ଭୁବନେଶ୍ବର : ଯୁକ୍ତ ଦୁଇ ଦ୍ବିତୀୟ ପର୍ଯ୍ୟାୟ ନାମଲେଖା ପାଇଁ ମେଧା ତାଲିକା ପ୍ରକାଶ ପାଇଛି । ମେଧା ତାଲିକାରେ ଥିବା ଛାତ୍ରଛାତ୍ରୀ ସୋମବାରଠାରୁ ଆସନ୍ତା ୩ ତାରିଖ ମଧ୍ୟରେ ନାମ ଲେଖାଇପାରିବେ । ପ୍ରାୟ ୩୮ ହଜାର ଛାତ୍ରଛାତ୍ରୀ ଆବେଦନ କରିଥିବାବେଳେ ୩୧ ହଜାର ୯୭୪ ବିଦ୍ୟାର୍ଥୀ ଯୋଗ୍ୟ ବିବେଚିତ ହୋଇଛନ୍ତି । କଳା ପାଠ୍ୟକ୍ରମରେ ସର୍ବାଧିକ ୧୩ ହଜାର ୪୧୦ ବିଦ୍ୟାର୍ଥୀ ମନୋନୀତ ହୋଇଥିବାବେଳେ ବିଜ୍ଞାନରେ ୧୦ ହଜାର ୫୭୯, ବାଣିଜ୍ୟରେ ୪ ହଜାର ୧୮୫, ସଂସ୍କୃତରେ ୨ହଜାର ୫୨୬ ଓ ଧନ୍ଦାମୂଳକ ପାଠ୍ୟକ୍ରମରେ ୧ହଜାର ୨୭୪ ବିଦ୍ୟାର୍ଥୀ ମେଧା ତାଲିକାରେ ସ୍ଥାନ ପାଇଛନ୍ତି । ଆସନ୍ତା ୫ ତାରିଖରେ ନାମ ଲେଖାଇଥିବା ଛାତ୍ରଛାତ୍ରୀଙ୍କ ତଥ୍ୟ ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଇ-ସ୍ପେସ୍ରେ ଦାଖଲ କରିବେ। ଶିକ୍ଷାନୁଷ୍ଠାନରେ ଖାଲି ପଡ଼ିଥିବା ସିଟ୍ ପାଇଁ ସ୍ପଟ୍ ନାମଲେଖା କରାଯିବ । ୯ ଓ ୧୦ ତାରିଖରେ ଆଗ୍ରହୀ ଛାତ୍ରଛାତ୍ରୀ ପଞ୍ଜୀକରଣ କରିପାରିବେ । ୧୧ରେ ନାମଲେଖା ପାଇଁ ଚୂଡ଼ାନ୍ତ ତାଲିକା ପ୍ରକାଶ ପାଇବ। ୧୧ ଓ ୧୨ ତାରିଖରେ ନାମଲେଖା ଅନୁଷ୍ଠିତ ହେବ ବୋଲି ଉଚ୍ଚ ମାଧ୍ୟମିକ ଶିକ୍ଷା ନିର୍ଦେଶାଳୟ ପକ୍ଷରୁ ସୂଚନା ଦିଆଯାଇଛି । ପ୍ରଥମ ପର୍ଯ୍ୟାୟ ନାମଲେଖା ପରେ ୨୦୩୫ ଯୁକ୍ତ୨ କଲେଜର କଳା, ବାଣିଜ୍ୟ, ବିଜ୍ଞାନ, ସଂସ୍କୃତ ଓ ଧନ୍ଦାମୂଳକ ଶିକ୍ଷା ବିଭାଗରେ ୧ ଲକ୍ଷ ୪୩ ହଜାର ଆସନ ଖାଲି ରହିଛି।
Comments are closed.