ନୂଆଦିଲ୍ଲୀ : ପ୍ରତି ୧୦ ଜଣ ଭାରତୀୟଙ୍କ ମଧ୍ୟରେ ଅନ୍ୟୂନ ୭ଜଣ ବାୟୁ ପ୍ରଦୂଷଣରେ ଆକ୍ରାନ୍ତ ହେଉଥିବା ସରକାରୀ ରିପୋର୍ଟରୁ ଜଣାପଡ଼ିଛି। ସୂଚନାନୁଯାୟୀ ବର୍ଷ ୨୦୧୭ରେ ବାୟୁ ପ୍ରଦୂଷଣଜନିତ ରୋଗରେ ଦେଶର ୧୨.୪ ଲକ୍ଷ ଜନସାଧାରଣଙ୍କ ମୃତ୍ୟୁ ଘଟିଥିଲା। ଏହିବର୍ଷ ଦେଶର ମୋଟ ମୃତ୍ୟୁର ୧୨.୫ ପ୍ରତିଶତ କେବଳ ବାୟୁ ପ୍ରଦୂଷଣ ଜନିତ ରୋଗରେ ହୋଇଥିବା ଜଣାପଡ଼ିଛି।
ଏହି ବର୍ଷ ବାୟୁ ମଣ୍ଡଳ ଦୂଷିତ ଯୋଗୁଁ ୬.୭ ଓ ଘରୋଇ ପ୍ରଦୂଷଣରେ ୪.୮ ଲକ୍ଷ ଲୋକଙ୍କ ମୃତ୍ୟୁ ଘଟିଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଓ ଭାରତୀୟ ଆୟୁର୍ବିଜ୍ଞାନ ଗବେଷଣା ପରିଷଦର ମିଳିତ ଅନୁଧ୍ୟାନ ରିପୋର୍ଟରେ ପ୍ରକାଶ ପାଇଛି। ମୃତକଙ୍କ ମଧ୍ୟରେ ୫୧.୪ ପ୍ରତିଶତଙ୍କ ବୟସ ୭୦ରୁ କମ୍। ଏହି ବର୍ଷ ପାର୍ଟିକୁଲେଟ ମେଟର ପଲ୍ୟୁସନ (ପିଏମ-୨.୫) ୮୯.୯ ମାଇକ୍ରୋଗ୍ରାମ ପ୍ରତି ଘନମିଟର ଥିଲା। ଭାରତର ଜନସଂଖ୍ୟା ଅନୁଯାୟୀ ପିଏମ-୨.୫ର ସ୍ତର ୪୦ ମାଇକ୍ରୋଗ୍ରାମ ପ୍ରତି ଘନ ମିଟର ରହିବା କଥା। ଅତ୍ୟଧିକ ବାୟୁ ପ୍ରଦୂଷଣରେ ଜଣେ ବ୍ୟକ୍ତି ରୋଗରେ ପଡ଼ିଥାଏ ା ତାଙ୍କ ଶରୀର ସଂକ୍ରମିତ ହେବା ଦ୍ବାରା ସମ୍ପୃକ୍ତ ବ୍ୟକ୍ତିର ଆୟୁ ହ୍ରାସ ପାଇଥାଏ। ବିଶ୍ବରେ ବାୟୁ ପ୍ରଦୂଷଣ ଯୋଗୁଁ ୧୮.୧ ପ୍ରତିଶତ ଜନସାଧାରଣଙ୍କ ଆୟୁ ହ୍ରାସ ପାଇଥିବାବେଳେ କେବଳ ଭାରତରେ ଏହା ୨୬.୨ ପ୍ରତିଶତ। ବିଶେଷକରି ଉତ୍ତର ପ୍ରଦେଶ, ହରିୟାଣା, ଦିଲ୍ଲୀ, ପଞ୍ଜାବ ଓ ରାଜସ୍ଥାନବାସୀଙ୍କ ଆୟୁ ବାୟୁ ପ୍ରଦୂଷଣ ଯୋଗୁଁ ହ୍ରାସ ପାଉଥିବା ଏହି ରିପୋର୍ଟରେ କୁହାଯାଇଛି।
Comments are closed.