MEllora 950×100

ଆଜି ବିଶ୍ବ ଏଡ୍‌ସ ଦିବସ ; ରାଜ୍ୟରେ ୨୦ ବର୍ଷରେ ୫୭,୩୫୯ ଆକ୍ରାନ୍ତ

ଭୁବନେଶ୍ୱର : ରାଜ୍ୟରେ ଏଡ୍‌ସ ସ୍ଥିତି ଉଦବେଗଜନକ ରହିଛି। ରାଜ୍ୟରେ ଏବେ ମୋଟ ୫୭,୩୭୯ ଏଡ୍‌ସ ଆକ୍ରାନ୍ତ ଥିବାବେଳେ ବର୍ଷକରେ ୨୯୩୭ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ୨୦୦୨ରୁ ୨୦୨୨ ଅକ୍ଟୋବର ମଧ୍ୟରେ ଗତ ୨୦ ବର୍ଷରେ ମୋଟ ୫୭,୩୫୯ ଏଡ୍‌ସରେ ଆକ୍ରାନ୍ତ ହୋଇଛନ୍ତି। ନିୟନ୍ତ୍ରଣ ପାଇଁ ରାଜ୍ୟ ସରକାର ଅନେକ ପଦକ୍ଷେପ ଗ୍ରହଣ କରୁଛନ୍ତି। ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ବ୍ୟାପକ ସଚେତନତା କରାଯାଉଛି। ରାଜ୍ୟର ପ୍ରାୟ ୬୪୦ କଲେଜରେ ରେଡରିବନ କ୍ଲବ ସହିତ ୬୪ ଏନଜିଓ ସଂସ୍ଥା କାର୍ଯ୍ୟ କରୁଛି। ଏହାଛଡା ଟୋଲ ଫ୍ରି ନମ୍ବର ୧୦୯୭ ନମ୍ବରକୁ ଗତ ୪ ମାସ ମଧ୍ୟରେ ସର୍ବାଧିକ ଫୋନ ଆସିବାରେ ଓଡିଶା ପ୍ରଥମ ସ୍ଥାନରେ ରହିଛି। ସରକାର ଆଉ ପାଦେ ଆଗକୁ ଯାଇ କଟକ ଏସ୍‌ସିବି ଭେଷଜ ମହାବିଦ୍ୟାଳୟରେ ଏଆରଟି ଉତ୍କର୍ଷ କେନ୍ଦ୍ର ଖୋଲୁଛନ୍ତି। ଗୁରୁବାର ବିଶ୍ବ ଏଡ୍ସ ଦିବସରେ ଏହି କେନ୍ଦ୍ରର ଶୁଭାରମ୍ଭ ହେବ ବୋଲି ଜଣାପଡିଛି।
ଓଡିଶା ରାଜ୍ୟ ଏଡ୍‌ସ ନିୟନ୍ତ୍ରଣ ପରିଷଦ(ଓସାକ୍ସ) ପକ୍ଷରୁ ମିଳିଥିବା ସୂଚନା ଅନୁସାରେ ଗତ ବର୍ଷ ଅକ୍ଟୋବର ସୁଦ୍ଧା ମୋଟ ସଂକ୍ରମିତଙ୍କ ସଂଖ୍ୟା ୫୪,୪୨୨ ଥିବାବେଳେ ଚଳିତ ବର୍ଷ ଅକ୍ଟୋବରରେ ଏହି ସଂଖ୍ୟା ବୃଦ୍ଧି ହୋଇ ୫୭,୩୫୯ରେ ପହଞ୍ଚିଛି। ଅର୍ଥାତ ବର୍ଷକରେ ଏଡ୍ସ ଆକ୍ରାନ୍ତଙ୍କ ସଂଖ୍ୟା ପାଖାପାଖି ୩ ହଜାର ରହିଛି। ରାଜ୍ୟର ୬ ଜିଲା ଏଡ୍‌ସ ଆଶଙ୍କା ପ୍ରବଣଭାବେ ଚିହ୍ନଟ କରାଯାଇଛି। ଯେଉଁଥିରେ ରହିଛି ଅନୁଗୋଳ, କଟକ, ଖୋର୍ଦ୍ଧା, ଗଞ୍ଜାମ, କୋରାପୁଟ ଓ ସମ୍ବଲପୁର। ଗଞ୍ଜାମ ଜିଲାରୁ ସର୍ବାଧିକ ୧୭,୦୯୩ ଚିହ୍ନଟ ହୋଇଥିବାବେଳେ ବୌଦ୍ଧରେ ସର୍ବନିମ୍ନ ୧୦୨ ରହିଛନ୍ତି। ସଂକ୍ରମଣର ଦ୍ବିତୀୟ ସ୍ଥାନରେ ରହିଛି କଟକ। ଏହି ଜିଲାରୁ ୭,୬୮୦ ଆକ୍ରାନ୍ତ ଚିହ୍ନଟ ହୋଇଛନ୍ତି। ସେହିପରି ସମ୍ବଲପୁରରୁ ୩୭୭୨, ଖୋର୍ଦ୍ଧା ୩୬୨୬, କୋରାପୁଟ ୨୮୧୭ ଓ ଅନୁଗୋଳରୁ ୨୨୦୭ ସଂକ୍ରମିତ ଚିହ୍ନଟ ହୋଇଥିବାବେଳେ ଅନ୍ୟ ଜିଲାଗୁଡିକରେ ସଂକ୍ରମିତଙ୍କ ସଂଖ୍ୟା ୨ ହଜାର ତଳେ ରହିଛି। ବର୍ତ୍ତମାନ ରାଜ୍ୟରେ ୨୦ ଟି ଏଆରଟି କେନ୍ଦ୍ର କାର୍ଯ୍ୟ କରୁଥିବାବେଳେ କଟକ ଏସ୍‌ସିବି ଭେଷଜ ମହାବିଦ୍ୟାଳୟରେ ଉତ୍କର୍ଷ ଏଆରଟି କେନ୍ଦ୍ର କରାଯିବ, ଯାହାକି ରାଜ୍ୟର ପ୍ରଥମ ହେବ ବୋଲି ଜଣାପଡିଛି। ଏଠାରେ ଏଡ୍‌ସର ସମସ୍ତ ପ୍ରକାର ପରୀକ୍ଷା ସହିତ ଚିକିତ୍ସା ଓ ଔଷଧ ପ୍ରଦାନ କରାଯିବ।

Comments are closed.