ଜୁନ୍‍ ରେ ଯାନବାହନ ବିକ୍ରି ୨୨.୬୨% ବଢିଛି

ନୂଆଦିଲ୍ଲୀ: ଦେଶରେ ଚଳିତ ବର୍ଷ ଜୁନ୍‍ ମାସରେ ସମୁଦାୟ ଯାନବାହନ ବିକ୍ରି ଗତବର୍ଷ ଜୁନ୍‍ ତୁଳନାରେ ୨୨.୬୨% ବୃଦ୍ଧିପାଇଛି । ତେବେ ୨୦୧୯ ଜୁନ୍‍ ତୁଳନାରେ ଏହା ୨୮.୩୨% କମ୍‍ ରହିଥିବା ଜଣାଯାଇଛି । ଏହି ମାସରେ ଦୁଇଚକିଆ ଗାଡି ବିକ୍ରି ପୂର୍ବବର୍ଷର ଜୁନ୍‍ ତୁଳନାରେ ୧୭% ବୃଦ୍ଧି ପାଇଥିବାବେଳେ ତିନିଚକିଆ ଗାଡି ୨୨%, ବ୍ୟକ୍ତିଗତ ସ୍ତରରେ ବ୍ୟବହାର ହେଉଥିବା ଯାନ ୪୩% ଏବଂ ଟ୍ରାକ୍ଟର ବିକ୍ରି ୧୪% ବୃଦ୍ଧିପାଇଛି । ସେହି ସମୟରେ ବାଣିଜ୍ୟିକ ଯାନବାହନ ବିକ୍ରି ରେକର୍ଡ ୨୩୬% ବୃଦ୍ଧି ଘଟିଛି । ଜୁନ୍‍ ମାସର ଏହି ଅଭିବୃଦ୍ଧି ଧାରା ଚଳିତ ଜୁଲାଇ ମାସରେ ମଧ୍ୟ ପରିଲକ୍ଷିତ ହେଉଥିବା ଫେଡେରେସନ ଅଫ ଅଟୋମୋବାଇଲ ଡିଲର୍ସ ଆସୋସିଏସନ୍ସ ପକ୍ଷରୁ କୁହାଯାଇଛି । ଯାନବାହନ  ଡିଲରସିପ୍‍ଗୁଡିକୁ ଏମଏସଏମଇ ପରିସରଭୁକ୍ତ କରାଯାଇଥିବାରୁ ଏଥିପାଇଁ ଏଫଏଡିଏ ପକ୍ଷରୁ କେନ୍ଦ୍ର ସରକାରଙ୍କ ନିକଟରେ କୃତଜ୍ଞତା ପ୍ରକାଶ କରାଯାଇଛି । ଜୁନ୍‍ ମାସର ଯାନବାହନ ବିକ୍ରି ସ୍ଥିତି ସମ୍ପର୍କରେ ପ୍ରକାଶ କରି ଏଫଏଡିଏ ସଭାପତି ଭିଙ୍କେଶ ଗୁଲାଟି କହିଛନ୍ତି, ଏହି ମାସରେ ଦେଶରେ ତାଲାବନ୍ଦ ପରବର୍ତ୍ତୀ ଡିଲରସିପ୍‍ ଖୋଲିଥିବାବେଳେ ଗ୍ରାହକଙ୍କ ନିକଟରୁ ଆଶାନୁରୂପ ଆଗ୍ରହ ଦେଖିବାକୁ ମିଳିଛି । ତେବେ ଯାନବାହନ ଶିଳ୍ପ ଏପର୍ଯ୍ୟନ୍ତ ଜଟିଳ ପରିସ୍ଥିତିରୁ ସୁଧୁରିନାହିଁ । ୨୦୧୯ ଜୁନ୍‍ ତୁଳନାରେ ଏବେ ମଧ୍ୟ ଦେଶରେ ଯାନବାହନ ବିକ୍ରି ପ୍ରାୟ ୨୮% କମ୍‍ ରହିଛି ।

Comments
Loading...