ମୋ ସ୍ବାମୀ କଣ ଦୁଷ୍କର୍ମ କରିଛନ୍ତି କି? ତାଙ୍କୁ ଜାମିନ୍ ମିଳିଲେ ସମାଜକୁ ଖରାପ ବାର୍ତ୍ତା ଯିବ: ଆଇଏଏସ ବିଜୟଙ୍କ ପତ୍ନୀ

କଟକ: ମୋ ସ୍ବାମୀ କଣ ଦୁଷ୍କର୍ମ କରିଛନ୍ତି? ନା ସେ ଜଣେ ଆତଙ୍କବାଦୀ ତାଙ୍କୁ ଜାମିନ ମିଳିଲେ ସମାଜକୁ ଖରାପ ବାର୍ତ୍ତା ଯିବ। ଯାହା ସରକାରୀ ଓକିଲ କୋର୍ଟରେ ଯୁକ୍ତି ବାଢିଥିଲେ। ସରକାରୀ ଓକିଲଙ୍କ ଯୁକ୍ତିକୁ ନେଇ ସାମ୍ବାଦିକ ସମ୍ମିଳନୀ କରି ପ୍ରଶ୍ନ କରିଛନ୍ତି  ଗିରଫ ଆଇଏଏସ ବିଜୟ କେତନଙ୍କ ପତ୍ନୀ ତୁଷିମା ମିଶ୍ର। ତୁଷିମା କହିଛନ୍ତି ମୋ ସ୍ବାମୀଙ୍କୁ ବିନା ଅପରାଧରେ ଫସେଇ ଦିଆଯାଇଛି। ବିଜୟ କେତନଙ୍କ ବିରୋଧରେ ଆସିଥିବା ଅଭିଯୋଗ ଉଦ୍ଦେଶ୍ୟମୂଳକ। ଆମ ଘରୁ ମଧ୍ୟ କୌଣସି ଆପତ୍ତିଜନକ କାଗଜପତ୍ର ମିଳିନାହିଁ। ବିଜୟଙ୍କ ମାମଲାରେ ଭିଜିଲାନ୍ସକୁ ଉପରୁ ଚାପ ପଡ଼ିଛି ନହେଲେ ମୋ ସ୍ଵାମୀଙ୍କୁ ଭିଜିଲାନ୍ସ ଗିରଫ କରିନଥାନ୍ତା। ବିଜୟ ସମ୍ପୂର୍ଣ୍ଣ ନିର୍ଦ୍ଦୋଷ, ତାଙ୍କୁ ଷଡ଼ଯନ୍ତ୍ର କରି ଫସାଇ ଦିଆଯାଇଛି। ତାଙ୍କୁ ଜାମିନ ମିଳିଲେ ସମାଜକୁ ଖରାପ ମେସେଜ ଯିବ ବୋଲି ସରକାରୀ ଓକିଲ କୋର୍ଟରେ ଯୁକ୍ତି ବାଢିଥିଲେ । ବିଜୟ କେତନ କ’ଣ ଆତଙ୍କବାଦୀ ନା ଦୁଷ୍କର୍ମ କରିଛନ୍ତି ଯେ ତାଙ୍କୁ ଜାମିନ ମିଳିଲେ ସମାଜକୁ ଖରାପ ମେସେଜ ଯିବ ବୋଲି ପ୍ରଶ୍ନ କରିଛନ୍ତି ତୁଷିମା।

ସୂଚନାଯୋଗ୍ୟ, ଉଦ୍ୟାନ କୃଷି ବିଭାଗର ନିର୍ଦ୍ଦେଶକ ଥିବା ବିଜୟ କେତନ ଏକ ବିଲ୍ ପାସ୍ କରିବା ପାଇଁ ୧ଲକ୍ଷ ଟଙ୍କା ଲାଞ୍ଚ ନେଉଥିବା ଖବର ପାଇ ଭିଜିଲାନ୍ସ ତାଙ୍କୁ  ଧରିବା ସହ ତାଙ୍କ ଘର ଉପରେ ଚଢାଉ କରିଥିଲା। ଭିଜିଲାନ୍ସ ପକ୍ଷରୁ ଏକକାଳୀନ ବିଜୟ କେତନଙ୍କ ଅଫିସ ସହ ଅନ୍ୟ କେତେକ ସ୍ଥାନରେ ଚଢାଉ କରାଯାଇଥିଲା। ରାଜ୍ୟ ସରକାରଙ୍କ ‘ମୋ ସରକାର’ କାର୍ୟ୍ୟକ୍ରମ ଆଧାରରେ ବିଭିନ୍ନ ବ୍ୟକ୍ତିଙ୍କଠାରୁ ନେଇଥିବା ମତାମତରୁ ସୂଚନା ପାଇ ଭିଜିଲାନ୍ସ ତାଙ୍କୁ ଟ୍ରାପ୍ କରିଥିଲା ଓ ତାଙ୍କ ଉପରେ କଡ଼ା ନଜର ରଖିଥିଲା। ଗିରଫ ପରେ ସ୍ବତନ୍ତ୍ର ଭିଜିଲାନ୍ସ କୋର୍ଟ ବିଜୟଙ୍କ ଜାମିନ ଆବେଦନ ମଧ୍ୟ ଖାରଜ କରିଥିଲେ।