ନୂଆଦିଲ୍ଲୀ : ପୂର୍ବତନ ଭାରତୀୟ କ୍ରିକେଟର୍ ଯୁବରାଜ ସିଂହଙ୍କ ବିରୋଧରେ ପୁଲିସରେ ଏକ ଅଭିଯୋଗ ଦାଖଲ ହୋଇଥିବା ଜଣାପଡ଼ିଛି। କିଛିଦିନ ତଳେ ଯୁବରାଜ ଓ ଭାରତୀୟ ଓପନର୍ ରୋହିତ ଶର୍ମା ସାମାଜିକ ଗଣମାଧ୍ୟମରେ ମତ ବିନିମୟ କରୁଥିଲେ। ମତ ବିନିମୟ ସମୟରେ ଯୁବରାଜ କହିଥିଲେ ସ୍ପିନର ୟୁଜବେନ୍ଦ୍ର ଚହଲ୍ଙ୍କ ପରି କେତେକ ବ୍ୟକ୍ତି ଅଛନ୍ତି ଯେଉଁମାନଙ୍କର କିଛି କାମ ନାହିଁ। ସେମାେନ କେବଳ ସାମାଜିକ ଗଣମାଧ୍ୟମରେ ଭିଡିଓ ଛାଡ଼ିବାରେ ବ୍ୟସ୍ତ।
ଯୁବରାଜଙ୍କ ଏପରି ମନ୍ତବ୍ୟ ଜଣଙ୍କର ବ୍ୟକ୍ତିଗତ ସ୍ବାଧିନତାକୁ କ୍ଷୁଣ୍ଣ କରୁଥିବା ଦର୍ଶାଇ ଆଇନଜୀବୀ ରଜତ୍ କଲ୍ସାନ୍ ହିସାର ପୁଲିସରେ ଯୁବରାଜଙ୍କ ବିରୋଧରେ ଅଭିଯୋଗ କରିଥିବା କେତେକ ଗଣମାଧ୍ୟମ ରିପୋର୍ଟରେ ଦର୍ଶାଯାଇଛି। ଯୁବରାଜଙ୍କୁ ତୁରନ୍ତ ଗିରଫ କରିବାକୁ କଲ୍ସାନ ଦାବି କରିଛନ୍ତି। ଚହଲ୍ଙ୍କ ବିରୋଧରେ ଯୁବରାଜ ମନ୍ତବ୍ୟ ଦେଉଥିବା ବେଳେ ରୋହିତ ଏହାକୁ ବିରୋଧ କରିନଥିବାରୁ ରୋହିତଙ୍କ ଉପରେ ବର୍ଷିଛନ୍ତି କଲ୍ସାନ। ଏ ସଂପର୍କରେ ବରିଷ୍ଠ ଅଧିକାରୀ ତଦନ୍ତ କରିବେ ବୋଲି ପୁଲିସ ତରଫରୁ କୁହାଯାଇଛି। ଚହଲ୍ଙ୍କ ବିରୋଧରେ ମନ୍ତବ୍ୟ ଦେବା ଯୁବରାଜଙ୍କ ଉପରେ ଭାରି ପଡ଼ିଛି। ନିଜ ମନ୍ତବ୍ୟ ପାଇଁ ଯୁବରାଜ ତୁରନ୍ତ କ୍ଷମା ମାଗିବା ଉଚିତ୍ ବୋଲି ବିଭିନ୍ନ ମହଲରୁ ଦାବି ହେଉଛି।
Comments are closed.