ନୂଆଦିଲ୍ଲୀ : ବିକାଶମୁଖୀ ଦେଶଗୁଡ଼ିକରେ ୭୩୦ କୋଟିରୁ ଅଧିକ ଲୋକ ବାସ କରୁଛନ୍ତି ଓ ସେମାନେ ବିକାଶ ସୁବିଧାରୁ କେବେ ବଞ୍ଚିତ ହେବା
ଉଚିତ୍ ନୁହେଁ ବୋଲି ଭାରତ କହିଛି । ବିଶ୍ୱ ବାଣିଜ୍ୟ ସଂଗଠନ ହେଉଛି ଏଭଳି ଏକ ଅନୁଷ୍ଠାନ ଯାହା ସହାୟତା ନୁହେଁ ବାଣିଜ୍ୟ ମାଧ୍ୟମରେ ଦେଶଗୁଡ଼ିକର ବିକାଶ ଓ ଅଭିବୃଦ୍ଧି ସମସ୍ୟାର ସମାଧାନ କରିଥାଏ ।
ନୂଆଦିଲ୍ଲୀରେ ବିକାଶମୁଖୀ ଦେଶଗୁଡ଼ିକର ବିଶ୍ୱ ବାଣିଜ୍ୟ ସଂଗଠନ ମନ୍ତ୍ରୀସ୍ତରୀୟ ବୈଠକରେ ଉଦବୋଧନ ଦେଇ ବାଣିଜ୍ୟ ମନ୍ତ୍ରୀ ସୁରେଶ ପ୍ରଭୁ ଏହା କହିଛନ୍ତି। ନୂଆଦିଲ୍ଲୀରେ ଅନୁଷ୍ଠିତ ଏହି ବୈଠକ ଡବ୍ଲୁଟିଓକୁ ଆହୁରି ଉନ୍ନତି ପଥରେ ଆଗେଇ ନେଇପାରିବ ବୋଲି ତାଙ୍କର ଦୃଢ଼ ବିଶ୍ୱାସ ରହିଛି । ଡବ୍ଲୁଟିଓରେ ପକ୍ଷପାତ ବିହୀନ ନୀତି, ଭବିଷ୍ୟତ ଉପରେ ପୂର୍ବାନୁମାନ, ସ୍ୱଚ୍ଛତା, ସହମତି ଭିତ୍ତିରେ ନିଷ୍ପତ୍ତି ଗ୍ରହଣ ଓ ବିକାଶ ପାଇଁ ପ୍ରତିଶ୍ରୁତିବଦ୍ଧତା ସର୍ବଦା ଏହାର ମୂଲ୍ୟବାନ ଉପାଦାନ ହୋଇ ରହିବ ବୋଲି ମନ୍ତ୍ରୀ ଶ୍ରୀ ପ୍ରଭୁ କହିଛନ୍ତି । ସମ୍ପ୍ରତି ଅନୁଷ୍ଠିତ ମନ୍ତ୍ରୀସ୍ତରୀୟ ବୈଠକ ଡବ୍ଲୁଟିଓ କଥାବାର୍ତ୍ତାରେ ବିକାଶକୁ ଅଗ୍ରାଧିକାର ଦେବ ଓ ଏଥିରେ ସଂସ୍କାର ପାଇଁ ବାଟ ଖୋଲିବ ।
ସୋମବାର ରାତିରେ ଅନୁଷ୍ଠିତ ନୈଶ ଭୋଜିସଭାରେ ଉଦ୍ବୋଧନ ଦେଇ ଡବ୍ଲୁଟିଓ ମହାନିର୍ଦ୍ଦେଶକ ରବର୍ଟୋ ଆଜେବେଡୋ କହିଛନ୍ତି, ଡବ୍ଲୁଟିଓରେ ସଂସ୍କାର ସାଂପ୍ରତିକ ସଂକଟର ଦୂରିକରଣ କରିବ । ବର୍ତ୍ତମାନ ପର୍ଯ୍ୟନ୍ତ ରହିଥିବା ବ୍ୟବସ୍ଥା ସଠିକ୍ ନୁହେଁ ଓ ଏହା ଆଶାନୁରୂପ ଫଳ ପ୍ରଦାନ କରିପାରିବ ନାହିଁ। ସାଂପ୍ରତିକ ବ୍ୟବସ୍ଥା ଉପରେ କାର୍ଯ୍ୟ କରିବା ପାଇଁ ସେ ପ୍ରସ୍ତାବ ଦେଇଛନ୍ତି ।
Comments are closed.