ମିଳିଲା ଅଙ୍କିତା ଭଣ୍ଡାରୀଙ୍କ ମୃତଦେହ; ହତ୍ୟାକାଣ୍ଡରେ ରହିଛି ପୂର୍ବତନ ମନ୍ତ୍ରୀଙ୍କ ପୁଅର ହାତ, ତଦନ୍ତ କରିବ ଏସଆଇଟି

ଉତ୍ତରାଖଣ୍ଡ: ହୃଷିକେଶରେ ଅଙ୍କିତା ଭଣ୍ଡାରୀଙ୍କ ହତ୍ୟା ଘଟଣା ଦିନକୁଦିନ ନୂଆମୋଡ଼ ନେଉଛି । ଆଜି ସକାଳେ ହୃଷିକେଶର ଚିଲ୍ଲା କେନାଲରୁ ଅଙ୍କିତା ଭଣ୍ଡାରୀଙ୍କ ମୃତଦେହ ଉତ୍ତରାଖଣ୍ଡ ଏସଡିଆରଏଫ ଉଦ୍ଧାର କରିଥିବା ବେଳେ, ବର୍ତ୍ତମାନ ଏହାକୁ ନେଇ ଅନେକ ସନ୍ଦେହ ସୃଷ୍ଟି ହୋଇଛି ।  ଘଟଣାକୁ ନେଇ ଏସଡିଆରଏଫ୍‌ ମୁଖପାତ୍ର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ଚିଲ୍ଲା କେନାଲରୁ ଅଙ୍କିତା ଭଣ୍ଡାରୀଙ୍କ ମୃତଦେହ ଉଦ୍ଧାର କରାଯାଇଛି ।

ଏସଆଇଟି ବର୍ତ୍ତମାନ ଘଟଣାର ତଦନ୍ତ କରିବ । ଆଗକୁ ଏହି ଘଟଣା ଉପରୁ ପରଦା ହଟିବ ବୋଲି ଏସଡିଆରଏଫ୍‌ ମୁଖପାତ୍ର କହିଛନ୍ତି । ଅଙ୍କିତାଙ୍କ ମୃତ୍ୟୁକୁ ନେଇ ହୃଷିକେଶ ଅତିରିକ୍ତ ପୁଲିସ ଅଧୀକ୍ଷକ ଶେଖର ସୁଆଲ ଆଜି ସକାଳେ ତାଙ୍କର ମନ୍ତବ୍ୟ ଦେଇଛନ୍ତି । ସେ କହିଛନ୍ତି ଅଙ୍କିତାଙ୍କ ଭାଇ ଓ ବାପା ମୋ ସହିତ ଅଛନ୍ତି । ସେମାନେ ମୃତଦେହ ଚିହ୍ନଟ କରିଛନ୍ତି । ବ୍ୟାରେଜରୁ ମିଳିଥିବା ମୃତଦେହ ଅଙ୍କିତା ଭଣ୍ଡାରୀଙ୍କ ହୋଇଥିବା ସ୍ପଷ୍ଟ ହୋଇଛି । ଆଜି ସକାଳ ୭ଟାରୁ ଘଟଣାସ୍ଥଳରେ ସର୍ଚ୍ଚ ଅପରେସନ ଆରମ୍ଭ କରାଯାଇଛି ।

ଏହି ଘଟଣାକୁ ନେଇ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଟ୍ୱିଟ୍‌ କରିଥିବା ଦେଖିବାକୁ ମିଳିଛି । ମୁଖ୍ୟମନ୍ତ୍ରୀ ଟ୍ୱିଟ୍‌ କରି ଲେଖିଛନ୍ତି ଆଜି ଅଙ୍କିତା​‌ଙ୍କ ମୃତଦେହ ଉଦ୍ଧାର କରାଯାଇଛି । ଏହି ହୃଦୟ ବିଦାରକ ଘଟଣାକୁ ନେଇ ମୁଁ ବ୍ୟଥିତ । ଦୋଷୀଙ୍କୁ କଠୋରରୁ କଠୋର ଦଣ୍ଡ ମିଳିବା ଉଚିତ୍‌ । ଏହି ଘଟଣାର ତଦନ୍ତ ପାଇଁ ଏସଆଟି ଗଠନ ହୋଇଛି ଏବଂ ଏହାର ତଦନ୍ତ ପାଇଁ ନିର୍ଦେଶ ଦିଆଯାଇଛି । ଜଘନ୍ୟ ଅପରାଧ ଘଟାଉଥିବା ଅପରାଧୀଙ୍କୁ କେବେ ରକ୍ଷା କରାଯିବ ନାହିଁ ବୋଲି ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି କହିଛନ୍ତି ।

ସୂଚନା ଥାଉ କି, ଗତ ୫ ଦିନ ହେବ ନିଖୋଜ ଖିଲେ ଅଙ୍କିତା ଭଣ୍ଡାରୀ । ଏନେଇ ପରିବାର ପକ୍ଷରୁ ଅଭିଯୋଗ ହୋଇଥିଲା । ହେଲେ ତାଙ୍କର ମୃତଦେହ ଚିଲ୍ଲା କେନାଲରୁ ଉଦ୍ଧାର ହୋଇଥିବା ବେଳେ, ତାଙ୍କୁ କେ​‌ହି କେନାଲକୁ ଠେଲି ହତ୍ୟା କରିଥିବା ଅନୁମାନ କରାଯାଉଛି । ଘଟଣାକୁ ନେଇ ପୁଲିସ ଏକ ହତ୍ୟା ମାମଲା ରୁଜୁ କରିବା ସହ ଘଟଣାରେ କିଛି ଅଭିଯୁକ୍ତଙ୍କୁ ପୁଲିସ ଅଟକ ରଖି ପଚରାଉଚରା କରୁଥିବା ଜଣାପଡ଼ିଛି । ସବୁଠାରୁ ବଡ଼ କଥା ହେଉଛି ଏଥିରେ ରାଜ୍ୟର ଜଣେ ପୂର୍ବତନ ମନ୍ତ୍ରୀଙ୍କ ପୁଅ ହାତଥିବା ଅନୁମାନ କରାଯାଉଛି ।