ଶିମଲା: ହିମାଚଳ ପ୍ରଦେଶରେ ପ୍ରବଳ ବରଫପାତ ହୋଇଛି। ଫଳରେ ବିଭିନ୍ନ ଅଞ୍ଚଳରେ ହଜାର ହଜାର ପର୍ଯ୍ୟଟକ ଫଶିରହିଛନ୍ତି। ବର୍ତ୍ତମାନ ସୁଦ୍ଧା ୨ ପର୍ଟ୍ୟଟକଙ୍କ ମୃତ୍ୟୁ ହୋଇସାରିଛି। ୪୮ ଘଣ୍ଟା ଧରି ରାଜ୍ୟର ଅଧା ଅଞ୍ଚଳରେ ହ୍ବାଇଟ୍ କର୍ଫ୍ୟୁ ଜାରି କରାଯାଇଛି। ଶିମଲା, କୁଲ୍ଉ, ଚମ୍ବା, ମଣ୍ଡି ସମେତ ବହୁ ଅଞ୍ଚଳ ବିଚ୍ଛିନ୍ନ ହୋଇପଡ଼ିଛି। ପରିବହନ, ବିଦ୍ୟୁତ ଏବଂ ପାନୀୟଜଳ ସେବା ଠପ୍ ହୋଇଯାଇଛି।
ବରଫପାତ ଯୋଗୁ ବିଭିନ୍ନ ସ୍ଥାନରେ ଗଛ ଭାଙ୍ଗିପଡ଼ି ଟ୍ରାନ୍ସଫର୍ମର ପୋଡ଼ିଯାଇଛି। ପାଇପ ଜଳ ବରଫ ପାଲଟିଯିବାରୁ ଲୋକଙ୍କ ନିକଟରେ ପାନୀୟଜଳ ପହଞ୍ଚିପାରୁ ନାହିଁ। ଗୁରୁବାର ରାଜ୍ୟର ୫ଟି ଜାତୀୟ ରାଜପଥ ସମେତ ୧୦୩୪ଟି ରାସ୍ତା ବନ୍ଦ ରହିଥିଲା। ପ୍ରଶାସନ ପକ୍ଷରୁ ରାସ୍ତା ସଫେଇ ଜାରି ରହିଛି। କେଲାଙ୍ଗରେ ସର୍ବନିମ୍ନ ତାପମାତ୍ରା ବିଯୁକ୍ତ(-) ୭.୧ ଡିଗ୍ରୀ ରହିଥିଲା। ପ୍ରବଳ ଥଣ୍ଡା ଯୋଗୁ ଜଣେ ପର୍ଯ୍ୟଟକଙ୍କ ମୃତ୍ୟୁ ଘଟିଥିବାବେଳେ ବରଫରେ ଖସିପଡ଼ି ଅନ୍ୟ ଜଣେ ପର୍ଯ୍ୟଟକ ପ୍ରାଣ ହରାଇଛନ୍ତି। ୨୪ରୁ ଅଧିକ ପର୍ଯ୍ୟଟକ ଆହତ ହୋଇଛନ୍ତି। ଲାହୌଲ, କିନୌର, ଶିମଲା ଏବଂ ଚମ୍ବାରେ ଶୁକ୍ରବାର ହିମସ୍ଖଳନ ହେବା ନେଇ ସତର୍କତା ଜାରି କରାଯାଇଛି।
Comments are closed.