ଦେବଗଡ଼ : ଆଜି ସଂଧ୍ୟାରେ ରିଆମାଳ ଥାନା ଅନ୍ତର୍ଗତ ରେଙ୍ଗାଳବେଡା ହନୁମାନ ମନ୍ଦିର ନିକଟସ୍ଥ ୫୩ ନମ୍ବର ଜାତୀୟ ରାଜପଥରେ ଏକ ମିନିଟ୍ରକ ଏକ ବାଇକକୁ ଧକ୍କାଦେବା ଫଳରେ ଘଟଣା ସ୍ଥଳରେ ଜଣେ ଗୃହରକ୍ଷୀଙ୍କର ମୃତ୍ୟୁ ଘଟିଛି। ସେହିପରି ବାଇକରେ ବସିଥିବା ଜଣେ ଶିଶୁ ଓ ଅନ୍ୟଜଣେ ବୃଦ୍ଧ ଗୁରୁତର ଆହତ ହୋଇଥିବା ଜଣାପଡିଛି। ମିଳିଥିବା ସୂଚନା ଅନୁଯାୟୀ କୁଣ୍ଢେଇଗୋଳା ଥାନା ଅନ୍ତର୍ଗତ କଂଟାବାହାଳ (ରତାଖଣ୍ଡି)ଗ୍ରାମର ଧୀରେନ୍ଦ୍ର ସାହୁ(୩୫) ନାମକ ଜଣେ ଗୃହରକ୍ଷୀ କୌଣସି କାମରେ ତାଙ୍କର ୫ ବର୍ଷର ଶିଶୁକନ୍ୟା ସ୍ନେହାରାଣୀ ସାହୁ ଓ ବଡବାପା ନାଥ ସାହୁ(୬୩)ଙ୍କ ସହ ଏକ ବାଇକ ଯୋଗେ ଦେବଗଡକୁ ଆସିଥିଲେ। ସଂଧ୍ୟାରେ ସେମାନେ ନିଜ ଘରକୁ ଫେରୁଥିବା ବେଳେ ସଂଧ୍ୟା ପ୍ରାୟ ୫ଟା ୧୫ ମିନିଟ ସମୟରେ ରେଙ୍ଗାଳବେଡା ଗ୍ରାମର ହନୁମାନ ମନ୍ଦିର ନିକଟସ୍ଥ ୫୩ ନମ୍ବର ଜାତୀୟ ରାଜପଥରେ ଏକ ମିନିଟ୍ରକ ସେମାନଙ୍କୁ ଧକ୍କା ଦେଇଥିଲା। ଫଳରେ ବାଇକରୁ ଛିଟିକିପଡି ତିନିଜଣ ଯାକ ଗୁରୁତର ଆହତ ହେବା ସହ ଗୃହରକ୍ଷୀ ଧିରେନ୍ଦ୍ରଙ୍କର ଘଟଣା ସ୍ଥଳରେ ମୃତ୍ୟୁ ଘଟିଥିଲା। ସେହିପରି ସ୍ନେହାରାଣୀ ଓ ନାଥ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସ ଯୋଗେ ବୃଦ୍ଧଙ୍କୁ ସ୍ନେହା ଓ ନାଥଙ୍କୁ ଉଦ୍ଧାର କରିବାସହ ଚିକିତ୍ସା ନିମନ୍ତେ ଦେବଗଡ ଜିଲା ମୂଖ୍ୟ ଚିକିତ୍ସାଳୟରେ ଭର୍ତୀ କରିଥିବା ଜଣାପଡିଛି। ସୂଚନା ପାଇ ରିଆମାଳ ଥାନା ପୁଲିସ ଘଟଣା ସ୍ଥଳରେ ପହଂଚି ମୃତଦେହ ଉଦ୍ଧାର କରିବାସହ ଏକ ମାମଲା ଋଜୁକରି ଦୁର୍ଘଟଣା ଗ୍ରସ୍ତ ମିନିଟ୍ରକ ଓ ବାଇକକୁ ଜବତ କରିଥିବା ଜଣାପଡିଛି। ଆସନ୍ତା କାଲି ଧିରେନ୍ଦ୍ରଙ୍କ ମୃତଦେହ ବ୍ୟବଚ୍ଛେଦ କରାଯିବ ବୋଲି ପୁଲିସ ସୂତ୍ରରୁ ସୂଚନା ମିଳିଛି।
Comments are closed.