ଲଦାଖରେ ବିଶ୍ୱର ସର୍ବୋଚ୍ଚ ସ୍ଥାନରେ ଖୋଲିଲା ଚଳଚ୍ଚିତ୍ର ପ୍ରେକ୍ଷାଳୟ

ଲେହ: ଲଦାଖରେ ସ୍ଥାପନ କରାଯାଇଛି ବିଶ୍ୱର ସର୍ବୋଚ୍ଚ ଉଚ୍ଚତାରେ ଥିବା ଚଳଚ୍ଚିତ୍ର ପ୍ରେକ୍ଷାଳୟ। ଏହା ସମୁଦ୍ର ପତନରୁ ୧୧,୫୬୨ ଫୁଟ ଉଚ୍ଚତାରେ ଅବସ୍ଥିତ। ଲଦାଖର ଦୁର୍ଗମ ଅଞ୍ଚଳରେ ବାସ କରୁଥିବା ଜନସାଧାରଣଙ୍କୁ ପ୍ରେକ୍ଷାଳୟରେ ଚଳଚ୍ଚିତ୍ର ଦେଖିବାର ଅନୁଭୂତି ପ୍ରଦାନ ଉଦ୍ଦେଶ୍ୟରେ ଏହି ପ୍ରକଳ୍ପ ସ୍ଥାପନ କରାଯାଇଛି। ଏହା ଏକ ଭ୍ରାମ୍ୟମାଣ ପ୍ରେକ୍ଷାଳୟ ଭାବରେ କାର୍ଯ୍ୟ କରିବ। ପିକ୍ସର ଟାଇମ ଡିଜିପ୍ଲେକ୍ସ ପକ୍ଷରୁ ଏହାକୁ ସ୍ଥାପନ କରାଯାଇଛି ଏବଂ ଏହା ସମ୍ପୂର୍ଣ୍ଣ ଭାବରେ ଜଳନିରୋଧୀ ସାମଗ୍ରୀରେ ତିଆରି କରାଯାଇଛି। ଲେହର ଏନଏସଡି ପଡିଆରେ ଏହାକୁ ସ୍ଥାପନ କରାଯାଇଛି। ଏହି ଉପଲକ୍ଷେ ଆୟୋଜିତ ଏକ କାର୍ଯ୍ୟକ୍ରମରେ ଲଦାଖ ବୌଦ୍ଧ ଧର୍ମାବଲମ୍ବୀ ସଂଘର ସଭାପତି ଥୁପସ୍ତାନ ଚେୱାଙ୍ଗ ଏବଂ ଅଭିନେତା ପଙ୍କଜ ତ୍ରିପାଠୀ ଉପସ୍ଥିତ ଥିଲେ। ସେମାନଙ୍କ ସହିତ ନ୍ୟାସନାଲ ସ୍କୁଲ ଅଫ ଡ୍ରାମାର ଜଣେ ମଞ୍ଚ କଳାକାର ମେଫାମ ଓତ୍‍ସାଲ ମଧ୍ୟ ଏଥିରେ ଅତିଥି ଭାବରେ ଯୋଗଦେଇଥିଲେ। ଜଣାଯାଇଛି ଯେ ଲେହର ବିଭିନ୍ନ ସ୍ଥାନରେ ଏହିଭଳି ଚାରିଟି ପ୍ରେକ୍ଷାଳୟ ସ୍ଥାପନ କରାଯିବ। ଏଗୁଡିକ ବିଯୁକ୍ତ ୨୮ ଡିଗ୍ରୀ ତାପମାତ୍ରାରେ ମଧ୍ୟ ସୁଚାରୁ ରୂପେ ଚଳଚ୍ଚିତ୍ର ପ୍ରଦର୍ଶନ କରିପାରିବ। ପ୍ରେକ୍ଷାଳୟ ଉଦଘାଟନ ଅବସରରେ ସଂକ୍ଷିପ୍ତ ଚଳଚ୍ଚିତ୍ର ‘ସେକୁଲ’ ପ୍ରଦର୍ଶିତ ହୋଇଥିଲା, ଯାହା ଲଦାଖର ଚାଙ୍ଗପା ଯାଯାବର ଲୋକଙ୍କ ଜୀବନ ଉପରେ ଆଧାରିତ।

Comments
Loading...