ରାଜ୍ୟ ଶାଖା ସଭାପତିଙ୍କୁ ବାଜପେୟୀଙ୍କ ଅସ୍ଥି କଳସ ଅର୍ପଣ କଲେ ମୋଦୀ

0

ନୂଆଦିଲ୍ଲୀ : ପୂର୍ବତନ ପ୍ରଧାନମନ୍ତ୍ରୀ ଅଟଳବିହାରୀ ବାଜପେୟୀଙ୍କ ଅସ୍ଥି କଳସ ଯାତ୍ରା କାଶ୍ମୀରରୁ କନ୍ୟାକୁମାରୀ ପର୍ଯ୍ୟନ୍ତ ଆୟୋଜିତ ହେବ। ସମସ୍ତ ରାଜ୍ୟର ରାଜଧାନୀ ଓ ସବୁ ଜିଲ୍ଲାଗୁଡ଼ିକରେ ଅସ୍ଥି କଳସ ଯାତ୍ରା ଆୟୋଜନ କରି ପବିତ୍ର ନଦୀଗୁଡ଼ିକରେ ଅସ୍ଥି ବିସର୍ଜନ କରାଯିବ। ସାରା ଦେଶର ଲୋକମାନେ ଓ ଦଳରର କର୍ମୀମାନେ ସ୍ୱର୍ଗତ ବାଜପେୟୀଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିବା ପାଇଁ ଇଚ୍ଛା ପ୍ରକାଶ କରିଥିବାରୁ ପ୍ରତ୍ୟେକ ରାଜ୍ୟରେ ଅସ୍ଥି କଳସ ଯାତ୍ରା ପାଇଁ ସ୍ଥିର କରାଯାଇଛି ବୋଲି ପାର୍ଟି ପକ୍ଷରୁ କୁହାଯାଇଛି।

ବୁଧବାର ଦିଲ୍ଲୀର ୧୧-ଅଶୋକା ରୋଡ ସ୍ଥିତ ବିଜେପିର ପୁରୁଣା କାର୍ଯ୍ୟାଳୟରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ବିଜେପି ସଭାପତି ଅମିତ ଶାହା ବାଜପେୟୀଙ୍କ ଅସ୍ଥି କଳସଗୁଡ଼ିକୁ ରାଜ୍ୟ ଶାଖା ସଭାପତିମାନଙ୍କୁ ଅର୍ପଣ କରିଛନ୍ତି। ରାଜ୍ୟ ଶାଖା ବିଜେପି ସଭାପତିମାନେ ଅସ୍ଥି କଳସଗୁଡ଼ିକୁ ଗ୍ରହଣ କରି ନିଜ ନିଜ ରାଜ୍ୟର ରାଜଧାନୀ ଓ ସବୁ ଜିଲ୍ଲାଗୁଡ଼ିକରେ ଅସ୍ଥି କଳସ ଯାତ୍ରା ଆୟୋଜନ କରି ପବିତ୍ର ନଦୀଗୁଡ଼ିକରେ ଅସ୍ଥି ବିସର୍ଜନ କରିବେ ବୋଲି ପାର୍ଟି ପକ୍ଷରୁ ଜାରି ଏକ ବିଜ୍ଞପ୍ତିରେ କୁହାଯାଇଛି। ରାଜ୍ୟଗୁଡ଼ିକର ରାଜଧାନୀରୁ ଅସ୍ଥି କଳସ ଯାତ୍ରା ଆରମ୍ଭ ହେବ ଏବଂ ପ୍ରତ୍ୟେକ ବ୍ଲକ୍‍ଗୁଡ଼ିକ ଦେଇ ଏହି ଯାତ୍ରା ପରିକ୍ରମା କରାଯିବ।
ଆୟୋଜିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଶ୍ର୍ରୀ ମୋଦୀ ଓ ବିଜେପି ଅଧ୍ୟକ୍ଷ ଶ୍ରୀ ଶାହାଙ୍କ ସମେତ ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂହ, ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜ, ବାଜପେୟୀଙ୍କ ପାଳିତା କନ୍ୟା ନମିତା ଓ ନାତୁଣୀ ପ୍ରମୁଖ ଉପସ୍ଥିତ ଥିଲେ।

Comments
Loading...