ନୂଆଦିଲ୍ଲୀ : କ୍ୟାବିନେଟର ସଂସଦୀୟ ବ୍ୟାପାରର କମିଟି (ସିସିପିଏ) ସଂସଦର ଶୀତକାଳୀନ ଅଧିବେଶନ ଡିସେମ୍ବର ୧୧ରୁ ଆରମ୍ଭ କରିବାକୁ ସୁପାରିଶ କରିଛି। ବିଭାଗୀୟ ଅଧିକାରୀଙ୍କଠାରୁ ଏହି କଥା ବୁଧବାର ଜାଣିବାକୁ ମିଳିଛି।
ସୁପାରିଶରେ ଡିସେମ୍ବର ୧୧ରୁ ଅଧିବେଶନ ଆରମ୍ଭ କରି ଜାନୁଆରୀ ୮ ପର୍ଯ୍ୟନ୍ତ ଚଲାଇବାକୁ କୁହାଯାଇଛି। ପ୍ରକାଶଯୋଗ୍ୟ ଯେ ସାଧାରଣତଃ ସଂସଦର ଶୀତକାଳୀନ ଅଧିବେଶନ ନଭେମ୍ବରରୁ ଆରମ୍ଭ ହୁଏ। ହେଲେ ଏହାକୁ ମିଶାଇ କ୍ରମାଗତ ଦ୍ୱିତୀୟ ବର୍ଷ ସଂସଦର ଶୀତକାଳୀନ ଅଧିବେଶନ ଡିସେମ୍ବର ମାସରେ ହେବ। ସୂଚନା ଅନୁସାରେ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହଙ୍କ ଆବାସରେ ମଙ୍ଗଳବାର ସନ୍ଧ୍ୟାରେ ତାଙ୍କ ଅଧ୍ୟକ୍ଷତାରେ ସିସିପିଏ ବୈଠକ ହୋଇଥିଲା। ଏଥିରେ ସଂସଦର ଶୀତକାଳୀନ ଅଧିବେଶନ ଡିସେମ୍ବର ମାସରେ ଆରମ୍ଭ କରିବାକୁ ଆଲୋଚନା ହୋଇଥିଲା ଓ ସେହି ଅନୁସାରେ ସୁପାରିଶ କରାଯାଇଛି।
ଗତ ବର୍ଷ ମଧ୍ୟ ସଂସଦର ଶୀତକାଳୀନ ଅଧିବେଶନ ଡିସେମ୍ବର ମାସରେ ଆରମ୍ଭ ହୋଇଥିଲା। ଏହା ପଛରେ ଗୁଜୁରାଟ ଏବଂ ହିମାଚଳପ୍ରଦେଶ ବିଧାନସଭା ନିର୍ବାଚନ ଥିଲା।
ଚଳିତ ଥର ଶୀତକାଳୀନ ଅଧିବେଶନରେ ବିରୋଧୀ ଦଳ ରାଫେଲ ରାଜିନାମା, କୃଷକଙ୍କ ବିକ୍ଷୋଭ, ଦରଦାମ ବୃଦ୍ଧି ଭଳି ପ୍ରସଙ୍ଗ ଉଠାଇ ବିଜେପି ନେତୃତ୍ୱାଧୀନ ଏନ୍ଡିଏ ସରକାରଙ୍କୁ ଘେରିବାକୁ ରଣନୀତି ପ୍ରସ୍ତୁତ କରିଥିବା ଦଳୀୟ ସୂତ୍ରରୁ ଜାଣିବାକୁ ମିଳିଛି। ଏହା ପୂର୍ବରୁ ସଂସଦର ମୌସୁମୀ ଅଧିବେଶନରେ ଲୋକସଭା ୧୭ ଦିନ ପର୍ଯ୍ୟନ୍ତ ଚାଲିଥିଲା। ଏଥିରେ ୨୧ଟି ବିଧେୟକ ପାରିତ ହୋଇଥିଲା।
