‘ଦବଙ୍ଗ-୩’: ସଲମାନଙ୍କୁ ଏଏସ୍‍ଆଇର ନୋଟିସ୍‍

ମୁମ୍ବଇ : ବଲିଉଡ଼ ଅଭିନେତା ସଲମାନ୍‍ ଖାନ୍‍ ତାଙ୍କ ଆଗାମୀ ଚଳଚ୍ଚିତ୍ର ‘ଦବଙ୍ଗ-୩’ର ଶୁଟିଂକୁ ନେଇ ଏବେ ଅଡ଼ୁଆରେ ଫଶି ଯାଇଛନ୍ତି। ମଧ୍ୟପ୍ରଦେଶରେ ଚଳଚ୍ଚିତ୍ରର ଶୁଟିଂ ଚାଲିଥିବା ବେଳେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା(ଏଏସ୍‍ଆଇ) ସଲମାନଙ୍କ ସମେତ ଚଳଚ୍ଚିତ୍ରର ସମ୍ପୂର୍ଣ୍ଣ ଟିମକୁ ନୋଟିସ୍‍ ଜାରି କରିଛି। ମଧ୍ୟପ୍ରଦେଶର ମାଣ୍ଡୁ ସ୍ଥିତ ଐତିହାସିକ ଜଲ ମହଲରେ ନିର୍ମାଣ କରିଥିବା ୨ଟି ଶୁଟିଂ ସେଟ୍‍କୁ ହଟାଇବାକୁ ସଲମାନ ଓ ତାଙ୍କ ଟିମକୁ ଏଏସ୍‍ଆଇ ପକ୍ଷରୁ ନିର୍ଦ୍ଦେଶ ଦିଆଯାଇଛି। ନୋଟିସରେ ଏହା ମଧ୍ୟ ଉଲ୍ଳେଖ ରହିଛି ଯେ, ଚଳଚ୍ଚିତ୍ର ନିର୍ମାତା ଯଦି ଏହି ଆଦେଶ ନମାନିବେ ତେବେ ଶୁଟିଂ ବାତିଲ ମଧ୍ୟ କରାଯାଇପାରେ।

ସୂଚନା ଅନୁସାରେ, ପ୍ରଡକ୍ସନ ହାଉସକୁ ଏ ବିଷୟରେ ପୂର୍ବରୁ ଅବଗତ କରାଯାଇଥିଲା। କିନ୍ତୁ ତାଙ୍କ ତରଫରୁ କୌଣସି ପଦକ୍ଷେପ ନିଆଗଲା ନାହିଁ। ଏଏସ୍‍ଆଇର ନୋଟିସ୍‍ ଅନୁସାରେ, ଚଳଚ୍ଚିତ୍ରର ସଦସ୍ୟମାନେ ସେଠାରେ ଶୁଟିଂ ସେଟ୍‍ ନିର୍ମାଣ କରି ପ୍ରାଚୀନ ସ୍ମାରକ ଏବଂ ପ୍ରତ୍ନତାତ୍ତ୍ବିକ ସ୍ଥଳ ଓ ଅବଶେଷ ଆଇନ ୧୯୫୯ର ଉଲ୍ଲଂଘନ କରିଛନ୍ତି। ଏହାବ୍ୟତୀତ ନର୍ମଦା ନଦୀ ନିକଟସ୍ଥ ଏକ ଦୁର୍ଗର ପ୍ରାଚୀନ ମୂର୍ତ୍ତିକୁ କ୍ଷତି ପହଞ୍ଚଇଥିବା ନେଇ ଚଳଚ୍ଚିତ୍ରର ଟିମ୍‍ ବିରୋଧରେ ପୂର୍ବରୁ ଅଭିଯୋଗ ହୋଇଥିଲା। ଶୁଟିଂ ସମୟରେ ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତିଙ୍କ କହିବା ଅନୁସାରେ ଦୁର୍ଗରୁ ସେଟ୍‍ ହଟାଇବା ସମୟରେ ସେଠାରେ ଥିବା ଏକ ପ୍ରାଚୀନ ମୂର୍ତ୍ତି କ୍ଷତିଗ୍ରସ୍ତ ହୋଇଥିଲା। ଏହାପୂର୍ବରୁ ଶୁଟିଂ ସେଟରେ ଥିବା ଏକ ଶିବଲିଙ୍ଗକୁ ନେଇ ମଧ୍ୟ ବିବାଦ ଦେଖା ଦେଇଥିଲା।

ଉଲ୍ଲେଖଯୋଗ୍ୟ, ‘ଦବଙ୍ଗ-୩’ରେ ସଲମାନ ଓ ସୋନାକ୍ଷୀଙ୍କ ଯୋଡ଼ି ପୁଣିଥରେ ଦେଖିବାକୁ ମିଳିବ। ଏହାର ନିର୍ଦ୍ଦେଶନା ଭାର ପ୍ରଭୁଦେବା ବହନ କରିଛନ୍ତି। ଖବର ଅନୁସାରେ ଏହି ଚଳଚ୍ଚିତ୍ର ଚଳିତ ବର୍ଷ ଡିସେମ୍ବର ମାସରେ ମୁକ୍ତିଲାଭ କରିବ।

Comments
Loading...