ବିଜୟ ହଜାରେ ଟ୍ରଫି : ହିମାଚଳକୁ ୩ ରନ୍ରେ ହରାଇଲା ଓଡ଼ିଶା
କଟକ : ଗୁଜରାଟର ବରୋଦାରେ ଚାଲିଥିବା ବିଜୟ ହଜାରେ ଟ୍ରଫି ଆନ୍ତଃରାଜ୍ୟ କ୍ରିକେଟ ଟୁର୍ଣ୍ଣାମେଣ୍ଟରେ ୧୦ ଦିନ ଅପେକ୍ଷା କରିବା ପରେ ଓଡ଼ିଶା ଦଳ ବୁଧବାର ପଡ଼ିଆକୁ ଓହ୍ଲାଇଛି। ଏକ ବର୍ଷା ବାଧାପ୍ରାପ୍ତ ମ୍ୟାଚ୍ରେ ହିମାଚଳ ପ୍ରଦେଶକୁ ମାତ୍ର ୩ ରନ୍ରେ ଓଡ଼ିଶା ପରାସ୍ତ କରିଛି। ବର୍ଷା ଯୋଗୁଁ ଖେଳସୂଚୀ ପୁନଃ ନିର୍ଦ୍ଧାରିତ ହେବା ପରେ ଓଡ଼ିଶାର ଏହା ୩ୟ ଲିଗ୍ ମ୍ୟାଚ୍ ଥିଲା। ପୂର୍ବରୁ ବର୍ଷା ଯୋଗୁଁ ପଞ୍ଜାବ ଓ ବରୋଦା ବିପକ୍ଷରେ ଓଡ଼ିଶାର ମ୍ୟାଚ୍ ବାତିଲ ହୋଇ ଯାଇଥିଲା। ଓଦା ପଡ଼ିଆ ଯୋଗୁଁ ବୁଧବାର ହିମାଚଳ ପ୍ରଦେଶ ବିପକ୍ଷ ମ୍ୟାଚ୍ ୪ ଘଣ୍ଟା ବିଳମ୍ବରେ ଆରମ୍ଭ ହୋଇଥିଲା। ଫଳରେ ଏହି ମାଚ୍ ୨୧ ଓଭରର ହୋଇଥିଲା। ଓଡ଼ିଶା ପ୍ରଥମେ ବ୍ୟାଟିଂକରି ଶୁଭ୍ରାଂଶୁ ସେନାପତି, ଅଭିଷେକ ଯାଦବ ଓ ପ୍ରୟାସ ସିଂହଙ୍କ ଉପଯୋଗୀ ଇନିଂସ ବଳରେ ୨୧ ଓଭରରେ ୮ ୱିକେଟ ହରାଇ ୧୪୫ ରନ୍ କରି ପାରିଥିଲା। ପରେ ୧୪୬ ରନ୍ର ପିଛା କରିଥିବା ହିମାଚଳ ପ୍ରଦେଶ ପ୍ରଥମ ୧୦ ଓଭରରେ ମଜ୍ଭୁତ ସ୍ଥିତିରେ ଥିବା ବେଳେ ଗୋବିନ୍ଦ ପୋଦ୍ଦାରଙ୍କ ଉପଯୋଗୀ ବୋଲିଂ ଯୋଗୁଁ ମଧ୍ୟକ୍ରମ ବିଫଳ ହେବାରୁ ୨୧ ଓଭର ଶେଷରେ ୯ ୱିକେଟ ହରାଇ ୧୪୨ ରନ୍ କରି ପାରିଥିଲା। ୩ୟ ମ୍ୟାଚ୍ରେ ପ୍ରଥମ ବିଜୟ ପରେ ଓଡ଼ିଶା ୮ ପଏଣ୍ଟ ପାଇଛି। ଶୁକ୍ରବାର ହରିୟାଣା ବିପକ୍ଷରେ ଓଡ଼ିଶା ଦଳ ୪ର୍ଥ ଲିଗ୍ ମ୍ୟାଚ୍ ଖେଳିବ।
ଅପରାହ୍ଣରେ ୨୧ ଓଭରର ମ୍ୟାଚ ଆରମ୍ଭହେବା ପରେ ହିମାଚଳ ପ୍ରଦେଶ ଟସ୍ ଜିତି ଫିଲ୍ଡିଂର ନିଷ୍ପତ୍ତି ନେଇଥିଲା। ଓଡ଼ିଶାର ଦୁଇ ଓପ୍ନର ସନ୍ଦୀପ ପଟ୍ଟନାୟକ ଓ ଗୋବିନ୍ଦ ପୋଦ୍ଦାର ୬ ରନ୍ ଲେଖାଏଁ କରି ଆଉଟ ହୋଇଥିଲେ। ଅଧିନାୟକ ଶୁଭ୍ରାଂଶୁ ସେନାପତି କ୍ରିଜ୍କୁ ଆସିବା ମାତ୍ରେ ଚମତ୍କାର ବ୍ୟାଟିଂ କରିଥିଲେ ଏବଂ ଅଭିଷେକ ଯାଦବଙ୍କ ସହ ୧୧ ଓଭରରେ ସ୍କୋର୍କୁ ୭୩ ରନ୍ରେ ପହଞ୍ଚାଇଥିଲେ। ଶୁଭ୍ରାଂଶୁ ୩୪ ବଲ୍ରୁ ଗୋଟିଏ ଛକା ଓ ୬ଟି ଚୌକା ସହ ୩୯ ରନ୍କରି ଆଉଟ ହୋଇ ଯାଇଥିଲେ। ଗତବର୍ଷ ରେଳବାଇ ପାଇଁ ଖେଳିବାକୁ ଚାଲି ଯାଇଥିବା ଅଭିଷେକ ଯାଦବ ଚଳିତ ସିଜିନ୍ରେ ଓଡ଼ିଶା ଫେରି ଭଲ ଇନିଂସ ଖେଳିଥିଲେ। ଅଭିଷେକ ୩୪ ବଲ୍ରୁ ୨ଟି ଲେଖାଏଁ ଛକା ଓ ଚୌକା ସହ ୩୪ ରନ୍ କରିଥିଲେ। ମଧ୍ୟକ୍ରମରେ ଅଭିଷେକ ରାଉତ ୦ ଓ ସୁଜିତ ଲେଙ୍କା ୧ ରନ୍କରି ଆଉଟ ହୋଇଥିଲେ। ତେବେ ପ୍ରୟାସ ସିଂହ ଓ ଦୀପକ ବେହେରାଙ୍କ ଲଢ଼ୁଆ ବ୍ୟାଟିଂ ଯୋଗୁଁ ଓଡ଼ିଶା ୧୪୫ ରନ୍ରେ ପହଞ୍ଚି ପାରିଥିଲା। ଦୁହେଁ ୭ମ ୱିକେଟ ପାଇଁ ୨୧ ବଲ୍ରୁ ୩୫ ରନ୍ ଯୋଗ କରିଥିଲେ। ଦୀପକ ୧୨ ବଲ୍ରୁ ଗୋଟିଏ ଲେଖାଏଁ ଛକା ଓ ଚୌକା ସହ ୧୭ ରନ୍ କରିଥିଲେ। ପ୍ରୟାସ ସିଂହ ୨୦ ବଲ୍ରୁ ୨ଟି ଲେଖାଏଁ ଛକା ଓ ଚୌକା ସହ ୩୪ ରନ୍କରି ଅପରାଜିତ ଥିଲେ। ଅଙ୍କିତ ମାଇନି ୩ଟି ଓ ପଙ୍କଜ ଜୟସୱାଲ ୨ଟି ୱିକେଟ ପାଇଥିଲେ।
ହିମାଚଳ ୧୪୬ ରନ୍ ଲକ୍ଷ୍ୟର ପିଛା କରିଥିବା ବେଳେ ଅଧିନାୟକ ଅଙ୍କୁଶ ବେନ୍ସ ୧୦ ରନ୍କରି ଆଉଟ ହୋଇ ଯାଇଥିଲେ। ତେବେ ଜାତୀୟସ୍ତରର ଓପ୍ନର ପ୍ରଶାନ୍ତ ଚୋପ୍ରା ଓ ଅଙ୍କିତ କଲ୍ସି ୫୦ ରନ୍ ଯୋଡ଼ିଥିଲେ। କଲ୍ସି ୨୯ ବଲ୍ରୁ ୨ଟି ଚୌକା ସହ ୨୨ ରନ୍ କରିଥିଲେ। ପ୍ରଶାନ୍ତ ଚୋପ୍ରା ଆକ୍ରମଣାତ୍ମକ ବ୍ୟାଟିଂ କରୁଥିବା ବେଳେ ଗୋବିନ୍ଦ ପୋଦ୍ଦାର ତାଙ୍କୁ ଆଉଟ କରିଥିଲେ। ଚୋପ୍ରା ୩୭ ବଲ୍ରୁ ୪ଟି ଛକା ଓ ୩ଟି ଚୌକା ସହ ୪୮ ରନ୍ କରିଥିଲେ। ପରେ ନିଖିଳ ଗାଙ୍ଗ୍ଟା ୬ ରନ୍କରି ବିଦାୟ ନେଇଥିଲେ। ହିମାଚଳ ୧୦ ଓଭରରେ ୧ ୱିକେଟରେ ୭୨ ରନ୍ କରିଥିବା ବେଳେ ପରବର୍ତ୍ତୀ ୧୧ ଓଭରରେ ଆଉ ୭୦ ରନ୍ ଯୋଡ଼ି ୮ଟି ୱିକେଟ ହରାଇଥିଲା। ଋଷି ଧାୱନ ୧୨, ଅମିତ କୁମାର ୧୮ ଓ ପଙ୍କଜ ଜୟସୱାଲ ୧୩ ରନ୍ କରିଥିଲେ। ସୂର୍ଯ୍ୟକାନ୍ତ ପ୍ରଧାନ ବୋଲିଂ କରିଥିବା ଅନ୍ତିମ ଓଭରରେ ହିମାଚଳ ୧୨ ରନ୍ ଆବଶ୍ୟକ କରୁଥିବା ବେଳେ ଅମିତ କୁମାରଙ୍କ ଛକା ସତ୍ତ୍ବେ ଏହା ମାତ୍ର ୮ ରନ୍ କରି ପାରିଥିଲା। ଗୋବିନ୍ଦ ପୋଦ୍ଦାର ୪ଟି ଏବଂ ପପ୍ପୁ ରାୟ ଓ ସୂର୍ଯ୍ୟକାନ୍ତ ପ୍ରଧାନ ୨ଟି ଲେଖାଏଁ ୱିକେଟ ନେଇଥିଲେ।
Comments are closed.