MEllora 950×100

୧୨୦ ବର୍ଷର ଭିନ୍ନକ୍ଷମ ବୃଦ୍ଧା, ମିଳୁନି ଭତ୍ତା

ମୋହନା : ଅସହାୟ, ଦାରିଦ୍ର୍ୟ, ତଥା ବରିଷ୍ଠ ନାଗରିକଙ୍କ ପାଇଁ ସରକାର ଭତ୍ତା ପ୍ରଦାନ କରିବା ସହ ଭିନ୍ନକ୍ଷମ ମାନଙ୍କୁ ସାଇକେଲ୍  ଓ ଆଶାବାଡି ଦେବାର ବ୍ୟବସ୍ଥା କରୁଛନ୍ତି ।  କିନ୍ତୁ ୧୨୦ ବର୍ଷର ବୃଦ୍ଧା ଭତ୍ତାରୁ ବଞ୍ଚିତ। ତାହା ମଧ୍ୟ ପୁଣି ଭିନ୍ନକ୍ଷମ । କିନ୍ତୁ ସେ ପାଉନାହାନ୍ତି ଭତ୍ତା କି ଖଣ୍ଡିଏ ସାଇକେଲ୍ କି ଦୁଇଖଣ୍ଡ ଆଶାବାଡି।   ସରକାର ଭିନ୍ନକ୍ଷମ ଓ ବରିଷ୍ଠ ନାଗରିକଙ୍କ ପାଇଁ ମାଳ ମାଳ ଯୋଜନା ରଖିଛନ୍ତି। କିନ୍ତୁ ଜଣେ ବରିଷ୍ଠ ନାଗରିକ ତଥା ଭିନ୍ନକ୍ଷମ ମହିଳା  ସେହି ଯୋଜନାର ସୁଫଳ ପାଇବାରୁ ବଞ୍ଚିତ।
ଗଜପତି ଜିଲ୍ଲା ମୋହନା ବ୍ଲକ ଅନ୍ତର୍ଗତ ଜିରାଙ୍ଗ ପଞ୍ଚାୟତ ଡରାବ ଗାଁ ଶବରସାହିର ରଇବାରୀ ଶବର ଓରଫ୍ ବୁଧୁବାରୀ ଶବର। ବୟସ ଆସି ପହଞ୍ଚିଲାଣି ୧୨୦ରେ। ଚର୍ମ ଝାଉଁଳି ଗଲାଣି । ପାଟିରେ ଆଉ ଦାନ୍ତ ମଧ୍ୟ ନାହିଁ । ପାକୁଆ ପାଟିରେ କଥା ଦି ପଦ ଯେମିତି ସେମିତି କହିପାରୁଛନ୍ତି । ସେ ଚଲାବୁଲା କରି ପାରୁନାହାନ୍ତି । ସେ ଭିନ୍ନକ୍ଷମ । ଗୋଡ଼ଦୁଇଟି ଅଛି କିନ୍ତୁ ବହୁବର୍ଷ ତଳେ ପଡିଯାଇ ତାଙ୍କର ଗୋଡ଼ ଆଊ କାମ କରୁନି। ଚଲାବୁଲା କରିନପାରି  ତଳେ ବସି ବସି ଘୋଷଡି ଘୋଷଡି  ବଡ଼ କଷ୍ଟରେ ଯାଉଛନ୍ତି। ତେଣୁ ତାଙ୍କ ପରିବାର ଲୋକେ ତାଙ୍କୁ ପ୍ରତ୍ୟେକ ଦିନ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଟେକି ଟେକି ନେବା ଆଣିବା କରନ୍ତି। କିନ୍ତୁ ଆଶ୍ଚର୍ଯ୍ୟର କଥା ସରକାର ମଧୁବାବୁ ପେନସନ୍ ଯୋଜନା ନାମରେ ବରିଷ୍ଠ ନାଗରିକ, ଅସହାୟ ମାନଙ୍କୁ ସରକାରୀ ଭତ୍ତା ପ୍ରଦାନ କରିବା ସହ ଭିନ୍ନକ୍ଷମ ମାନଙ୍କୁ ମଧ୍ୟ ଭତ୍ତା, ଆଶାବାଡି ଓ ସାଇକେଲ ଯୋଗାଇବା ବ୍ୟବସ୍ଥା କରୁଛନ୍ତି। କିନ୍ତୁ ଏହି ବୃଦ୍ଧା ମା’ଙ୍କ  ଏଭଳି ଅବସ୍ଥା ଦେଖିଲେ ଲାଗୁଛି ସବୁ ସରକାରୀ ବ୍ୟବସ୍ଥା ଯେମିତି ତାଙ୍କ ପାଇଁ   ହୋଇଯାଇଛି ଅଲୋଡା। ପଞ୍ଚାୟତ ସ୍ତରରୁ  କାହାର ଦୃଷ୍ଟି ପଡୁନଥିବା ବେଳେ ତାଙ୍କ ପ୍ରତି ଯେମିତି ଆଉ କାହାର ନଜର ନାହିଁ। ତେଣୁ ବୟସର ଅପରାହ୍ନରେ ହାତରେ ବାଡ଼ି ଖଣ୍ଡିଏ ଧରି ଘର ବାରଣ୍ଡାରେ ବସି ଚାହିଁ ବସିଛନ୍ତି ସରକାରୀ ଭତ୍ତା ଖଣ୍ଡିକ ପାଇବା ପାଇଁ।
ରଇବାରୀ ଏମିତି ଅସହାୟ ଅବସ୍ଥାରେ ଥିଲେ ମଧ୍ୟ ତାଙ୍କୁ ଭତ୍ତା ମିଳୁନଥିବାରୁ ସେ ଦୁଃଖ ପ୍ରକାଶ କରି କହିଛନ୍ତି। ମୋର ଗୋଡ଼ ବି ଭାଙ୍ଗି ଯାଇଛି ମୁଁ ଚାଲିପାରୁନି । ମୋତେ ୧୨୦ ବର୍ଷ ହେଲାଣି । ହେଲେ ମୋତେ ତିନି ବର୍ଷ ହେଲା ଭତ୍ତା ମିଳୁନି। ମୋର ଆଧାର କାର୍ଡ ଆଉ ହେଉନି। ମୋତେ ଭତ୍ତା ଟିକିଏ ମିଳିବା ପାଇଁ ମଧ୍ୟ କିଏ ସାହାଯ୍ୟ କରୁନାହାନ୍ତି। ମୁଁ ବଞ୍ଚିଥିବା ମଧ୍ୟରେ ତ ମୋତେ ଭତ୍ତା ମିଳୁନି ! ମୁଁ ମଲାପରେ ମୋର ଭତ୍ତା ଟଙ୍କାକୁ ମୋ ମଶାଣିରେ ଆଣି ପୋତିବେ କି ବୋଲି ପ୍ରଶାସନକୁ ପ୍ରଶ୍ନ କରିଛନ୍ତି ?
ତେଣୁ ତାଙ୍କର ଅବସ୍ଥା ଦେଖି  ତାଙ୍କ ପ୍ରତି ସରକାର ଦୃଷ୍ଟି ଦେଇ ଭତ୍ତା ପ୍ରଦାନ କରିବାକୁ ଅନୁରୋଧ କରିଛନ୍ତି ଗ୍ରାମର ବୁଢା ଶବର। ରଇବାରୀ ଶବରଙ୍କୁ ସରକାର ସମସ୍ତ ସରକାରୀ ବ୍ୟବସ୍ଥା ଯୋଗାଇଦେବା ପାଇଁ ସରକାରଙ୍କୁ ଅନୁରୋଧ କରିଛନ୍ତି ସମାଜସେବୀ ଗୌରିଶଙ୍କର ପ୍ରଧାନୀ। ମୋହନା ବିଡ଼ିଓଙ୍କ ସହ ଆଲୋଚନା କରି ରଇବାରୀଙ୍କ ପାଇଁ ଭତ୍ତା ବ୍ୟବସ୍ଥା କରାଯିବ ବୋଲି କହିଛନ୍ତି ଜିରାଙ୍ଗ ପଞ୍ଚାୟତ ସରପଞ୍ଚ ପଦ୍ମୀନି ଶବର।

Comments are closed.