ପାକ୍ ସେନାର ଅସ୍ତ୍ରବିରତି ଉଲଙ୍ଘନ : ଜଣେ ଭାରତୀୟ ଜବାନ ଶହୀଦ, ୬ରୁ ଅଧିକ ପାକ୍ ଘାଟି ଧ୍ବସଂ

ଶ୍ରୀନଗର : ପାକିସ୍ତାନୀ ସୈନ୍ୟମାନେ ଗତ ୨୪ ଘଣ୍ଟା ଧରି ଅସ୍ତ୍ରବିରତି ଉଲଙ୍ଘନ କରି ପୁଞ୍ଚ୍ ଏବଂ ବାଲାକୋଟ ସେକ୍ଟରରେ ଗୁଳିଗୋଳା ବର୍ଷଣ ଜାରି ରଖିଛନ୍ତି । ଶନିବାର ଠାରୁ ଜାମ୍ମୁ କାଶ୍ମୀରର ପୁଞ୍ଚ୍‍ ଜିଲ୍ଲା ସୀମାନ୍ତ ଇଲାକାର ଆବାସିକ ଅଞ୍ଚଳ ଓ ଆଗୁଆ ଘାଟିଗୁଡ଼ିକୁ ଲକ୍ଷ୍ୟ କରି ସେମାନେ ଗୁଳିଗୋଳା ବର୍ଷଣ କରିଛନ୍ତି। ଏହାର କଡ଼ା ଜବାବ ଦେଇ ଭାରତୀୟ ଜବାନମାନେ ପାଲଟା ଆକ୍ରମଣ କରି ପାକିସ୍ତାନର ୬ରୁ ଅଧିକ ଘାଟିକୁ ଧ୍ବସଂ କରି ଦେଇଛନ୍ତି। ଗୁଳି ବିନିମୟରେ ପାକିସ୍ତାନର ୪ ଜଣ ସୈନିକଙ୍କର ମୃତ୍ୟୁ ଘଟିଛି। ପାକିସ୍ତାନୀ ଘାଟିରୁ ବାହାରୁଥିବା ଧୁମ୍ର କୁଣ୍ଡଳୀ ପୁଞ୍ଚ୍ ଆକାଶରେ ଦେଖିବାକୁ ମିଳିଛି।
ଅନ୍ୟପକ୍ଷରେ ଶନିବାର ପାକ୍ ସୈନ୍ୟଙ୍କ ଗୁଳି ବିନିମୟରେ ଜଣେ ଭାରତୀୟ ଜବାନ ଶହୀଦ ହୋଇଥିବା ବେଳେ ଅନ୍ୟ ତିନିଜଣ ଜବାନ ଆହତ ହୋଇଛନ୍ତି।
ପ୍ରତିରକ୍ଷା ମୁଖପାତ୍ରଙ୍କ ଲେଫ୍ଟନାଣ୍ଟ କର୍ଣ୍ଣେଲ ଦେବେନ୍ଦ୍ର ଆନନ୍ଦଙ୍କ କହିବା ଅନୁସାରେ ଶନିବାର ଅପରାହ୍ଣରେ ପାକିସ୍ତାନୀ ସୈନ୍ୟମାନେ ପୁଞ୍ଚ୍‍ ଜିଲ୍ଲାର ଦେଗୱାର୍‍ ସେକ୍ଟର ଏବଂ ବାଲାକୋଟ ସେକ୍ଟରରେ ଉପରେ ଆଖିବୁଝା ଗୁଳିଗୋଳା ଓ ମୋର୍ଟାର ଆକ୍ରମଣ କରିଥିଲେ। ଯାହା ରବିବାର ଅପରାହ୍ଣ ପର୍ଯ୍ୟନ୍ତ ଜାରି ରହିଥିଲା।
ପ୍ରତିରକ୍ଷା ମୁଖପାତ୍ର କହିଛନ୍ତି, ଭାରତୀୟ ଶହୀଦ ଜବାନ ଜଣଙ୍କ ହେଉଛନ୍ତି ନାୟକ ରାଜୀବ ସିଂହ ଶେଖାୱତ ଓ ତାଙ୍କ ଘର ରାଜସ୍ଥାନରେ। ସେ ପୁଣି କହିଛନ୍ତି ସୀମାରେ ପହରା ଦେଉଥିବା ଭାରତୀୟ ଜବାନମାନେ ପାଲଟା ଆକ୍ରମଣ କରି ପିଓକେର ଚିଡିକୋଟ ଅଞ୍ଚଳରେ ମୁତୟନ ପାକ୍ ସେନାର ୪୧ ସିନ୍ଧ ରେଜିମେଣ୍ଟର ଅଧା ଡଜନରୁ ଅଧିକ ଘାଟିକୁ ଧ୍ବଂସ କରିଦେଇଛନ୍ତି।

Comments
Loading...