ଭୁବନେଶ୍ୱର : ପଶ୍ଚିମା ଝଡ଼ର ଆଗମନ ତଥା ପୂର୍ବଦିଗରୁ ବଙ୍ଗୋପସାଗର ମଧ୍ୟରୁ ଓଡ଼ିଶା ଭିତରକୁ ପ୍ରବଳ ମାତ୍ରାରେ ଉଷ୍ଣ-ଜଳୀୟବାଷ୍ପ ପ୍ରବେଶ କରୁଛି। ଯଦ୍ଦ୍ବାରା ଆସନ୍ତା ୧୧ରୁ ୧୪ ତାରିଖ ମଧ୍ୟରେ ବିଭିନ୍ନ ଜିଲା ଗୁଡିକରେ ହାଲୁକାରୁ ମଧ୍ୟମ ଧରଣର ବୃଷ୍ଟିପାତ ହେବା ସମ୍ଭାବନା ରହିଛି। ଆସନ୍ତାକାଲି(ସୋମବାର)ଠାରୁ ପଶ୍ଚିମ ଓଡ଼ିଶାର କିଛି ଜିଲାରେ ବର୍ଷା ହୋଇପାରେ। ଏହି ପଶ୍ଚିମା ଝଡ ପ୍ରଭାବରେ ଅନେକ ଜିଲାର ଗୋଟିଏରୁ ଦୁଇଟି ସ୍ଥାନରେ କୁଆପଥର ବର୍ଷା ସହ କିଛି ସ୍ଥାନରେ ପ୍ରବଳ ବର୍ଷା ହୋଇପାରେ। ପ୍ରାୟ ସ୍ଥାନରେ ୬ରୁ ୧୧ ସେଣ୍ଟିମିଟର ବୃଷ୍ଟିପାତ ହେବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି।
ବୃଷ୍ଟିପାତ ପ୍ରଭାବ ମୁଖ୍ୟତଃ କୃଷି କ୍ଷେତ୍ରକୁ ଅଧିକ ପ୍ରଭାବିତ କରିବ। ଆସନ୍ତା ୨୪ ଘଣ୍ଟା ମଧ୍ୟରେ ପଶ୍ଚିମ ଓଡ଼ିଶାର ବରଗଡ, ଝାରସୁଗୁଡା, ସୁନ୍ଦରଗଡ, ନୂଆପଡା, ବଲାଙ୍ଗୀର, ସମ୍ବଲପୁର, ସୋନପୁର ଏବଂ ଦେବଗଡ ଜିଲାର କିଛି ସ୍ଥାନରେ ହାଲୁକାରୁ
ମଧ୍ୟମ ଧରଣର ବର୍ଷା ସମ୍ଭାବନା ରହିଛି। ଅବଶିଷ୍ଟ ଆଭ୍ୟନ୍ତରୀଣ ଓଡ଼ିଶାର ଗୋଟିଏରୁ ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣ ବର୍ଷା ହୋଇପାରେ। ଉପକୂଳ ଓଡ଼ିଶାରେ ପାଗ ମୁଖ୍ୟତଃ ଶୁଖିଲା ରହିବ ବୋଲି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି। କେନ୍ଦ୍ରର ସୂଚନାନୁଯାୟୀ, ୧୧, ୧୨ ଓ ୧୩ ତାରିଖରେ ଅଧିକ ବର୍ଷା ହୋଇପାରେ। ୧୧ରେ ଉତ୍ତର-ଆଭ୍ୟନ୍ତରୀଣ ଓଡ଼ିଶାର ନୂଆପଡା, କଳାହାଣ୍ଡି, କନ୍ଧମାଳ, ବଲାଙ୍ଗୀର, ସୋନପୁର ଏବଂ ବୌଦ୍ଧ ଜିଲାର କିଛି ସ୍ଥାନରେ ହାଲୁକାରୁ ମଧ୍ୟମ ଧରଣ ବର୍ଷାର ସମ୍ଭାବନା ରହିଛି। ଅବଶିଷ୍ଟ ଅଞ୍ଚଳରେ ହାଲୁକାରୁ ମଧ୍ୟମ ଧରଣ ବର୍ଷା ହୋଇପାରେ। ଏହିଦିନ ବରଗଡ, ବଲାଙ୍ଗୀର, ସୋନପୁର, ସମ୍ବଲପୁର, ଝାରସୁଗୁଡା, ସୁନ୍ଦରଗଡ ଏବଂ ଦେବଗଡ ଜିଲାର ଗୋଟିଏରୁ ଦୁଇଟି ସ୍ଥାନରେ କୁଆପଥର ସହ ବର୍ଷାର ସମ୍ଭାବନା ରହିଛି। ଉପରୋକ୍ତ ଜିଲାଗୁଡିକୁ ପାଣିପାଗ ବିଭାଗ ପକ୍ଷରୁ ହଳଦିଆ ସତର୍କ ସୂଚନା ଜାରି କରାଯାଇଛି। ସେହିପରି ୧୨ରେ କଳାହାଣ୍ଡି, କନ୍ଧମାଳ, ବୌଦ୍ଧ, ଅନୁଗୋଳ, ଢେଙ୍କାନାଳ, କଟକ ଏବଂ ନୟାଗଡ ଜିଲାର ଗୋଟିଏରୁ ଦୁଇଟି ସ୍ଥାନରେ କୁଆପଥର ସହିତ ବର୍ଷାର ସମ୍ଭାବନା ରହିଛି। ଉପରୋକ୍ତ ଜିଲାଗୁଡିକୁ ବିଭାଗ ହଳଦିଆ ସତର୍କ ସୂଚନା ଜାରି କରିଛି। ୧୩ରେ କେନ୍ଦୁଝର, ମୟୂରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର, କଟକ, ଢେଙ୍କାନାଳ, ନୟାଗଡ ଏବଂ କନ୍ଧମାଳ ଜିଲାର ଗୋଟିଏରୁ ଦୁଇଟି ସ୍ଥାନରେ ପ୍ରବଳ ବର୍ଷା ହେବା ନେଇ ଆକଳନ କରାଯାଇଛି। ଏଥିପାଇଁ ଉକ୍ତ ଜିଲାଗୁଡିକରେ ୬୪.୫ରୁ ୧୧୫.୫ ମିମି ବର୍ଷା ହୋଇପାରେ। ଏହାକୁ ନେଇ ବିଭାଗ ପକ୍ଷରୁ ହଳଦିଆ ସତର୍କ ସୂଚନା ଜାରି କରାଯାଇଛି।
ବର୍ଷା ଓ କୁଆପଥର ମାଡ ଦ୍ବାରା ମୁଖ୍ୟତଃ କୃଷିକ୍ଷେତ୍ର ଓ ଉଦ୍ୟାନ କୃଷି ଫସଲ ଉପରେ ପ୍ରଭାବ ପକାଇବ। ତଳିଆ ଅଞ୍ଚଳରେ ଜଳମଗ୍ନ ପରିସ୍ଥିତି ସୃଷ୍ଟି ହୋଇପାରେ। ଚାଷୀ ବ୍ୟବହାର ଉପଯୋଗୀ ଫସଲକୁ ଅମଳ କରି ସୁରକ୍ଷିତ ସ୍ଥାନରେ ଏବେଠାରୁ ରଖି ନିଅନ୍ତୁ। ଶୀତଦିନିଆ ଡାଲିଜାତୀୟ ବିହନ ମୁଗ, ବିରି, ତୈଳବିହନ ବୁଣାବୁଣି ସପ୍ତାହେ ପର୍ଯନ୍ତ କରନ୍ତୁ ନାହିଁ। ଚିନାବାଦାମ ଓ ସୋରିଷ ଫସଲ ଫସଲରେ ଚାଷୀ ଜଳସେଚନ ସ୍ଥଗିତ ରଖନ୍ତୁ। ପନିପରିବା ତଳି ଟମାଟୋ, ଲଙ୍କା, ପିଆଜ, କୋବି ଆଦିକୁ ପଲିଥିନ, ଜାଲି କିମ୍ବା ପ୍ଲାଷ୍ଟିକ ଦ୍ବାରା ଘୋଡାଇ ଦିଅନ୍ତୁ। କୁଆପଥର ମାଡରୁ ଫସଲ ରଖା ପାଇପାରିବ। ଆଜି ଦାରିଙ୍ଗବାଡିରେ ରାତି ତାପମାତ୍ରା ୮ ଡିଗ୍ରୀ, ଫୁଲବାଣୀରେ୯.୫ ଡିଗ୍ରୀ ରେକର୍ଡ କରାଯାଇଛି। ଆଗକୁ ୨ଦିନ ପର୍ଯ୍ୟନ୍ତ ସର୍ବନିମ୍ନ ତାପମାତ୍ରା ପ୍ରାୟ ୩ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ। ରାଜ୍ୟର ଅନେକ ସ୍ଥାନରେ ଶୀତ ପ୍ରକୋପ କମିବ ବୋଲି ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି।
Comments are closed.