ପଶ୍ଚିମବଙ୍ଗ ହିଂସା: ଦୁଇ ଦିନରେ ୧୪ ଜଣଙ୍କୁ ହତ୍ୟା, ହିଂସା ରୋକିବାକୁ ମମତାଙ୍କ ନିର୍ଦେଶ

କଲକାତା: ପଶ୍ଚିମବଙ୍ଗରେ ନିର୍ବାଚନ ପରବର୍ତ୍ତୀ ହିଂସା ଯୋଗୁ ୨ ଦିନ ମଧ୍ୟରେ ୧୪ ଜଣଙ୍କ ମୃତ୍ୟୁ ଘଟିଲାଣି। ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ନବନିର୍ବାଚିତ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟର ବରିଷ୍ଠ ଅଧିକାରୀମାନଙ୍କ ସହିତ ଜରୁରୀ ବୈଠକ କରିବା ସହିତ ହିଂସା ରୋକିବାକୁ ପୁଲିସ ଓ ପ୍ରଶାସନକୁ ନିର୍ଦେଶ ଦେଇଛନ୍ତି। ବୁଧବାର ସେ ଶପଥ ଗ୍ରହଣ କରିବା ପୂର୍ବରୁ ବିଜେପି ଏବଂ ଟିଏମସି ମଧ୍ୟରେ ଚାଲିଥିବା ହିଂସା ବନ୍ଦ ହେବା ଦରକାର ବୋଲି ମମତା ନିର୍ଦେଶ ଦେଇଥିବା ବିଶେଷ ସୂତ୍ରରୁ ସୂଚନା ମିଳିଛି।

ଅନ୍ୟପଟେ ଏହି ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଚିନ୍ତା ପ୍ରକଟ କରିଛନ୍ତି। ସେ ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନଖଡ଼ଙ୍କ ସହିତ ଫୋନ ଯୋଗେ କଥା ହେବା ସହିତ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟକୁ ରିପୋର୍ଟ ତଲବ କରିଛନ୍ତି।

ଜଣେ ବରିଷ୍ଠ ପୁଲିସ ଅଧିକାରୀଙ୍କ ସୂଚନା ଅନୁସାରେ, ମମତା ହିଂସା ପରିସ୍ଥିତିକୁ ନେଇ ଅତ୍ୟନ୍ତ ଚିନ୍ତିତ ରହିଛନ୍ତି। ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଗଲେ ତାଙ୍କ ବିଜୟକୁ ମଳିନ କରିଦେବ ବୋଲି ମମତା ଭୟଭୀତ ହୋଇପଡ଼ିଛନ୍ତି। ସେ ମୁଖ୍ୟ ସଚିବଙ୍କ ସହିତ କିଛି ଭିଡିଓ ଶେୟାର କରିବା ସହିତ ତାହାର ଅନୁଧ୍ୟାନ କରିବାକୁ କହିଛନ୍ତି। ଯଦି ତାହା ମିଥ୍ୟା ହୋଇଥିବ, ତେବେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ମୁଖ୍ୟ ସଚିବଙ୍କୁ ପରାମର୍ଶ ଦେଇଛନ୍ତି।

ସୂଚନାଯୋଗ୍ୟ, ଗତ ମଙ୍ଗଳବାର ରାଜ୍ୟର ବିଭିନ୍ନ ସ୍ଥାନରେ ବିଜେପିର ୬ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଥିବା ଦଳ ପକ୍ଷରୁ ଅଭିଯୋଗ କରାଯାଇଛି। ଏହାକୁ ମିଶାଇ ବିଜେପିର ମୋଟ ୯ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଥିବା ଦଳ ଅଭିଯୋଗ କରିଛି। ସେହିପରି ଟିଏମସିର ୪ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଥିବା ଦଳ ପକ୍ଷରୁ କୁହାଯାଇଛି। ଏହାବ୍ୟତୀତ ଇଣ୍ଡିଆନ ସେକ୍ୟୁଲାର ଫ୍ରଣ୍ଟର ଜଣେ ନେତାଙ୍କୁ ଗତ ସୋମବାର ହତ୍ୟା କରାଯାଇଥିଲା।

Comments are closed.