MEllora 950×100

ସିଇଓଙ୍କୁ ଭେଟି ଦୁଇ ଦଳ ପ୍ରତିନିଧିଙ୍କ ଫେରାଦ

ଭୁବନେଶ୍ୱର/ପଦ୍ମପୁର : ବିଧିବଦ୍ଧ ଭାବେ ନିର୍ବାଚନ ପ୍ରଚାର ସରିବା ପରେ ମଧ୍ୟ ବିଜୁ ଜନତା ଦଳ ଅନୈତିକ କାମରୁ ନିବୃତି ହୋଇନାହିଁ। ପଦ୍ମପୁରର ବିଭିନ୍ନ ଅଞ୍ଚଳରେ ବିଜେଡି ଟଙ୍କା ବାଣ୍ଟୁଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଜଗଦଲପୁର ଥାନା ଅଧୀନ ସରେଇକେଲା ଅଞ୍ଚଳରେ ବିଜେଡି ପ୍ରାର୍ଥୀ ବର୍ଷା ସିଂ ବରିହାଙ୍କ ଭାଇ ଭୋଜରାଜ ସିଂ ବରିହା ଟଙ୍କା ବାଣ୍ଟିବା ଏବଂ ଏକ ଗାଡିରେ ଖସି ପଳାଇବାବେଳେ ପୁଲିସ ଏଥିରେ ନିରବଦ୍ରଷ୍ଟା ସାଜିବା ଭିଡିଓ ଗଣମାଧ୍ୟମରେ ପ୍ରସାରିତ ହେଉଛି। ସେହିପରି ପଦ୍ମପୁର ବାରିକେଲ ପଞ୍ଚାୟତର ଚିତାଖୋଲ ଗାଁ ଓ ପାଇକମାଳ ବ୍ଲକର କାସଡା ଓ ନୀଳାଥର ପଞ୍ଚାୟତରେ ଭୋଟରଙ୍କୁ ବିଜେଡି କର୍ମୀ ଟଙ୍କା ଦେଇ ଭୋଟ ହାତେଇବାର ହୀନଚକ୍ରାନ୍ତ କରୁଛି। ହାରିବା ଭୟରେ ବିଜୁ ଜନତା ଦଳ ପଦ୍ମପୁରବାସୀଙ୍କୁ ଟଙ୍କା ଦେଇ ଭୋଟ ହାତେଇବାର ଅପଚେଷ୍ଟା କରୁଛି। ଶନିବାର ବିଜେପି ରାଜ୍ୟ ସାଧାରଣ ସଂପାଦିକା ଲେଖାଶ୍ରୀ ସାମନ୍ତସିଂହାରଙ୍କ ନେତୃତ୍ବରେ ବିଜେପିର ଏକ ପ୍ରତିନିଧି ଦଳ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ(ସିଇଓ)ଙ୍କୁ ଭେଟି ଏଭଳି ଅଭିଯୋଗ କରିଛନ୍ତି।
ପଦ୍ମପୁର ବ୍ଲକ ବାରିହାପାଲି ପଞ୍ଚାୟତକୁ ବିଜେପି ବିଧାୟକ ପ୍ରାର୍ଥୀ ପ୍ରଦୀପ ପୁରୋହିତ ଏକ ସତସଙ୍ଗ କାର୍ଯ୍ୟକ୍ରମରେ ଯୋଗଦେବା ପାଇଁ ଯାଇଥିଲେ। ଏତିକି ବେଳେ ଗୋଟିଏ ଟିଭି ଚ୍ୟାନେଲର ପ୍ରତିନିଧି ବିଜେଡି କର୍ମୀଙ୍କୁ ସାଙ୍ଗରେ ନେଇ ଶ୍ରୀ ପୁରୋହିତଙ୍କୁ ଅପମାନିତ କରିଥିଲା। ନନ୍ଦିଘୋଷ ଟିଭି ସାମ୍ବାଦିକ ଶ୍ରୀ ପୁରୋହିତଙ୍କୁ ଟଣାଓଟରା କରିବା ସହ ନିର୍ବାଚନ ପ୍ରଚାର କରୁଛନ୍ତି କି ନାହିଁ ବାରମ୍ବାର ପ୍ରଶ୍ନ କରିଚାଲିଥିଲେ। ଶ୍ରୀ ପୁରୋହିତ ସବୁଦିନ ସତ୍‌ସଙ୍ଗରେ ଯୋଗଦେବାକୁ ଯାଆନ୍ତି ବୋଲି ବାରିହାପାଲିର ଶହ ଶହ ଲୋକ ଗଣମାଧ୍ୟମରେ କହିଥିଲେ। ମିଛରେ ପ୍ରଦୀପ ପୁରୋହିତଙ୍କୁ ବଦନାମ କରିବା ଚେଷ୍ଟା ଅତ୍ୟନ୍ତ ଲଜ୍ଜାଜନକ ବୋଲି ଲେଖାଶ୍ରୀ କହିଛନ୍ତି। ସ୍ଥାନୀୟ ପୁଲିସ ଓ ପ୍ରଶାସନ ଶାସକ ଦଳର ହାତବାରିସୀ ସାଜି ବିଜେଡିର ନେତା ଓ ମନ୍ତ୍ରୀଙ୍କୁ ସାହାଯ୍ୟ କରୁଛି ବୋଲି ସେ କହିଛନ୍ତି।

ବରଗଡ଼ : ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କ ପତ୍ନୀ ଏବଂ ମାଉସୀ ବିଭିନ୍ନ ଗାଁରେ ବୁଲି ଟଙ୍କା ବାଣ୍ଟୁଥିବା ନଜର ଆସିଥିବାବେଳେ ଜଣେ ପୂର୍ବତନ ମନ୍ତ୍ରୀ ମଧ୍ୟ ବିଜେପି ପ୍ରାର୍ଥୀଙ୍କ ପାଇଁ ଟଙ୍କା ବାଣ୍ଟିବାବେଳେ ଧରା ପଡ଼ିଛନ୍ତି। ପୁଲିସ ତାଙ୍କ ଗାଡ଼ି ଜବତ୍ କରିଛି। କେବଳ ଦଳୀୟ ନେତା ନୁହନ୍ତି, ଏକ ବୈଦ୍ୟୁତିକ ଗଣମାଧ୍ୟମର ୪୦ରୁ ୪୫ଟି ଟିମ୍‌କୁ ମଧ୍ୟ ଏହି ଟଙ୍କା ବଣ୍ଟା ଅଭିଯାନରେ ସାମିଲ କରାଯାଇଛି। ଏମାନେ ନିଜ ଗାଡ଼ିରେ ବିଜେପିର ଟଙ୍କା ନେଇ ଗାଁ ଗାଁରେ ପହଞ୍ଚାଉଛନ୍ତି ବୋଲି ରବିବାର ବିଜେଡି ପ୍ରତିନିଧିଦଳ ଚାରି ଚାରି ଥର ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛନ୍ତି।
ପ୍ରଥମେ ମଧ୍ୟାହ୍ନରେ ସାଂସଦ ସସ୍ମିତ ପାତ୍ର ଓ ମୁଖପାତ୍ର ଲେନିନ ମହାନ୍ତିଙ୍କ ନେତୃତ୍ବରେ ଯାଇଥିବା ବିଜେଡି ପ୍ରତିନିଧିଦଳ ପଦ୍ମପୁରରେ ବିଜେପି ପକ୍ଷରୁ ଟିଭି ଟିମ୍‌କୁ କେମିତି ଗାଁ ଗାଁ ବୁଲି ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କ ସପକ୍ଷରେ ଭୋଟ ଦେବା ପାଇଁ ଟଙ୍କା ବାଣ୍ଟୁଛନ୍ତି, ତାହା ବର୍ଣ୍ଣନା କରିଥିଲେ। ବିଜେପିର ଟଙ୍କା ପରିବହନ ପାଇଁ ଟିଭି ଭ୍ୟାନକୁ ବ୍ୟବହାର କରାଯାଉଛି; କିଛି ଲୋକଙ୍କ ହାତରେ ଟଙ୍କା ଧରାଇ ଏହା ସେମାନଙ୍କୁ ବିଜେଡି ଦେଇଛି ବୋଲି କ୍ୟାମେରା ଆଗରେ କହିବାକୁ କହୁଛନ୍ତି। ଆଉ ଏହି ପ୍ରାୟୋଜିତ ଦୃଶ୍ୟକୁ ନିଜ ଟିଭିରେ ଦେଖାଇ ବିଜେଡି ବିରୋଧରେ ଅପପ୍ରଚାର କରୁଛନ୍ତି।
ଅନୁରୂପ ଭାବେ ଅପରାହ୍ଣରେ ବିଜେଡିର ଆଉ ଏକ ପ୍ରତିନିଧିଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ବିଜେପି ନେତା ଭୋଟରଙ୍କୁ ପ୍ରଭାବିତ କରିବାକୁ ଟଙ୍କା ବାଣ୍ଟୁଥିବା ଅଭିଯୋଗ ଦୋହରାଇବା ସହ ଏହାର ପ୍ରମାଣ ସ୍ବରୂପ ଫଟୋ ଓ ଭିଡିଓ କ୍ଲିପ୍ ଦାଖଲ କରିଥିଲେ। ଏହି ଅବସରରେ ସେମାନେ ନିର୍ଦ୍ଦିଷ୍ଟ ଭାବେ ଅଭିଯୋଗ କରିଥିଲେ ଯେ ଜଣେ ବିଜେପି ନେତା ଭୋଟ କିଣିବା ଉଦ୍ଦେଶ୍ୟରେ ପଦ୍ମପୁର ବ୍ଲକ୍ ବରିକେଲ୍ ପଞ୍ଚାୟତରେ ଗ୍ରାମବାସୀଙ୍କୁ ୧ ଲକ୍ଷ ଟଙ୍କାର ଚେକ୍ ପ୍ରଦାନ ସହ ନଗଦ ଟଙ୍କା ବାଣ୍ଟୁଛନ୍ତି। ବିଜେପି ନେତା ଜଣେ ଗ୍ୟାସ୍ ଏଜେନ୍ସି ମାଲିକ ହୋଇଥିବାବେଳେ କିଛିଦିନ ତଳେ ତାଙ୍କ ଏଜେନ୍ସିରେ ଜିଏସ୍‌ଟି ଚଢ଼ଉ ହୋଇଥିଲା। ସେହିପରି ପାଇକମାଳ ବ୍ଲକ୍ ଝିଟିକି ପଞ୍ଚାୟତ ମୁନିକେଲ ଗାଁରେ ଜଣେ ବିଜେପି କର୍ମୀ ଗ୍ରାମବାସୀଙ୍କୁ ଟଙ୍କା ବାଣ୍ଟିଛନ୍ତି। ଉଭୟ ଘଟଣାରେ ଟଙ୍କା ବଣ୍ଟା ସମୟର ଦୃଶ୍ୟ କ୍ୟାମେରାରେ କଏଦ ହୋଇଛି। ଏହି ଦୁଇ ବିଜେପି ନେତାଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସେମାନେ ମୁଖ୍ୟ ନିର୍ବାଚନ ଅଧିକାରୀଙ୍କୁ ନିବେଦନ କରିଥିଲେ। ପଦ୍ମପୁର ଏନ୍ଏସି ଅଧ୍ୟକ୍ଷା ସାବିତ୍ରୀ ବାଗ ଓ ଉପାଧ୍ୟକ୍ଷା ଭାରତୀ ପଟ୍ଟନାୟକ ମଧ୍ୟ ବିଜେପି ନେତା ରାଜେଶ ସାହୁଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ପଦ୍ମପୁରର ନିର୍ବାଚନ ପର୍ଯ୍ୟବେକ୍ଷକଙ୍କ ନିକଟରେ ଦାବି କରିଛନ୍ତି। ସନ୍ଧ୍ୟାରେ ବିଜେଡିର ଆଉ ଏକ ପ୍ରତିନିଧିଦଳ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ପୁଣିଥରେ ଫେରାଦ ହୋଇ ଅଭିଯୋଗପତ୍ର ଦେବା ସାଙ୍ଗକୁ ଟଙ୍କା ବଣ୍ଟାର ପ୍ରମାଣ ସ୍ବରୂପ ଫଟୋ ଓ ଭିଡିଓ କ୍ଲିପ୍ ଦାଖଲ କରିଥିଛି।

Comments are closed.