ସଲମନଙ୍କ ବଙ୍ଗଳାରେ କ୍ରାଇମବ୍ରାଞ୍ଚର ଚଢାଉ; ୨୯ ବର୍ଷରୁ ଫେରାର ଥିବା ଅଭିଯୁକ୍ତ ଗିରଫ

ମୁମ୍ବଇ: ବଲିଉଡର ଦବଙ୍ଗ ଖାନ୍‌ଙ୍କ ବଙ୍ଗଳାରେ ଚଢାଉ କରି ମୁମ୍ବଇ ପୁଲିସ ୨୯ ବର୍ଷରୁ ଫେରାର ଆସାମୀକୁ ଗିରଫ କରିଛି। ମିଳିଥିବା ସୂଚନା ଅନୁଯାୟୀ, ସଲମାନ ଖାନଙ୍କ ଗୋରାଇସ୍ଥିତ ବଙ୍ଗଳାରୁ ୬୨ ବର୍ଷୀୟ ଫେରାର ଆସାମୀ ସିଦ୍ଧେଶ୍ବର ରାଣାକୁ ପୁଲିସ ବୁଧବାର ଗିରଫ କରିଛି। ଅଭିଯୁକ୍ତ ଜଣଙ୍କ ଦୀର୍ଘ ୨୦ବର୍ଷ ଧରି ସଲମନଙ୍କ ବଙ୍ଗଳାର ତଦାରଖ କରୁଥିଲା। ଗୁପ୍ତ ସୂଚନା ଆଧାରରେ ପୁଲିସ ଓ କ୍ରାଇମବ୍ରାଞ୍ଚ ମିଳିତ ଭାବରେ ଚଢାଉ କରି ଅଭିଯୁକ୍ତକୁ ଗିରଫ କରିଛି।

ପୁଲିସକୁ ଦେଖି ଅଭିଯୁକ୍ତ ରାଣା ସେଠାରୁ ଖସି ପଳାଇବାକୁ ଉଦ୍ୟମ କରୁଥିଲା। ହେଲେ ଏଥିରେ ସେ ବିଫଳ ହୋଇଥିଲା। କାରଣ ସଲମନଙ୍କ ବଙ୍ଗଳାକୁ ଚାରି ଦିଗରୁ ପୁଲିସ ଘେରି ରହିଥିଲା। ଫଳରେ ତାକୁ ଗିରଫ କରିବା ପୁଲିସ ପାଇଁ ସହଜ ହୋଇଥିଲା।

ପୁଲିସ ସୂଚନା ଅନୁଯାୟୀ, ୧୯୯୦ ମସିହାରେ ଏକ ଚୋରି ମାମଲାରେ ଅଭିଯୁକ୍ତ ରାଣା ଓ ତାର ସହଯୋଗୀ ଗିରଫ ହୋଇଥିଲେ। ସେମାନେ ଜାମିନରେ ମୁକୁଳିବା ପରେ ପୁଲିସକୁ ଚକମା ଦେଇ ଲୁଚି ବୁଲୁଥିଲେ। ଅଭିଯୁକ୍ତ ରାଣା ଏକ ବିଳାସପୂର୍ଣ୍ଣ ବଙ୍ଗଳାରେ ରହୁଥିବା ନେଇ ଦୁଇ ଦିନ ପୂର୍ବରୁ ପୁଲିସକୁ ସୂଚନା ମିଳିଥିଲା। ପରେ ସେହି ବଙ୍ଗଳା ବଲିଉଡ୍ ସୁପରଷ୍ଟାର ସଲମନ ଖାନ୍‌ଙ୍କ ବଙ୍ଗଳା ବୋଲି ଜଣାପଡିଥିଲା। କିନ୍ତୁ ସଲମାନ ଖାନ୍‌ଙ୍କୁ ଏବିଷୟରେ କିଛି ନଜଣାଇ ମୁମ୍ବଇ ପୁଲିସ ଓ କ୍ରାଇମବ୍ରାଞ୍ଚ ତାଙ୍କ ବଙ୍ଗଳାରେ ଚଢାଉ କରି ଅଭିଯୁକ୍ତକୁ ଗିରଫ କରିଥିଲା। ଅଭିଯୁକ୍ତ ରାଣା କେବେଠାରୁ ଏବଂ କାହା ମାଧ୍ୟମରେ ବଙ୍ଗଳାରେ ରହି କାମ କରୁଥିଲା ସେନେଇ ସଲମନଙ୍କୁ ପୁଲିସ ପଚରାଉଚରା କରିବ।