ଦିଲ୍ଲୀରେ ପହଞ୍ଚିଲେ ଜାପାନରେ ଫଶିଥିବା ୧୧୯ ଭାରତୀୟ ଓ ୫ ବିଦେଶୀ

ନୂଆଦିଲ୍ଲୀ: ଜାପାନ ସମୁଦ୍ର ତଟରେ ଡାଏମଣ୍ଡ ପ୍ରିନ୍‌ସେସ୍‌ ଜାହାଜରେ ଫଶିଥିବା ୧୧୯ ଭାରତୀୟ ସ୍ବଦେଶ ଫେରିଛନ୍ତି। ଏୟାର ଇଣ୍ଡିଆର ଏକ ସ୍ବତନ୍ତ୍ର ବିମାନରେ ସେମାନଙ୍କୁ ଅଣାଯାଇଛି। ଏହା ବ୍ୟତୀତ ଶ୍ରୀଲଙ୍କା, ନେପାଳ, ଦକ୍ଷିଣ ଆଫ୍ରିକା ଏବଂ ପେରୁର ୫ ବିଦେଶୀ ନାଗରିକଙ୍କୁ ମଧ୍ୟ ଉଦ୍ଧାର କରାଯାଇଛି। ଗୁରୁବାର ସକାଳେ ସମସ୍ତେ ନୂଆଦିଲ୍ଲୀ ବିମାନ ବନ୍ଦରରେ ପହଞ୍ଚିଛନ୍ତି। ଉଦ୍ଧାର କାର୍ଯ୍ୟରେ ସହାୟତା କରିଥିବାରୁ ଭାରତ ଜାପାନର ଅଧିକାରୀମାନଙ୍କୁ ଧନ୍ୟବାଦ ଜଣାଇଛି।

ବିଦେଶ ମନ୍ତ୍ରଣାଳୟ ପକ୍ଷରୁ ଏକ ଟ୍ବିଟ୍‌ କରାଯାଇ ଏ ସମ୍ପର୍କରେ ସୂଚନା ଦିଆଯାଇଛି। ଡାଏମଣ୍ଡ ପ୍ରିନ୍‌ସେସ୍‌ ଜାହାଜରେ ଥିବା ୩୭୧୧ ଜଣଙ୍କ ମଧ୍ୟରୁ ଭାରତର ୧୩୮ ଜଣ ରହିଥିଲେ। ସେମାନଙ୍କ ମଧ୍ୟରେ ୧୩୨ ଜଣ ଜାହାଜର କର୍ମଚାରୀ ଥିଲେ। ଜାହାଜରେ କିଛି କରୋନା ଭୂତାଣୁ ଆକ୍ରାନ୍ତ ଥିବାରୁ ଜାପାନ ସରକାର ଲୋକମାନଙ୍କୁ ନିଜ ଦେଶରେ ପ୍ରବେଶ ଅନୁମତି ଦେଇ ନ ଥିଲେ। ଫଳରେ ଗତ ଫେବୃୟାରୀ ୫ ତାରିଖରୁ ଜାହାଜଟି ସମୁଦ୍ର ତଟରେ ଅଟକି ରହିଛି। ବର୍ତ୍ତମାନ ୧୧୯ ଭାରତୀୟ ସ୍ବଦେଶ ଫେରିଥିବାବେଳେ ଅନ୍ୟ ୧୬ ଜଣ ଆକ୍ରାନ୍ତ ସେଠାରେ ଚିକିତ୍ସିତ ହେଉଛନ୍ତି। ଅବଶିଷ୍ଟ ଭାରତୀୟଙ୍କୁ ସେଠାରୁ ସ୍ବଦେଶ ଅଣାଯିବ ବୋଲି କୁହାଯାଇଛି।

Comments
Loading...