ଅଭିନେତ୍ରୀ ତାନ୍ୟା ରବର୍ଟ୍ସଙ୍କ ପରଲୋକ

ଆମେରିକାର ଜଣାଶୁଣା ଅଭିନେତ୍ରୀ ତାନ୍ୟା ରବର୍ଟ୍ସଙ୍କ ପରଲୋକ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୬୫ ବର୍ଷ ହୋଇଥିଲା। ଗତ ଡିସେମ୍ବର ୨୫ ତାରିଖ ସନ୍ଧ୍ୟାରେ ତାଙ୍କ କୁକୁରକୁ ବୁଲାଇବାକୁ ବାହାରକୁ ନେଇଥିଲେ। ଘରକୁ ଫେରିବା ପରେ ସେ ଚେତାଶୂନ୍ୟ ହୋଇ ତଳେ ପଡ଼ିଯାଇଥିଲେ। ଶରୀରରେ ଗୁରୁତର ଆଘାତ ଯୋଗୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।

ତେବେ ତାନ୍ୟାଙ୍କ ମୃତ୍ୟୁକୁ ନେଇ ଅନେକ ଭ୍ରମ ସୃଷ୍ଟି ହୋଇଥିଲା। ଗତ ରବିବାର ତାଙ୍କର ମୃତ୍ୟୁ ହୋଇଥିବା ଘୋଷଣା କରାଯାଇଥିଲା। କିନ୍ତୁ ତାଙ୍କ ପ୍ରତିନିଧି ମାଇକ୍‌ ପିଙ୍ଗଲ କହିଥିଲେ ଯେ ସେ ଲସ୍‌ ଏଞ୍ଜେଲ୍ସର ଏକ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ତାଙ୍କ ଅବସ୍ଥା ଗମ୍ଭୀର ରହିଛି। ଏହାକୁ ନେଇ ଦ୍ବନ୍ଦ୍ବ ଉପୁଜିଥିଲା। କିନ୍ତୁ ତାଙ୍କର ମୃତ୍ୟୁ ଘଟିଥିବା ସ୍ପଷ୍ଟ ହୋଇଛି।

ଜଣେ ମଡେଲ ଭାବେ ତାନ୍ୟା ନିଜର କ୍ୟାରିୟର ଆରମ୍ଭ କରିଥିଲେ। ୭୦ ଦଶକରେ ନିଜର ଅଭିନୟ ପାଇଁ ସେ ବେଶ ଚର୍ଚ୍ଚିତ ଥିଲେ। ଏହି ସମୟର ଲୋକପ୍ରିୟ ଶୋ ଚାର୍ଲିଜ୍‌ ଏଞ୍ଜେଲ୍ସ ଏବଂ ଜେମ୍‌ସ ବଣ୍ଡ ଫ୍ରାଞ୍ଚାଇଜିରେ ତାଙ୍କର ଭୂମିକା ପାଇଁ ସେ ଖୁବ୍‌ ଜଣାଶୁଣା ଥିଲେ। ୧୯୮୫ରେ ଜେମ୍‌ସ ବଣ୍ଡ ଫିଲ୍ମ ‘ଏ ଭ୍ୟୁ ଟୁ ଏ କିଲ୍‌’ରେ ସେ ଅଭିନୟ କରିଥିଲେ। ଏଥିରେ ସେ ଜଣେ ଆମେରିକୀୟ ବୈଜ୍ଞାନିକ ଷ୍ଟେସୀ ସୌଟନଙ୍କ ଭୂମିକାରେ ଅବତୀର୍ଣ୍ଣ ହୋଇଥିଲେ।