କରୋନା କଟକଣା,ଗୃହିଣୀମାନେ ଘରେ ପାଳିଲେ ସାବିତ୍ରୀ ବ୍ରତ

ଚୌଦ୍ୱାର : କରୋନା ମହାମାରୀ ପ୍ରକୋପରେ ସାରା ରାଜ୍ୟ ଅସ୍ତବ୍ୟସ୍ତ ହୋଇ ପଡ଼ିଲାଣି। କରୋନା ସଂକ୍ରମଣ ରୋକିବା ପାଇଁ ତାଲାବନ୍ଦ ଲାଗୁ କରାଯିବା ସହିତ ସମସ୍ତ ପୁଜା ପାର୍ବଣ ଉପରେ ରୋକ୍‍ ଲଗା ଯାଇ ମନ୍ଦିର, ଧର୍ମାନୁଷ୍ଠାନ ଆଦି ସ୍ଥାନ ମାନଙ୍କରେ କଡା କଟକଣା ଲାଗୁ କରା ଯାଇଛି। ଫଳ ସ୍ୱରୂପ ଓଡ଼ିଶାରେ ଧୁମ୍‍ ଧାମ୍‍ରେ ପାଳିତ ହେଉଥିବା ବିବାହିତା ମହିଳା ମାନଙ୍କର ମୁଖ୍ୟ ଓଷା ସାବିତ୍ରୀ ବ୍ରତ, ଚଳିତ ବର୍ଷ ଫିକା ହୋଇ ଯାଇଛି। ସ୍ୱାମୀ ମାନଙ୍କର ଦୀର୍ଘାୟୁ ତଥା ପରିବାରର ମଙ୍ଗଳ କାମନା କରି ବିବାହିତା ମହିଳା ମାନେ ନିର୍ଜଳା ଉପବାସ କରିବା ସହିତ ମନ୍ଦିର ଯାଇ ପୂଜାର୍ଚ୍ଚନା କରିବା ଏଥର ସମ୍ଭବ ହୋଇ ପାରିନାହିଁ। ଫଳରେ ଗୁରୁବାର ଦିନ ଅନୁଷ୍ଠିତ ଏହି ବ୍ରତରେ ଚୌଦ୍ୱାର ସହର ତଥା ଏହାର ଗ୍ରାମାଞ୍ଚଳ ମାନଙ୍କରେ ଥିବା ଦେବଦେବୀ ମନ୍ଦିର ଗୁଡିକ ଭକ୍ତଶୂନ୍ୟ ଥିବା ଦେଖିବାକୁ ମିଳିଥିଲା। କା ଭାଁ କିଛି ମହିଳା ଲୁଚିଛପି ମନ୍ଦିରକୁ ଆସି ପୁଜା କରିଥିବା ବେଳେ ଅନ୍ୟ ସମସ୍ତ ମହିଳା ନିଜ ନିଜ ଘରେ ଠାକୁରଙ୍କ ପାଖରେ ପୁଜାର୍ଚ୍ଚନା କରିବା ସହିତ ସାବିତ୍ରୀ ବ୍ରତ ବହି ପଢ଼ି ବ୍ରତ ପାଳନ କରିଥିଲେ। ତେବେ ମନ୍ଦିର ଗୁଡିକରେ ରୀତିନୀତି ଅନୁସାରେ ଦେବୀଙ୍କ ପୁଜାର୍ଚ୍ଚନା କରାଯାଇଛି। କରୋନା ଜନିତ ତାଲାବନ୍ଦ ହେତୁ ଲୁଗା ଓ ଫଳମୂଳ ବେପାର ଅତି ମାତ୍ରାରେ ହ୍ରାସ ପାଇଥିବା ବ୍ୟବସାୟୀ ମାନେ ପ୍ରକାଶ କରିଛନ୍ତି। ସ୍ୱାମୀଙ୍କ ଦୀର୍ଘଜୀବନ କାମନା କରିବା ସହିତ ରାଜ୍ୟରୁ କିପରି କରୋନା ମହାମାରୀ ଲୋପ ପାଇବ ସେଥି ନିମନ୍ତେ ଠାକୁରଙ୍କୁ ପ୍ରାର୍ଥନା କରିଥିବା ପ୍ରକାଶ କରିଛନ୍ତିି ପ୍ରୀୟଙ୍କା ପ୍ରଧାନ, ଅର୍ପିତା ହୋତା, ଲିତା ଦାସ, ବନଜା ଦାସ୍‍, ସ୍ମିତା ମହାନ୍ତି, ଲୋପାମୁଦ୍ରା ରାଉତରାୟ, ମୀରା ଦାସ ଆଦି ଗୃହିଣୀ।

Comments are closed.