ରାଜଧାନୀରେ ଆତଙ୍କ; ସର୍ବ ସମ୍ମୁଖରେ ଯୁବକଙ୍କୁ ଗୋଡ଼ାଇ ହାଣିଲେ ୨ ଦୁର୍ବୃତ୍ତ

ଭୁବନେଶ୍ଵର: ରାଜଧାନୀରେ ଲକ୍‌ଡାଉନ ଚାଲିଛି। ବିଭିନ୍ନ ସ୍ଥାନରେ ପୁଲିସ ମୁତୟନ ହୋଇଛନ୍ତି। ଏହା ସତ୍ବେ ଅପରାଧୀମାନେ ନିର୍ଭୟ ଭାବେ ଅପରାଧ ଘଟାଇଛନ୍ତି। ସ୍ବଷ୍ଟ ଦିବାଲୋକରେ ଜଣେ ଯୁବକଙ୍କୁ ଗୋଡ଼ାଇ ଗୋଡ଼ାଇ ହାଣିଛନ୍ତି। ମଙ୍ଗଳବାର ବାପୁଜୀନଗର ଓଭରବ୍ରିଜ ନିକଟରେ ଏହି ଘଟଣା ଘଟିଛି। ୨ ଜଣ ଦୁର୍ବୃତ୍ତ ଫାର୍ସା ଏବଂ ଭୂଜାଲିରେ ଜଣେ ଯୁବକଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଛନ୍ତି। ଯୁବକ ଜଣକ ନିସ୍ତେଜ ହୋଇ ପଡ଼ିଯିବା ପରେ ଦୁର୍ବୃତ୍ତ ଦ୍ବୟ ସେଠାରୁ ଫେରାର ହୋଇଯାଇଛନ୍ତି। ସ୍ଥାନୀୟ ଲୋକଙ୍କ ସମ୍ମୁଖରେ ଏହି ଅପରାଧ ଘଟିଥିଲେ ହେଁ ଭୟରେ ସେମାନେ ନୀରବଦ୍ରଷ୍ଟା ସାଜିଥିଲେ। ଖବର ପାଇ କ୍ୟାପିଟାଲ ଥାନା ପୁଲିସ ଘଟଣା ସ୍ଥଳରେ ପହଞ୍ଚି ଗୁରୁତର ଅବସ୍ଥାରେ ଯୁବକଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛନ୍ତି।

ଆକ୍ରମଣର ଶିକାର ହୋଇଥିବା ଯୁବକଙ୍କ ନାମ ପି. ନରସିଂହା ଓ ସେ ବାପୁଜୀନଗର ବସ୍ତି ଅଞ୍ଚଳର ବୋଲି ସୂଚନା ମିଳିଛି। ପୂର୍ବ ଶତ୍ରୁତାରୁ ଦୁର୍ବୃତ୍ତମାନେ ତାଙ୍କୁ ଆକ୍ରମଣ କରିଥିବା ଜଣାପଡ଼ିଛି। ପୁଲିସ ଘଟଣାର ତଦନ୍ତ ଆରମ୍ଭ କରିବା ସହିତ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ ଚଳାଇଛି।

Comments
Loading...