ମାର୍ଚ୍ଚ ପହିଲାରୁ ୬୦ ବର୍ଷରୁ ଅଧିକ ବୟସ୍କଙ୍କୁ ଟିକା, ମନ୍ତ୍ରୀଙ୍କୁ ମାଗଣାରେ ମିଳିବନି
ନୂଆଦିଲ୍ଲୀ: କରୋନା ଟିକାକରଣକୁ ନେଇ କେନ୍ଦ୍ର ସରକାର ବୁଧବାର ଏକ ବଡ଼ ଘୋଷଣା କରିଛନ୍ତି। ଆସନ୍ତା ମାର୍ଚ୍ଚ ୧ ତାରିଖରୁ ଦେଶରେ ୬୦ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କୁ ଟିକା ପ୍ରଦାନ ଆରମ୍ଭ ହେବ। କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କ୍ୟାବିନେଟ୍ ନିଷ୍ପତ୍ତି ସମ୍ପର୍କରେ ସୂଚନା ଦେଇ ଏହି ଘୋଷଣା କରିଛନ୍ତି। ତେବେ କେନ୍ଦ୍ର ସରକାରଙ୍କ ମନ୍ତ୍ରୀମାନଙ୍କୁ ଟିକା ପାଇଁ ଅର୍ଥ ଦେବାକୁ ପଡ଼ିବ।
ଏକ ସାମ୍ବାଦିକ ସମ୍ମିଳନୀରେ ଜାଭଡେକରଙ୍କ ସୂଚନା ଅନୁସାରେ, ୬୦ବର୍ଷରୁ ଅଧିକ ବୟସ୍କଙ୍କୁ ୧ ତାରିଖରୁ ଟିକା ଦିଆଯିବ। ଏହା ସହିତ ବିଭିନ୍ନ ଗୁରୁତର ରୋଗରେ ପୀଡ଼ିତ ୪୫ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କୁ ମଧ୍ୟ ଟିକାକରଣ କରାଯିବ। ଦେଶର ୧୦ ହଜାର ସରକାରୀ କେନ୍ଦ୍ରରେ ଲୋକଙ୍କୁ ମାଗଣାରେ ଟିକା ଦିଆଯିବ।
1st March onwards, people over 60 yrs or over 45 but with comorbidities can get vaccinated at 10,000 Government facilities and many private hospitals;
Vaccines will be administered free at Government facilities; vaccines will be chargeable at private facilities #Cabinetdecision
— K.S. Dhatwalia (@DG_PIB) February 24, 2021
କେନ୍ଦ୍ରମନ୍ତ୍ରୀ କହିଛନ୍ତି ଯେ, ଯେଉଁ ଲୋକମାନେ ଘରୋଇ ହସ୍ପିଟାଲଗୁଡ଼ିକରେ ଟିକା ନେବେ ସେମାନଙ୍କୁ ଟଙ୍କା ଦେବାକୁ ପଡ଼ିବ। ସରକାରଙ୍କ ପକ୍ଷରୁ ଖୁବଶୀଘ୍ର ଟିକାର ମୂଲ୍ୟ ଅବଗତ କରାଯିବ। ସାମ୍ବାଦିକ ସମ୍ମିଳନୀରେ କେନ୍ଦ୍ର ମନ୍ତ୍ରୀ ରବିଶଙ୍କର ପ୍ରସାଦ ଘୋଷଣା କରିଛନ୍ତି ଯେ, କେନ୍ଦ୍ର ସରକାରଙ୍କ ସମସ୍ତ ମନ୍ତ୍ରୀ ଟଙ୍କା ଦେଇ କରୋନା ଟିକା ନେବେ। ଅର୍ଥାତ ୬୦ ବର୍ଷରୁ ଅଧିକ ବୟସ୍କ ମନ୍ତ୍ରୀ ସରକାରୀ କେନ୍ଦ୍ରଗୁଡ଼ିକରେ ମାଗଣାରେ ଟିକା ନେଇପାରିବେ ନାହିଁ।
ସୂଚନାଯୋଗ୍ୟ, ଗତ ଜାନୁୟାରୀ ୧୬ରୁ ଟିକାକରଣ ଆରମ୍ଭ ହୋଇଥିବାବେଳେ ଫେବୃୟାରୀ ୨୪ ସୁଦ୍ଧା ପ୍ରାୟ ୧ କୋଟି ୭ ଲକ୍ଷ ଲୋକଙ୍କୁ ଟିକା ଦିଆଯାଇଛି। ଏହା ସହିତ ୧୪ ଲକ୍ଷ ଲୋକଙ୍କୁ ଟିକାର ୨ୟ ଡୋଜ୍ ଦିଆଯାଇଛି।
Comments are closed.