ତିନିଦିନହେଲା ନିଖୋଜ ଯୁବକଙ୍କ ମିଳୁନି ପତ୍ତା

ହରଭଙ୍ଗା : ବୌଦ୍ଧଜିଲ୍ଲା ପୁରୁଣା କଟକ ଥାନା ଅର୍ନ୍ତଗତ ଲୁଣିବାହାଲ ପଞ୍ଚାୟତ କଣ୍ଟିଆପଦର ଗ୍ରାମର ନେପାଳ ପ୍ରଧାନଙ୍କ ପୁଅ ଜଗଦୀଶ ପ୍ରଧାନ(୨୩) ଗତ ୨ତାରିଖରୁ ନିଖୋଜ ଥିବା ଜଣାପଡ଼ିଛି। ତେବେ ତିନିଦିନ ହେଲା ନିଖୋଜ ଯୁବକଙ୍କ ପତ୍ତା ନ ମିଳିବାରୁ ଏ ନେଇ ପରିବାର ପକ୍ଷରୁ ପୁରୁଣାକଟକ ଥାନାରେ ଲିଖିତ ଅଭିଯୋଗ ହୋଇଛି। ସୂଚନା ମତେ ଗତ ୨ତାରିଖ ଦିନ ସକାଳେ ଏକ ସାଇକେଲ ଯୋଗେ ଘରୁ ବାହାରି ଜଗଦୀଶ କେଉଁଆଡେ ଯାଇ ଆଉ ଫେରିନଥିଲେ। ପରିବାର ପକ୍ଷରୁ ବହୁ ଖୋଜାଖୋଜି ପରେ ପୁରୁଣା କଟକ ପଞ୍ଚାୟତ ନିକଟସ୍ଥ କମଳପୁର ଗ୍ରାମ ନିକଟରେ ଏକ ଶାଗୁଆନ ଗଛ ତଳେ ଦୁଇଦିନ ହେଲା ଏକ ସାଇକେଲ ଏବଂ ଚପଲ ପଡ଼ିଥିବା ଦେଖିବାକୁ ମିଳିଥିଲା। ଏହା ଜଗଦୀଶଙ୍କର ବୋଲି ପରିବାର ଲୋକେ ଜାଣିବାକୁ ପଇଛନ୍ତି। ମାତ୍ର ଜଗଦୀଶଙ୍କ କୌଣସି ଖୋଜ ଖବର ମିଳିନଥିବାରୁ ସେମାନେ ବାଧ୍ୟ ହୋଇ ଥାନାର ଦ୍ୱାରସ୍ଥ ହୋଇଥିବା ଜଣାପଡ଼ିଛି। ଜଗଦୀଶ ବାପା,ମାଆଙ୍କର ଏକମାତ୍ର ପୁଅ ବୋଲି ଜଣାପଡ଼ିଛି। ତାଙ୍କ ଏତଲା ଆଧାରରେ ପୁରୁଣା କଟକ ପୁଲିସ ଘଟଣାସ୍ଥଳରେ ପହଞ୍ଚି ପ୍ରାଥମିକ ତଦନ୍ତ ଚଳାଇଥିବା ଜଣାପଡ଼ିଛି।

Comments
Loading...