MEllora 950×100

ମାଓ ସଙ୍ଗଠନରେ ସାମିଲ ହେବେ ନ୍ୟାୟରୁ ବଞ୍ଚିତ ୪ ଭାଇଭଉଣୀ

ଜାତିଆଣ ବିଭେଦକୁ କେନ୍ଦ୍ର କରି ବାରମ୍ବାର ଆକ୍ରମଣ

କେନ୍ଦୁଝରଗଡ : କେନ୍ଦୁଝର ଜିଲା ଯୋଡା ଥାନା ଅଧିନ ବନେଇକଳା ହୁଡିସାହିର ଦୁର୍ଗା ରାମଙ୍କ ପରିବାର ଅନୁସୂଜିତ ଜାତି ବର୍ଗର ହୋଇଥିବାରୁ ନିକଟସ୍ଥ ନଳକୂଅରୁ ପାଣି ନେବାକୁ ବିରୋଧ କରି ତାଙ୍କ ପରିବାର ସଦସ୍ୟଙ୍କୁ ପଡୋଶୀଙ୍କ ପକ୍ଷରୁ ବାରମ୍ବାର ମରଣାନ୍ତକ ଆକ୍ରମଣ ହେଉଛି। ଏହାକୁ ନେଇ ଯୋଡା ଥାନାରେ ଦୁର୍ଗାଙ୍କ ପୁଅ ରିକି ୫ଥର ଅଭିଯୋଗ କରିଥିଲେ ହେଁ ପୁଲିସ ପ୍ରଶାସନ ପକ୍ଷରୁ କୌଣସି ନ୍ୟାୟ ମିଳୁନଥିବା ସାନ ପୁଅ ଛୋଟୁ ଅଭିଯୋଗ କରିଛନ୍ତି। ଏପରିକି ତାଙ୍କ ଘରକୁ ପୌର ପ୍ରଶାସନ ପକ୍ଷରୁ ପାଇପ ଯୋଗେ ଯୋଗାଇ ଦିଆଯାଇଥିବା ପାନୀୟଜଳ ବ୍ୟବସ୍ଥାକୁ ବାରମ୍ବାର ଉଦ୍ଦେଶ୍ୟମୂଳକ ଭାବେ ଭାଙ୍ଗି ଦେଉଥିବାରୁ ଆଜକୁ ବର୍ଷାଧିକ କାଳ ଘରଠାରୁ ୧କି.ମି. ଦୂର ସେଣ୍ଟ ଟେରେସା ବିଦ୍ୟାଳୟ ନିକଟସ୍ଥ ପରମା ମୁଣ୍ଡାଙ୍କ ଘରୁ ଦୁର୍ଗା ସାଇକେଲ ଯୋଗେ ପାନୀୟଜଳ ସଂଗ୍ରହ କରିବାକୁ ବାଧ୍ୟ ହେଉଛନ୍ତି । ଜାତିଆଣ ମନୋଭବ ରଖି ଆମ୍ଭ ପରିବାରବର୍ଗଙ୍କୁ ବାରମ୍ବାର ଆକ୍ରମଣ କରାଯାଉଥିବା ନେଇ ପୁଲିସ ନିକଟରେ ସୁରକ୍ଷା ଯୋଗାଇ ଦେବାସହ ଆକ୍ରମଣକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ଗୁହାରୀ କରି ଆସୁଥିଲେ ହେଁ ଆକ୍ରମଣକାରୀଙ୍କୁ ସୁରକ୍ଷା ଦେଇ ଆମ୍ଭମାନଙ୍କୁ ଗିରଫ କରି କୋର୍ଟ ଚାଲାଣ କରିବା ପୁଲିସ ପ୍ରଶାସନର ଏହା କେଉଁ ପ୍ରକାର ନ୍ୟାୟ ବୋଲି ଦୁର୍ଗାଙ୍କ ବଡପୁଅ ରିକି ପ୍ରଶ୍ନ କରିଛନ୍ତି। ଆକ୍ରମଣକାରୀଙ୍କୁ ଗିରଫ ଓ ପରିବାରବର୍ଗଙ୍କୁ ସୁରକ୍ଷା ପାଇଁ ଯୋଡା ଥାନା ଠାରୁ ଆରମ୍ଭ କରି ବଡବିଲ ଏସ୍‌ଡିପିଓ ଏବଂ ଏସ୍‌.ପି.ଙ୍କ ନିକଟରେ ବହୁବାର ଫେରାଦ ହେବାପରେ ମଧ୍ୟ କୌଣସି ସୁଫଳ ନମିଳିବାରୁ ବାଧ୍ୟ ହୋଇ ଦୁର୍ଗାଙ୍କ ୨ପୁଅ ଓ ୨ଝିଅ ମାଓ ସଙ୍ଗଠନରେ ସାମିଲ ହୋଇ ବନ୍ଧୁକ ଧରି ପ୍ରତିଶୋଧ ନେବୁ ବୋଲି ଦୁର୍ଗାଙ୍କ ପୁଅ ରିକି ଓ ଛୋଟୁ ସୋମବାର ଏସ୍‌.ପି. କାର୍ଯ୍ୟାଳୟରେ ଲିଖିତ ଭାବେ ଅବଗତ କରିବା ଏବେ ପୁଲିସ ପ୍ରଶାସନ ପାଇଁ ମୁଣ୍ଡବ୍ୟଥାର କାରଣ ପାଲିଟିଛି। ଏଭଳିସ୍ଥିତିରେ ଜାତିଆଣ ବିଭେଦର ଶୀକାର ଦୁର୍ଗାଙ୍କ ପରିବାରବର୍ଗଙ୍କୁ ସୁରକ୍ଷା ସହ ଆକ୍ରମଣକାରୀଙ୍କ ବିରୋଧରେ ପୁଲିସ ପ୍ରଶାସନ ତ୍ୱରିତ୍‌ କାର୍ଯ୍ୟାନୁଷ୍ଠାନ ଗ୍ରହଣ କରୁଛି ନା ଆକ୍ରମଣର ଶୀକାର ଦୁର୍ଗାଙ୍କ ୪ ସନ୍ତାନ ସନ୍ତତି ବାଧ୍ୟ ହୋଇ ଲାଲବାହିନୀରେ ଯୋଗ ଦେଉଛନ୍ତି ତାହା ଦେଖିବାକୁ ବାକି ରହିଲା ।

Comments are closed.