୨ଦିନ କାଳବୈଶାଖୀ, ୧୦ ଜିଲାକୁ ୟେଲୋ ୱାର୍ଣ୍ଣିଂ

ଭୁବନେଶ୍ବର: ଆଜି ଓ ଆସନ୍ତାକାଲି ଦୁଇଦିନ ବିଭିନ୍ନ ସ୍ଥାନରେ କାଳବୈଶାଖୀ ପ୍ରଭାବରେ ବିଜୁଳି ଘଡଘଡି ସହିତ ବର୍ଷା ହେବାର ସମ୍ଭାବନା ରହିଛି। ଏଥିପାଇଁ ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ୧୦ ଜିଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ଶନିବାର ଅପରାହ୍ଣରେ ୧୦ ଜିଲାରେ କାଳବୈଶାଖୀ ଯୋଗୁଁ ବିଜୁଳି ଘଡଘଡି ସହିତ ବର୍ଷା ହୋଇଛି। ଭୁବନେଶ୍ବରରେ ଧୂଳିଝଡ ଓ ବର୍ଷା ହୋଇଛି। କଟକ, ନୟାଗଡ, ଖୋର୍ଦ୍ଧା, ଯାଜପୁର, କେନ୍ଦ୍ରାପଡା, ଗଞ୍ଜାମ, କନ୍ଧମାଳ, କୋରାପୁଟ, ଗଜପତି ଏବଂ ଜଗତସିଂହପୁରରେ ବର୍ଷା ହୋଇଛି। ତାପମାତ୍ରା ବୃଦ୍ଧି ହେତୁ ଗରମ ବଢ଼ି ଚାଲିଛି। ଗତକାଲି କାଳବୈଶାଖୀ ଜନିତ ବର୍ଷା ଗ୍ରୀଷ୍ମରୁ ସାମାନ୍ୟ ଆଶ୍ବସ୍ତ କରିଛି। ଭୁବନେଶ୍ବର ରାଜୀବଭବନରେ ସର୍ବାଧିକ ୯.୫ ମିମି ଏବଂ କଟକର ମୁଣ୍ଡଳିରେ ୨୪ମିମି ବର୍ଷା ହୋଇଥିବା ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। କାଳବୈଶାଖୀ ପ୍ରଭାବରେ ବିଭିନ୍ନ ସହରରେ ସର୍ବାଧିକ ତାପମାତ୍ରା ସାମାନ୍ୟ ହ୍ରାସ ପାଇଛି।

ରାଜ୍ୟର ସବୁଠୁ ଅଧିକ ଦିନ ତାପମାତ୍ରା ବୌଦ୍ଧରେ ୪୦.୫ ଡିଗ୍ରୀ ରେକର୍ଡ କରାଯାଇଛି। ପୁଣି ବୌଦ୍ଧ ସହର ରାଜ୍ୟର ଉତ୍ତପ୍ତ ପାଲଟିଛି। ବଲାଙ୍ଗୀରରେ ୪୦, ମାଲକାନଗିରିରେ ୩୯.୫, ନୟାଗଡରେ ୩୯.୩, ଟିଟିଲାଗଡ ଓ ଭୁବନେଶ୍ବରରେ ୩୯.୨ ଏବଂ ସମ୍ବଲପୁର ଓ ତାଳଚେରରେ ୩୯ ଡିଗ୍ରୀ ପାରଦ ରହିଛି। ରାତି ତାପମାତ୍ରା ସମସ୍ତ ସ୍ଥାନରେ ବୃଦ୍ଧି ପାଉଛି। ସର୍ବନିମ୍ନ ତାପମାତ୍ରା ସବୁଠୁ କମ ଫୁଲବାଣୀରେ ୧୮ ଡିଗ୍ରୀ ରେକର୍ଡ କରାଯାଇଛି। ଅନ୍ୟାନ୍ୟ ସ୍ଥାନରେ ପାରଦ ୧୯ରୁ ୨୭ ଡିଗ୍ରୀ ମଧ୍ୟରେ ରହିଛି।

ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି ଯେ ଆସନ୍ତା ୩ଦିନ ପର୍ୟ୍ୟନ୍ତ ସର୍ବାଧିକ ତାପମାତ୍ରାରେ କୌଣସି ପରିବର୍ତ୍ତନ ହେବାର ସମ୍ଭାବନା ନାହିଁ। ପରବର୍ତ୍ତୀ ୩ ଦିନ ସର୍ବାଧିକ ତାପମାତ୍ରା ୩ ଡିଗ୍ରୀ ବଢ଼ିବ। ତା’ର ପରବର୍ତ୍ତୀ ୩ ଦିନ ଅନେକ ସ୍ଥାନରେ ଦିନ ତାପମାତ୍ରାର ସ୍ବାଭାବିକଠାରୁ ୫ ଡିଗ୍ରୀ ଅଧିକ ରହିବ। ଆକଳନ ଅନୁଯାୟୀ, ରବିବାର ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, ଖୋର୍ଦ୍ଧା, ପୁରୀ ଏବଂ ଗଞ୍ଜାମରେ ବଜ୍ରପାତ ସହ ବର୍ଷା ହେବ। ମୟୂରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, ଜଗତସିଂହପୁର ଏବଂ କଟକ ଜିଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ସୋମବାର ମୟୂରଭଞ୍ଜ, ବାଲେଶ୍ବର ଏବଂ ଭଦ୍ରକରେ କାଳବୈଶାଖୀ ଯୋଗୁଁ ବିଜୁଳି ଘଡଘଡି ସହ ବର୍ଷା ହୋଇପାରେ। ଉକ୍ତଦିନ ପାଇଁ ମୟୂରଭଞ୍ଜ, ବାଲେଶ୍ବର ଓ ଭଦ୍ରକ ଜିଲାକୁ ୟେଲୋ ୱାର୍ଣ୍ଣିଂ ଦିଆଯାଇଛି। ୱାର୍ଣ୍ଣିଂ ଜାରି କରାଯାଇଥିବା ଜିଲାରେ ଘଣ୍ଟା ପ୍ରତି ୩୦ରୁ ୪୦ କିମି ବେଗରେ ପବନ ବୋହିବ ବୋଲି ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି।