ଜୟପୁର ସିରିଜ ବୋମା ବିସ୍ଫୋରଣ ମାମଲା: ୫ ଅଭିଯୁକ୍ତ ଦୋଷୀ ସାବ୍ୟସ୍ତ

ଜୟପୁର: ରାଜସ୍ଥାନର ଜୟପୁରରେ ୧୧ ବର୍ଷ ତଳେ ହୋଇଥିବା ସିରିଜ ବୋମା ବିସ୍ଫୋରଣ ମାମଲାରେ ଜୟପୁର ସ୍ବତନ୍ତ୍ର କୋର୍ଟ ବୁଧବାର ୫ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଏହି ଅଭିଯୁକ୍ତମାନେ ହେଲେ ଶାହବାଜ ହୁସେନ, ମହମ୍ମଦ ସୈଫ, ​ ମହମ୍ମଦ ସରୱର ଆଜମୀ, ସୈଫୁରେହମାନ ଏବଂ ସଲମାନ। ୨୦୦୮ ମେ ୧୩ ତାରିଖରେ ଜୟପୁରରେ ୮ଟି ସ୍ଥାନରେ ବୋମା ବିସ୍ଫୋରଣ ହୋଇଥିଲା, ଯେଉଁଥିରେ ୭୧ ଜଣଙ୍କ ମୃତ୍ୟୁ ଘଟିଥିଲା ଏବଂ ୧୮୫ ଜଣ ଆହତ ହୋଇଥିଲେ।

ସ୍ବତନ୍ତ୍ର କୋର୍ଟ ବିଚାରପତି ଅଜୟ କୁମାର ଶର୍ମା ଏହି ମାମଲାର ଶୁଣାଣି କରିଥିବା ୮ମ ବିଚାରପତି ଅଟନ୍ତି। ତାଙ୍କ ପୂର୍ବରୁ ୭ ଜଣ ବିଚାରପତି ଏହି ମାମଲାର ଶୁଣାଣ କରିସାରିଛନ୍ତି। ଏହି ସିରିଜ ବିସ୍ଫୋରଣରେ ସାମିଲ ଅନ୍ୟ ୪ ଅଭିଯୁକ୍ତ ଶାଦବ, ଆରିଜ, ମହମ୍ମଦ ଖାଲି ଏବଂ ସାଜିଦକୁ ପୁଲିସ ବର୍ତ୍ତମାନ ସୁଦ୍ଧା ଗିରଫ କରିପାରି ନାହିଁ। ତେବେ ଏମାନଙ୍କ ମଧ୍ୟରୁ ମହମ୍ମଦ ଆରିଜକୁ ଦିଲ୍ଲୀ ପୁଲିସ ଉତ୍ତରପ୍ରଦେଶର ଆଜମଗଡ଼ରୁ ଗିରଫ କରିଥିଲା। କିନ୍ତୁ ବର୍ତ୍ତମାନ ସୁଦ୍ଧା ରାଜସ୍ଥାନ ପୁଲିସ ତାଙ୍କୁ ଦିଲ୍ଲୀ ପୁଲିସଠାରୁ ରିମାଣ୍ଡରେ ନେଇନାହିଁ। ଅନ୍ୟପଟେ ଏହି ଘଟଣାରେ ଅନ୍ୟ ୪ ଅଭିଯୁକ୍ତଙ୍କୁ ପୁଲିସ ବାଟଲା ହାଉସ ଏନକାଉଣ୍ଟରରେ ମାରିଦେଇଥିଲା।