MEllora 950×100

ଭାରତର ନ୍ୟାୟପାଳିକା ଇତିହାସରେ ରେକର୍ଡ; ୧୨ ହାଇକୋର୍ଟ ପାଇଁ ୬୮ ବିଚାରପତିଙ୍କ ନାମକୁ ଅନୁମୋଦନ

୪୪ ଆଇନଜୀବୀ ହାଇକୋର୍ଟ ବିଚାରପତି ଭାବେ ନିଯୁକ୍ତି ପାଇବେ

ନୂଆଦିଲ୍ଲୀ: ଭାରତର ସୁପ୍ରିମକୋର୍ଟର କଲେଜିୟମ ଦେଶର ବିଭିନ୍ନ ୧୨ଟି ହାଇକୋର୍ଟରେ ବିଚାରପତି ଭାବରେ ନିଯୁକ୍ତି ପାଇଁ ୬୮ ଜଣଙ୍କ ନାମକୁ ଅନୁମୋଦନ କରିଛି। ସେମାନଙ୍କ ମଧ୍ୟରେ ୪୪ ଜଣ ଆଇନଜୀବୀ ରହିଛନ୍ତି। ସୁପ୍ରିମକୋର୍ଟର ମାନ୍ୟବର ପ୍ରଧାନ ବିଚାରପତି ଜଷ୍ଟିସ ଏନ ଭି ରମନାଙ୍କ ନେତୃତ୍ୱରେ ତିନିଜଣ ବିଚାରପତିଙ୍କୁ ନେଇ ଗଠିତ କଲେଜିୟମ ଶୁକ୍ରବାର ୬୮ ଜଣଙ୍କ ନାମକୁ ୧୨ଟି ହାଇକୋର୍ଟରେ ବିଚାରପତି ଭାବରେ ନିଯୁକ୍ତି ପାଇଁ ସୁପାରିଶ କରିଛନ୍ତି। ଏହିସବୁ ରାଜ୍ୟର ହାଇକୋର୍ଟଗୁଡିକ ମଧ୍ୟରୁ ଅଧିକାଂଶରେ ପ୍ରାୟ ୫୦% ବିଚାରପତି ପଦବୀ ଖାଲି ପଡିଥିବାରୁ ମାମଲାଗୁଡିକର ବିଚାର ପ୍ରକ୍ରିୟା ଗୁରୁତର ଭାବେ ପ୍ରଭାବିତ ହେଉଥିଲା। ଏହି କଲେଜିୟମରେ ପ୍ରଧାନବିଚାରପତି ଜଷ୍ଟିସ ରମନାଙ୍କ ସହିତ ଜଷ୍ଟିସ ୟୁ ୟୁ ଲଳିତ ଏବଂ ଜଷ୍ଟିସ ଏ ଏମ କାନ୍‍ୱିଲକର ରହିଥିଲେ। କଲେଜିୟମ ୧୧୩ ଜଣଙ୍କର ନାମକୁ ବିଚାରକୁ ନେଇଥିଲେ। ବହୁ ବିଚାର ବିମର୍ଷ ଓ ତର୍ଜମା ପରେ ୬୮ ଜଣଙ୍କ ନାମକୁ ଚୂଡାନ୍ତ କରାଯାଇଥିଲା। ଏହି ମନୋନୀତ ବ୍ୟକ୍ତିମାନେ ଆଲ୍ଲାହାବାଦ, ରାଜସ୍ଥାନ, ପଶ୍ଚିମବଙ୍ଗ, ଝାଡଖଣ୍ଡ, ଜମ୍ମୁ ଓ କାଶ୍ମୀର, ତାମିଲନାଡୁ, ମଧ୍ୟପ୍ରଦେଶ, କର୍ଣ୍ଣାଟକ, ପଞ୍ଜାବ ଓ ହରିଆଣା, କେରଳ, ଛତିଶଗଡ ଏବଂ ଆସାମ ହାଇକୋର୍ଟରେ ବିଚାରପତି ଭାବରେ ନିଯୁକ୍ତି ପାଇବେ। ସେମାନଙ୍କ ମଧ୍ୟରେ ୪୪ ଜଣ ଆଇନଜୀବୀ ରହିଥିବା ଜଣାଯାଇଛି।

Comments are closed.