ହଳଦିଆ ଓ ବାଇଗଣି ରଙ୍ଗର ଫୁଲକୋବି

ଉତ୍ତରପ୍ରଦେଶର ଗୋରଖପୁର ଜିଲାର ପିପିଗଞ୍ଜ ଅଞ୍ଚଳର ଜଣେ ଚାଷୀ ହଳଦିଆ ଓ ବାଇଗଣୀ ରଙ୍ଗର ଫୁଲକୋବି ଚାଷ କରି ଏବେ ଚର୍ଚ୍ଚାରେ ରହିଛନ୍ତି। ଏହି ଫୁଲକୋବି ଯେତିକି ସୁନ୍ଦର ଦେଖାଯାଏ, ଖାଇବାକୁ ମଧ୍ୟ ସେତିକି ସ୍ୱାଦିଷ୍ଟ ଲାଗିଥାଏ । ମହାଯୋଗୀ ଗୋରଖନାଥ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ଡ.ବିବେକ ପ୍ରତାପ ସିଂହଙ୍କ କହିବାନୁସାରେ, କୃଷକଙ୍କ ଜମିରେ ହୋଇଥିବା ରଙ୍ଗୀନ ଫୁଲକୋବିରେ ସାଧାରଣ ଫୁଲକୋବି ଅପେକ୍ଷା ଅଧିକ ପୁଷ୍ଟିସାର ରହିଛି । ଏଥିରେ ଫାଇଟୋ କେମିକାଲସ ଏବଂ ଆଣ୍ଟିଅକ୍ସିଡାଣ୍ଟ ରହିଛଇ, ଯାହା ରୋଗ ଏବଂ ଶରୀର ସଂକ୍ରମଣକୁ ମୁକାବିଲା କରିବାରେ ବିଶେଷ ଭାବେ ସହାୟକ ହୋଇଥାଏ। ଏଥିରେ କ୍ୟାଲସିୟମ, ଫସଫରସ, ମ୍ୟାଗନେସିୟମ ଏବଂ ଜିଙ୍କ ରହିଛି, ଯାହା ହାଡକୁ ଶକ୍ତିଶାଳୀ କରିଥାଏ । ଏହାର ଚାଷ ପାଇଁ ଥଣ୍ଡା ଏବଂ ଆର୍ଦ୍ର ଜଳବାୟୁ ଆବଶ୍ୟକ । ଏହି ରଙ୍ଗୀନ ଫୁଲକୋବି ଚାଷ କରିବାର ଉପଯୁକ୍ତ ସମୟ ସେପ୍ଟେମ୍ବରରୁ ଅକ୍ଟୋବର ମଧ୍ୟରେ କରାଯାଇଥାଏ। ପିପିଗଞ୍ଜ ଅଞ୍ଚଳର ଚାଷୀ ବିଷ୍ଣୁ ପ୍ରତାପ ସିଂହ ଏହି କୋବି ଚାଷ କରି ଏବେ ଲୋକଙ୍କ ନଜରକୁ ଆସିଛନ୍ତି। ଏହି ଚାଷକୁ ଦେଖିବା ପାଇଁ ଏବେ ସ୍ଥାନୀୟ ଚାଷୀଙ୍କ ମଧ୍ୟରେ ବହୁତ ଆଗ୍ରହ ଦେଖିବାକୁ ମିଳିଛି। କୃଷକ ବିଷ୍ଣୁ ପ୍ରତାପ ସିଂ କହିଛନ୍ତି ଯେ ଆଗାମୀ ଦିନରେ କୃଷକମାନଙ୍କ ନିକଟରେ ଏହିପରି ନୂତନ ପ୍ରଜାତି ଆଣିବାରେ କୃଷି ବିଜ୍ଞାନ କେନ୍ଦ୍ର ଏକ ମାଇଲଖୁଣ୍ଟ ବୋଲି ପ୍ରମାଣିତ ହେବ। ଏହାକୁ ଚାଷୀ ନିଜ ବିଲରେ ଚାଷ କରି ଲାଭବାନ ହୋଇପାରିବେ।

Comments
Loading...