ମୁମ୍ବାଇ: ହଲିଉଡ଼ ଶିଳ୍ପରୁ ଏକ ଦୁଃଖଦ ଖବର ସାମ୍ନାକୁ ଆସିଛି। ପ୍ରସିଦ୍ଧ ଅଭିନେତା ବୋ ହପକିନ୍ସଙ୍କ ପରଲୋକ ଘଟିଛି। ୮୦ ବର୍ଷୀୟ ଏହି ଅଭିନେତା ଅନେକ ସୁପରହିଟ୍ ହଲିଉଡ଼ ଚଳଚ୍ଚିତ୍ରରେ ଅଭିନୟ କରିଛନ୍ତି। ୧୯୭୯ ମସିହାରେ ମୁକ୍ତିଲାଭ କରିଥିବା କମେଡି ଚଳଚ୍ଚିତ୍ର ‘ଆମେରିକୀୟ ଗ୍ରାଫିଟି’ ପାଇଁ ପ୍ରଶଂସକମାନେ ତାଙ୍କୁ ମନେ ରଖିଛନ୍ତି ଏବଂ ଆଜି ମଧ୍ୟ ପ୍ରଶଂସକମାନେ ଏହି ଫିଲ୍ମ ଦେଖିବାକୁ ପସନ୍ଦ କରନ୍ତି।
ବୋ ହପକିନ୍ସଙ୍କ ମୃତ୍ୟୁ ବିଷୟରେ ସୂଚନା ଅଭିନେତାଙ୍କ ଅଫିସିଆଲ୍ ସାଇଟ୍ ମାଧ୍ୟମରେ ଦିଆଯାଇଛି। ଏଥିରେ ଲେଖାଅଛି, ‘ଦୁଃଖର ସହ ଜଣାଉଛୁ ଯେ ଶନିବାର ରାତିରେ ବୋଙ୍କର ଦେହାନ୍ତ ହୋଇଯାଇଛି’। ବୋ ସାରା ବିଶ୍ୱରେ ତାଙ୍କ ପ୍ରଶଂସକଙ୍କ କଥା ଶୁଣିବାକୁ ଭଲ ପାଉଥିଲେ। ତଥାପି ସେ ଗତ କିଛି ବର୍ଷ ହେବ ପ୍ରତ୍ୟେକ ଇମେଲର ଉତ୍ତର ଦେବାକୁ ଅସମର୍ଥ ହୋଇଥିଲେ।
ଭେଟେରାନ ଅଭିନେତା ୧୯୬୯ ମସିହାରେ ମୁକ୍ତିଲାଭ କରିଥିବା ଫିଚର ଫିଲ୍ମ ‘ଦି ୱାଇଲ୍ଡ ବଞ୍ଚ’ ସହିତ ତାଙ୍କ କ୍ୟାରିଅର୍ ଆରମ୍ଭ କରିଥିଲେ। ଏହି ଚଳଚ୍ଚିତ୍ରରେ ତାଙ୍କର ଚରିତ୍ର ଥିଲା ‘କ୍ରେଜି ଲି’। ଏହାପରେ ସେ ‘ଗେଟଅୱେ’ରେ ନଜର ଆସିଥିଲେ। ଏଥିରେ ସେ ଏକ ସହାୟକ ଭୂମିକା ଗ୍ରହଣ କରିଥିଲେ। ଏହି ଚଳଚ୍ଚିତ୍ର ୧୯୭୨ରେ ମୁକ୍ତିଲାଭ କରିଥିଲା। ‘ହ୍ବାଇଟ ଲାଇଟନିଙ୍ଗ’, ‘ଦି ମ୍ୟାନ୍ ହୁ ଲଭ୍ଡ କ୍ୟାଟ୍ ଡାନ୍ସିଂ’, ‘ମିଡନାଇଟ୍ ଏକ୍ସପ୍ରେସ’ ଆଦି ଚଳଚ୍ଚିତ୍ରରେ ବୋ ହପକିନ୍ସ ଦେଖିବାକୁ ମିଳିଥିଲା। ଖୁବ୍ କମ୍ ଲୋକ ଜାଣନ୍ତି ଯେ, ସିନେମା ଜଗତରେ ପ୍ରବେଶ କରିବା ପୂର୍ବରୁ ବୋ ମାତ୍ର ୧୬ ବର୍ଷ ବୟସରେ ଆମେରିକା ସେନାରେ କାର୍ଯ୍ୟ କରିଥିଲେ।
Comments are closed.