ପାନିପଥ : ରେଳ ଆସୁଥିବାବେଳେ ରେଳ ଧାରଣାରେ ସେଲଫି ନେବାର ଦୁଃସାହାସ କରି ୩ ଯୁବକ ପ୍ରାଣ ହରାଇଛନ୍ତି। ହରିୟାଣାର ପାନିପଥ ପାର୍କ ନିକଟ ରେଳ ଟ୍ରାକ୍ରେ ମଙ୍ଗଳବାର ସେଲଫି ନେଉଥିବା ୩ ଯୁବକ ଏକ ଯାତ୍ରୀବାହୀ ଟ୍ରେନ୍ରେ କଟି ଜୀବନ ହାରିଛନ୍ତି। ମୃତକଙ୍କ ନାମ ଚମନ, ସନି ଏବଂ କିଶନ ଓ ସେମାନଙ୍କ ଘର ଉତ୍ତରପ୍ରଦେଶ ଅଲ୍ଲୀଗଡ଼ରେ ବୋଲି ଜଣାପଡ଼ିଛି। ତେବେ ଏହି ୩ ଜଣଙ୍କ ସହ ଆଉ ଜଣେ ଯୁବକ ଦିନେଶ ଶେଷ ମୁହୂର୍ତ୍ତରେ ରେଳ ଧାରଣାରୁ ବାହାରି ନିଜ ଜୀବନ ବଞ୍ଚାଇବାରେ ସଫଳ ହୋଇଛି।
ସୂଚନା ଅନୁସାରେ ୪ ଜଣ ଯାକଁ ଦିନ ମଜୁରିଆ ଭାବେ କାର୍ଯ୍ୟ କରୁଥିଲେ। ଜଣେ ସମ୍ପର୍କୀୟର ବାହାଘର ପାଇଁ ସେମାନେ ପାନିପଥ ଆସିଥିଲେ। ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ ୪ ଜଣ ଯାକଁ ରେଳ ଧାରଣାରେ ବୁଲି ପ୍ରାୟ ଅଧଘଣ୍ଟା ପର୍ଯ୍ୟନ୍ତ ପରସ୍ପରରେ ଫଟୋ ଉଠାଉଥିଲେ। ୪ ଜଣ ସେଲଫି ନେବାକୁ ରେଳ ଧାରଣାରେ ଠିଆ ହୋଇଥିଲେ। ଏହି ସମୟରେ ଦ୍ରୁତ ଗତିରେ ଏକ ଟ୍ରେନ୍ ସେମାନଙ୍କ ଆଡକୁ ମାଡି ଆସିଥିଲା। ଡରରେ ୩ ଜଣ ବାମ ପଟକୁ ଓ ଦିନେଶ ଡାହାଣ ପଟକୁ ଡେଇଁ ପଡ଼ିଥିଲେ। ତେବେ ବାମ ପଟ ଧାରଣରେ ଆସୁଥିବା ଅନ୍ୟ ଏକ ଟ୍ରେନ୍ରେ ୩ ଜଣ ଯାକଁ କଟିଯାଇଥିଲେ। ଡାହାଣ ପଟକୁ ଡେଇଁଥିବା ଦିନେଶ ଜୀବନ ବଞ୍ଚିଯାଇଛି। ରେଳୱେ ପୁଲିସ୍ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଜିଆରପି ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି।
Comments are closed.