍ରଶ୍ନବାଣରେ ରାଜ୍ୟ ସରକାରଙ୍କୁ ଘେରିଥିଲେ। ଅନ୍ୟପକ୍ଷରେ ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ରାଜ୍ୟ ସରକାର ଅପରାଧୀଙ୍କୁ ସୁରକ୍ଷା ଦେଉଥିବା କଥା ସଂପୂର୍ଣ୍ଣ ଭିଭିହୀନ ଏବଂ ଅସତ୍ୟ ବୋଲି କହିଥିଲେ। ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ବ୍ୟକ୍ତ କରି ବିରୋଧୀ ବିଜେପି ଓ କଂଗ୍ରେସ କକ୍ଷତ୍ୟାଗ କରିଥିଲେ।
ସୋମବାର ଗୃହରେ ‘ସବୁଠି ଏବେ ଗୋଟିଏ କଥା , ସରକାର ଅପରାଧୀଙ୍କ ସୁରକ୍ଷାଦାତା , କୋଟିଏରୁ ଗୋଟିଏ ଅର୍ଚ୍ଚନା ନାଗ ଅପରାଧ ଖିଅଟିଏ’ ମୁଲତବୀ ଆଲୋଚନା ଆରମ୍ଭ କରି ବିରୋଧୀଦଳ ମୁଖ୍ୟ ସଚେତକ ମୋହନ ମାଝି କହିଥିଲେ ଯେ, ଅର୍ଚ୍ଚନାର କଳାସାମ୍ରାଜ୍ୟ ପଛରେ ଓଡିଶାର ବଡ଼ବଡିଆ ବାବୁ, ମନ୍ତ୍ରୀ, ବିଧାୟକ, ରାଜନେତା, ବ୍ୟବସାୟୀ ଓ ପୁଲିସ ବିଭାଗର ବଡ଼ ଅଧିକାରୀ ସଂପୃକ୍ତ ରହିଥିବା ଜଣାଯାଇଛି। ନାଗ ଦମ୍ପତିଙ୍କ ମେଲ ଆଇଡିରୁ ବିଜେଡିର ୬୪ଜଣ ନେତାଙ୍କ ଫଟୋ ସହ ୫ଟି ଡାଏରି, ୪ଟି ଲାପଟପ ଭଳି ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଛି। କିନ୍ତୁ ପୁଲିସ ନାଗ ଦମ୍ପତି ବିରୋଧରେ କାର୍ଯ୍ୟାନୁଷ୍ଠାନ ନନେଇ ତାଙ୍କୁ ଖସେଇ ଦେବାର ଉଦ୍ୟମ କରୁଛି। ଏନେଇ ମୁଖ୍ୟମନ୍ତ୍ରୀ ଚୁପ୍‌ ରହିବା କେତେଦୂର ଉଚିତ ବୋଲି ଶ୍ରୀ ମାଝି ପ୍ରଶ୍ନ କରିଥିଲେ।
ଶାସକ ଦଳର ବିଧାୟକଙ୍କୁ ଇଡି ଡାକୁଥିବାବେଳେ ରାଜ୍ୟ ସରକାର ତାଙ୍କୁ ଘଣ୍ଟ ଘୋଡାଉଛନ୍ତି। ଇଡିକୁ ଯେଉଁଭଳି ଓଡ଼ିଶା ପୁଲିସ ସହଯୋଗ କରିବା କଥା ତାହା କରୁନାହିଁ। ରାଜ୍ୟ ସରକାରଙ୍କ ମନ୍ତ୍ରୀ, ନେତା ଓ ବିଧାୟକ ଯଦି ସ୍ୱଚ୍ଛ ତାହାହେଲେ ମୁଖ୍ୟମନ୍ତ୍ରୀ ଗୃହକୁ ଆସି ଉତ୍ତର ରଖନ୍ତୁ ବୋଲି ଶ୍ରୀ ମାଝି ଦାବି କରିଥିଲେ। ବିଧାୟକ କେ. ନାରାୟଣ ରାଓ, ବିଧାୟକ ସନାତନ ବିଜୁଳି ଆଲୋଚନାରେ ଭାଗନେଇ ସରକାରଙ୍କୁ କଡ଼ା ସମାଲୋଚନା କରିଥିଲେ।
ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ସିଧାସଳଖ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିଶାଣ କରି କହିଥିଲେ ଯେ, ମୁଖ୍ୟମନ୍ତ୍ରୀ କାହିଁକି ଅର୍ଚ୍ଚନା ଘଟଣାରେ ନିରବ । କ’ଣ ବ୍ଲାକମେଲ୍ ହୋଇଛି ତାହା ଜାଣିବାକୁ ସମସ୍ତେ ଚାହୁଁଛନ୍ତି । ଏହି ଘଟଣାରେ ଅନେକ ବଡ଼ବଡ଼ିଆ ସମ୍ପୃକ୍ତ ଓ ଫଟୋ ଥିଲେ ମଧ୍ୟ ପୁଲିସ ଥରୁଟିଏ ବି ସେମାନଙ୍କୁ ଡାକି ନାହିଁ । ଘଟଣାକୁ ଚାପି ଦେବାକୁ ଉଦ୍ୟମ କରାଯାଉଛି । ନୂଆପଲ୍ଲୀ ଓ ଖଣ୍ଡଗିରି ଥାନାରେ ଦୁଇଟି ମାମଲା ରୁଜୁ ହୋଇଥିଲେ ମଧ୍ୟ କେଉଁ ଦଫାରେ ଏହି କେସ୍ ହୋଇଛି ସେ କଥା ମନ୍ତ୍ରୀ କହିନାହାନ୍ତି । ପୁଲିସ ତଦନ୍ତରେ ଯାହାଙ୍କୁ ଛାଡ଼ିଥିଲା, ଇଡି ସେମାନଙ୍କୁ ଗିରଫ କରୁଛି । ୨୦କୋଟି ଟଙ୍କାର ଆଇଟି ଦୁର୍ନୀତି ହୋଇଥିବା ଅଭିଯୋଗ ହେଉଛି । ଏହି ସମ୍ବେଦନଶୀଳ ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀ ଖାମଖିଆଲି ଢଙ୍ଗରେ ଉତ୍ତର ରଖୁଛନ୍ତି।
ସରକାରୀ ଦଳର ବରିଷ୍ଠ ବିଧାୟକ ଅମରପ୍ରସାଦ ଶତପଥୀ କହିଥିଲେ ଯେ,ଅପରାଧୀଙ୍କ କଥା ଉଠିଲେ ସିଏ ଶାସକଦଳ କିମ୍ବା ବିରୋଧୀଦଳ ସେକଥା ବିଚାର କରାଯାଏ ନାହିଁ। ଯିଏ ଅପରାଧ କରିଛି ତା’ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ରାଜ୍ୟ ସରକାରଙ୍କ ନିର୍ଦେଶ ରହିଛି। ବିରୋଧୀ ଯେଉଁ ଫଟୋ କଥା କହୁଛନ୍ତି , ଫଟୋକୁ ଆଧାର କରି କାହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବ ନାହିଁ। ତଦନ୍ତ ଆଧାରରେ ହିଁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ବିଧାୟିକା ମୀନାକ୍ଷୀ ମହନ୍ତ ଓ ରାଜ କିଶୋର ଦାସ ଆଲୋଚନାରେ ଭାଗ ନେଇ ରାଜ୍ୟରେ ଯେଉଁ ମାମଲା ପଞ୍ଜୀକରଣ ହାର ବଢ଼ୁଛି ତାହା କେବଳ ମୁଖ୍ୟମନ୍ତ୍ରୀଙ୍କ ନିର୍ମଳ ଭାବମୂର୍ତ୍ତି ଓ ପୁଲିସ ପ୍ରଶାସନ ଉପରେ ଲୋକଙ୍କ ବିଶ୍ବାସ ଲାଗି ବଢ଼ୁଛି ବୋଲି କହିଥିଲେ।
ବିରୋଧୀଙ୍କୁ ଜବାବ ଦେଇ ଗୃହ ରାଷ୍ଟ୍ରମନ୍ତ୍ରୀ ଶ୍ରୀ ବେହେରା କହିଥିଲେ ଯେ, ରାଜ୍ୟ ସରକାର ଅପରାଧୀଙ୍କୁ କେବେ ସୁରକ୍ଷା ଦେଇନାହାନ୍ତି । ଆଇନ ସମସ୍ତଙ୍କ ଉର୍ଦ୍ଧ୍ବରେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଇନର ଶାସନକୁ ସବୁବେଳେ ଗୁରୁତ୍ବ ଦେଇ ଆସିଛନ୍ତି । ଅପରାଧୀ ଯେକେହି ହେଉନା କାହିଁକି ବା ଯେତେ ପ୍ରଭାବଶାଳୀ ହେଉ ଆଇନାନୁସାରେ ତା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ଅର୍ଚ୍ଚନା ମାମଲାରେ ଖଣ୍ଡଗିରି ଥାନାରେ ଅକ୍ଟୋବର ୨ ଓ ନୂଆପଲ୍ଲୀ ଥାନାରେ ସେପ୍ଟେମ୍ବର ୨୯ରେ ମାମଲା ରୁଜୁ ହୋଇଛି । ଅର୍ଚ୍ଚନା ଓ ଜଗବନ୍ଧୁ ଚାନ୍ଦଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଏହି ଦୁଇଟି ମାମଲାର ତଦନ୍ତ ଜାରି ରହିଛି। ତଦନ୍ତ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ମନ୍ତ୍ରୀ ଗୃହକୁ ଜଣାଇଥିଲେ। ମାତ୍ର ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ପ୍ରକାଶ କରି ବିରୋଧୀ କଂଗ୍ରେସ ଓ ବିଜେପି କକ୍ଷତ୍ୟାଗ କରିଥିବା ଦେଖିବାକୁ ମିଳିଥିଲା।

Comments are closed.