‘କରୋନା’- ଏବେ ବିଶ୍ଵ ପାଇଁ ବିପଦ ନାହିଁ: ଡବ୍ଲ୍ୟୁଏଚ୍‌ଓ

ବେଜିଂ: ଚୀନରୁ ବ୍ୟାପିଥିବା କରୋନା ଭାଇରସକୁ ନେଇ ସାରା ବିଶ୍ଵ ଚିନ୍ତିତ ହୋଇପଡ଼ିଛି। ବିଶେଷ କରି ୟୁରୋପ ଏବଂ ଏସିଆ ଦେଶଗୁଡ଼ିକରେ ଏହାର ପ୍ରଭାବ ଦେଖିବାକୁ ମିଳିଲାଣି। ବର୍ତ୍ତମାନ ସୁଦ୍ଧା କରୋନା ଭାଇରସ ବିଶ୍ଵର ୧୦ରୁ ଅଧିକ ଦେଶକୁ ବ୍ୟାପି ସାରିଛି। ଏହି ଦେଶଗୁଡ଼ିକ ମଧ୍ୟରେ ରହିଛନ୍ତି ଅଷ୍ଟ୍ରେଲିଆ, ନେପାଳ, ଥାଇଲାଣ୍ଡ, ଆମେରିକା, ତାଇୱାନ, ଜାପାନ, ଦକ୍ଷିଣ କୋରିଆ, ଭିଏତନାମ, ସିଙ୍ଗାପୁର, ହଂକଂ, ଫ୍ରାନ୍ସ ଏବଂ ମକାଉ। ଏହା ବ୍ୟତୀତ ବ୍ରିଟେନ ଏବଂ ଭାରତରେ ସନ୍ଦିଗ୍ଧ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି।

କେବଳ ଚୀନରେ ଏହି ଭୂତାଣୁ ଯୋଗୁ ୪୧ ଜଣଙ୍କ ମୃତ୍ୟୁ ଘଟିଥିବାବେଳେ ୯୨୬ ଆକ୍ରାନ୍ତ ହୋଇଛନ୍ତି। ଅନ୍ୟାନ୍ୟ ଦେଶଗୁଡ଼ିକରେ ପ୍ରାୟ ୨୬ ଆକ୍ରାନ୍ତଙ୍କ ଚିକିତ୍ସା ଚାଲିଛି। ଏହା ସତ୍ବେ ବିଶ୍ଵ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍‌ଓ) ବିଶ୍ଵ ପାଇଁ ଏହାର ବିପଦ ନାହିଁ ବୋଲି କହିଛନ୍ତି। କରୋନା ଭାଇରସକୁ ନେଇ ସାରା ବିଶ୍ଵ ପାଇଁ ଜରୁରିକାଳୀନ ପରିସ୍ଥିତି ଘୋଷଣା କରିବାକୁ ଡବ୍ଲ୍ୟୁଏଚଓ ମନା କରିଦେଇଛି। ବର୍ତ୍ତମାନ କେବଳ ଚୀନ ପାଇଁ ଜରୁରିକାଳୀନ ସ୍ଥିତି ଘୋଷଣା ହୋଇଛି। ଡବ୍ଲ୍ୟୁଏଚ୍‌ଓର ଅଧିକାରୀମାନଙ୍କ କହିବା ଅନୁସାରେ, ଏବେ ସୁଦ୍ଧା ସ୍ପଷ୍ଟ ହୋଇନାହିଁ ଯେ ଏହି ନୂଆ ଭୂତାଣୁ କେତେ ବିପଜ୍ଜନକ। ଏହା ନ ଜାଣି ବିଶ୍ଵ ପାଇଁ ଏହାକୁ ଚିନ୍ତାଜନକ ପରିସ୍ଥିତି କୁହାଯାଇ ପାରିବ ନାହିଁ।

Comments
Loading...