ଚୌଦ୍ୱାର : ସ୍ୱଧୀନତାର ୭୫ବର୍ଷ ପୁର୍ତ୍ତି ପାଳନ ଅବସରରେ ଜାତିର ଜନକ ମହାତ୍ମା ଗାନ୍ଧୀଙ୍କ ଅହିଂସା ବାର୍ତ୍ତାକୁ ଘରେ ଘରେ ପହଞ୍ଚାଇବା ଲକ୍ଷ୍ୟରେ ବିଭିନ୍ନ ସ୍ଥାନ ପରିକ୍ରମା କରୁଥିବା ଅହିଂସା ରଥକୁ ଚୌଦ୍ୱାରରେ ଭବ୍ୟ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଅହିଂସା ରଥ ଚାରବାଟିଆ ବିରାଟ ବଜାର ନିକଟରେ ପହଞ୍ଚିବା ପରେ ସେଠାରେ ଉପସ୍ଥିତ ଥିବା ମହିଳା ସ୍ୱୟଂ ସହାୟକ ଗୋଷ୍ଠିର ମହିଳା ମାନେ ରଥକୁ ବନ୍ଦାପନା କରି ସ୍ୱାଗତ କରିଥିଲେ। ବିଶିଷ୍ଟ ଘୋଡାନୃତ୍ୟ ଶିଳ୍ପୀ ପଦ୍ମଶ୍ରୀ ଡ.ଉତ୍ସବ ଚରଣ ଦାସ ଓ ସାଥୀଙ୍କ ଦ୍ୱରା ପରିବେଷିତ ସ୍ୱାଗତ ଗୀତ ଓ ଲୋକ ନୃତ୍ୟ ବେଶ ଲୋକାଦୃତ ହୋଇଥିଲା। ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ, ପୌରାଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲ, ଉପାଧ୍ୟକ୍ଷ ଶୁଭେନ୍ଦୁ ସାମଲ, ନିର୍ବାହୀ ଅଧିକାରୀ ପବିତ୍ର କୁମାର ବେହେରା, ସମସ୍ତ ପୌର ପାରିଷଦ, ବିଭିନ୍ନ ବିଦ୍ୟାଳୟର ଛାତ୍ରୀଛାତ୍ର ତଥା ଶହଶହ ସଂଖ୍ୟାରେ ଜନସାଧାରଣ ହାତରେ ତ୍ରିରଙ୍ଗା ପତାକା ଧରି ଦେଶଭକ୍ତି ସଂଗୀତ ଓ ଘଣ୍ଟଘଣ୍ଟା ଆଦି ଧ୍ୱନି ମଧ୍ୟରେ ପଦଯାତ୍ରା କରି ରଥକୁ କଳିଙ୍ଗ ବିଦ୍ୟାପୀଠରେ ପହଞ୍ଚାଇଥିଲେ। ଏହି ଅବସରରେ ଉପାଧ୍ୟକ୍ଷ ଶୁଭେନ୍ଦୁ ସାମଲଙ୍କ ନେତୃତ୍ୱରେ ଟାଉନହଲ ସମ୍ମୁଖରେ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା । ପରେ ପୌରକାର୍ଯ୍ୟାଳୟ ନିକଟରୁ ରଥକୁ ସସମ୍ମାନେ ବିଦାୟ ଦିଆଯାଇଥିଲା।
Comments are closed.