ଧଳା କଇଁଛ

ଆମେରିକାର ଦକ୍ଷିଣ କାରୋଲିନା ବେଳାଭୂମିରେ ଏକ ବିରଳ ଈଷତ୍‌ ଧଳା ରଙ୍ଗର କଇଁଛ ଠାବ କରାଯାଇଛି। କିଆୱା ଦ୍ବୀପରେ ଟର୍ଟଲ ପାଟ୍ରୋଲ ଟିମ୍‌ର ସଦସ୍ୟମାନେ ଏହି କଇଁଛ ପାଇଥିଲେ। ଏହି ଛୋଟ କଇଁଛଟି ବର୍ଣ୍ଣକଣିକା ଅଭାବଜନିତ ଏକପ୍ରକାର ଡିଜ୍‌ଅର୍ଡରରେ ଆକ୍ରାନ୍ତ ଥିବା ଜଣାଯାଏ। ଏହାକୁ ଲ୍ୟୁସିଜ୍‌ମ ବୋଲି କହନ୍ତି। ତେବେ ଆଲ୍‌ବିନିଜ୍‌ମ ସମସ୍ୟା ପରି ଲ୍ୟୁସିଜ୍‌ମରେ ଆଖିର ରଙ୍ଗ ବଦଳେ ନାହିଁ। କଇଁଛମାନଙ୍କ କ୍ଷେତ୍ରରେ ଏଭଳି ଲ୍ୟୁସିଜ୍‌ମ ସମସ୍ୟା ଦେଖାଯାଏ ନା ଏହି କଇଁଛଟି ଏକ ବ୍ୟତିକ୍ରମ- ବୋଲି ଜାଣିବାକୁ ଜୀବ ବିଜ୍ଞାନୀମାନେ ଲାଗିଛନ୍ତି। କିଆୱା ଦ୍ବୀପରେ ଏହି କଇଁଛମାନେ ଅଣ୍ଡା ଦେଇଥାନ୍ତି। ମେ ପହିଲାରୁ ଅକ୍ଟୋବର ୩୧ଯାଏ ସେମାନଙ୍କ ପ୍ରଜନନ ସମୟ ହୋଇଥିବା ବେଳେ ଅଣ୍ଡା ଫୁଟିବା ପରେ ଛୋଟ କଇଁଛଗୁଡିକ ସମୁଦ୍ରକୁ ଚାଲିଯା’ନ୍ତି। ଏହି କଇଁଛ ମିଳିବାର କିଛି ଦିନ ପୂର୍ବରୁ ସମୁଦ୍ରକୁ ଯାଇଥିବା ମାଛଧରାଳିମାନେ ବ୍ରିଟେନ୍‌ ଉପକୂଳର ଆଇଲ୍‌ ଅଫ୍‌ ୱାଇଟ୍‌ଠାରେ ୩ଫୁଟ ଲମ୍ବା ଏକ ଧଳା ସାର୍କମାଛ ପାଇଥିଲେ। ୩୦ବର୍ଷ ହେବ ମାଛ ଧରୁଥିଲେ ବି ଏଭଳି ମାଛ ଦେଖିନଥିବା କହିଛନ୍ତି ଜେସନ୍‌ ଗିଲେସ୍ପି। ଜେସନ୍‌ ଏହି ସାର୍କ ମାଛ ପାଇଥିଲେ। ଏହା ମଧ୍ୟ ଲ୍ୟୁସିଜ୍‌ମ​‌​‌ରେ ଆକ୍ରାନ୍ତ ଥିବା ଜଣାପଡିଥିଲା। ସେମାନେ ଏହି ମାଛର ଫଟୋ ଉଠାଇବା ପରେ ଏହାକୁ ପୁଣି ସମୁଦ୍ରରେ ଛାଡି ଦେଇଥିଲେ।

Comments
Loading...