ଆମେରିକା ଗଠନ କରୁଛି ଷ୍ଟ୍ରାଇକ ଫୋର୍ସ

ଚୀନର ଅସାଧୁ ବ୍ୟବସାୟିକ କାର୍ଯ୍ୟକଳାପକୁ ପ୍ରତିହତ କରିବ

ୱାଶିଂଟନ: ଆମେରିକା ପ୍ରଶାସନ ଏକ ଷ୍ଟ୍ରାଇକ ଫୋର୍ସ ଗଠନ କରୁଛନ୍ତି। ଏହା ଚୀନ ଭଳି ପ୍ରତିଦ୍ୱନ୍ଦ୍ୱୀ ରାଷ୍ଟ୍ରଗୁଡିକର ଅସାଧୁ ବ୍ୟବସାୟିକ କାର୍ଯ୍ୟକଳାପକୁ ପ୍ରତିହତ କରିବ। ଚୀନ ପକ୍ଷରୁ କଂପ୍ୟୁଟର ଚିପ୍‍ ଭଳି ସାମଗ୍ରୀ ଯୋଗାଣ ସମ୍ପର୍କରେ ୧୦୦ ଦିନର ସମୀକ୍ଷା ପରେ ରାଷ୍ଟ୍ରପତି ଜୋ ବାଇଡେନ ଏଭଳି ପଦକ୍ଷେପ ଗ୍ରହଣ କରିଛନ୍ତି। ବାଇଡେନ ପ୍ରଶାସନ ପକ୍ଷରୁ କୁହାଯାଇଛି ଯେ ଏହି ପଦକ୍ଷେପ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ କୋଭିଡ-୧୯ ମହାମାରୀ ଏବଂ ତଦଜନିତ ଅର୍ଥନୈତିକ ସଙ୍କଟ ଉଭୟ ଘରୋଇ ଏବଂ ଆନ୍ତର୍ଜାତିକ ଯୋଗାଣ ଶୃଙ୍ଖଳ କିଭଳି ଆମେରିକାର ଅର୍ଥନୈତିକ ଏବଂ ଜାତୀୟ ନିରାପତ୍ତା ପ୍ରତି ବିପଦର କାରଣ ହେଉଛି, ତାହା ଦେଖାଇ ଦେଇଛି।
ବାଇଡେନ ପ୍ରଶାସନ ପକ୍ଷରୁ ଏକ ବିବୃତିରେ କୁହାଯାଇଛି ଯେ ଏହା ନିୟମ ଉଲ୍ଲଂଘନ ଘଟଣାଗୁଡିକ ଉପରେ ନଜର ରଖିବ ଯାହା ବିଶ୍ୱସ୍ତରୀୟ ଯୋଗାଣ ବ୍ୟବସ୍ଥାକୁ କ୍ଷତି ପହଞ୍ଚାଇଛି ଏବଂ ଏହା ସେମିକଣ୍ଡକ୍ଟର, ନିର୍ମାଣ, ପରିବହନ ଏବଂ କୃଷି କ୍ଷେତ୍ର ଆଦି କ୍ଷେତ୍ରରେ ଥିବା ପ୍ରତିବନ୍ଧକଗୁଡିକ ଦୃଷ୍ଟିଦେଇ ବର୍ଷକ ମଧ୍ୟରେ ସଂଶୋଧନକାରୀ ନୀତି ପ୍ରଣୟନ କରିବ। ଆମେରିକା ରାଷ୍ଟ୍ରପତିଙ୍କ ଦ୍ୱାରା ଗଠିତ ଟାସ୍କଫୋର୍ସ ଦେଶର ବାଣିଜ୍ୟ, କୃଷି ଓ ପରିବହନ ମନ୍ତ୍ରୀମାନଙ୍କ ନେତୃତ୍ୱରେ ପରିଚାଳିତ ହେବ। ଏହାର ମୂଳ ଲକ୍ଷ୍ୟ ହେଉଛି ଆମେରିକା ବାହାରୁ ସାମଗ୍ରୀଗୁଡିକର ଆମଦାନୀ ଉପରେ ଆମେରିକାର ନିର୍ଭରଶୀଳତାକୁ ହ୍ରାସ କରିବା। ଏ କ୍ଷେତ୍ରରେ ରହିଥିବା ପ୍ରତିବନ୍ଧକ ଦୂର କରିବାକୁ ଏହା ଆବଶ୍ୟକ ଯୋଜନା ପ୍ରସ୍ତୁତ କରିବ। ସୂଚନାଯୋଗ୍ୟ ଯେ ଟେଲିଭିଜନ, ଫୋନ ଏବଂ ଗେମିଂ କନସୋଲ ଆଦିର ଚାହିଦା ମାତ୍ରାଧିକ ବୃଦ୍ଧିପାଇବା ଏବଂ ଏହି ସମସ୍ତ ଉପକରଣରେ ସେମିକଣ୍ଡକ୍ଟର ଚିପ୍‍ ବ୍ୟବହାର କରାଯାଉଥିବାବେଳେ କଂପ୍ୟୁଟର ଚିପ୍‍ ଅଭାବରୁ ଏଗୁଡିକର ଉତ୍ପାଦନ ବିଳମ୍ବିତ ହୋଇଥିଲା। ସ୍ୱାସ୍ଥ୍ୟସେବା କ୍ଷେତ୍ରରେ ମଧ୍ୟ ସମାନ ସମସ୍ୟାର ପରିଲକ୍ଷିତ ହୋଇଥିଲା। ଏହାକୁ ଲକ୍ଷ୍ୟ କରିବା ପରେ ଆମେରିକା ପ୍ରଶାସନ ଆଗକୁ ଏହିସବୁ ସାମଗ୍ରୀ ପାଇଁ ବିଦେଶ ଉପରେ ନିର୍ଭରଶୀଳତା ହ୍ରାସ କରିବା ସହିତ ଏହାର ମୂଳ ଉତ୍ସ ସନ୍ଧାନ କରିବାକୁ ଦେଶର ବିଭିନ୍ନ ସରକାରୀ ବିଭାଗକୁ ନିର୍ଦ୍ଦେଶ ଦେଇଛନ୍ତି।

Comments
Loading...